Pe a Oo Ina Tauaso le Alofa

MAI SE SUI O LE ALA MAI! I SEPANIA

SEʻI faaata i le mafaufau le saʻilia o sau paaga faaipoipo ae e faalēlelei lau vaai mamao ma o tamaʻitaʻi foʻi e talafeagai mo oe e faatoʻā feoaʻi lava pe a pogisa. O le mafatiaga lena o loo mafatia ai le lelefua poʻa (male emperor moth). Peitaʻi e iai ni uiga patino o lenei iniseti lalelei e mafai ona faamāmā ai le faigatā o lenei luʻi e foliga o se mea e matuā tugā.

A o faagasolo masina o le taumāfanafana, e matuā fuli ai lava le katepila poʻa o loo faanaunau mo se paaga, e ʻaipā seʻia lapoʻa i aso uma i meaʻai e mafai ona ia maua. O lea, a o sosoo mai le tau e totogo ai mea, a o alu ese o ia i fafo mai lona faamoega (pei o se fuāpepe), ae o lea ua matuā lava ma totoe meaʻai ua faaputuina e lenei lelefua aulelei mo lona olaga atoa—i lona lava tulaga, ua na o ni masina se lua.

Ona o lea ua leai se faaletonu i le itu tau meaʻai, ua mafai nei e le lelefua poʻa ona uaʻi atu lona mafaufau i lana taumafaiga o le saʻilia o se paaga. E ui i lea, pe ana lē seanoa lana meafaigaluega aogā lea e alu ma feaveaʻi, semanū e tusa lava po o le ā le susulu mai o le masina, e faigatā lava mo ia le saʻilia o se lelefua fafine.

E lua ni mea faalogo uumi po o ni enitena o loo tulioso aʻe pei ni vaovao uumi i luga o si tamaʻi ulu o le lelefua. O nei tamaʻi mea faalogo e pei ni vaovao atonu o masini tonu nei ua sili lo latou atamamai i le lalolagi e sosogiina manogi o mea. E lē gata i lea, ua avea o ni faailoilo lelei e sosogiina se “manogi manaia” e puaʻina ese mai e le lelefua fafine.

E ui ina lē tele naʻuā ni lelefua fafine, ae o le malosi o le manogi e latou te puaʻina ese mai e mafai ona gaoioi e pei se molī faailoilo e faasasalaina atu le manogi. Ona o le malosi la o le sosogi o mea faalogo po o enitena o lelefua poʻa, e mafai ai ona latou iiteina le iai o se lelefua fafine e tusa lava pe toetoe fitu maila [11 kilomita] o loo la vā aʻi. Ia, ona foʻia uma lava lea o toʻatugā na iai, ma faatasia atu loa le lelefua alii i lana manamea tamaʻitaʻi. E mafai ona tauaso le alofa i le lalolagi o iniseti lava latou—e pei la o le vaega lea.

Ua faatumulia le foafoaga a le Atua i na tala ofoofogia ma foliga uigaese! Na tusi mai le faisalamo: “Ieova e, ua matuā tele au galuega. Ua e faia ia mea uma i le poto.”—Salamo 104:24.

[Ē Ana le Ata i le itulau 24]

© A. R. Pittaway