Tau le Alofa Faa-Kerisiano ma se Mauga Mu

MAI SE SUI O LE ALA MAI! I CAMEROON

NA PASAE aʻe se mea mataʻutia i le tausaga na teʻa nei i le atunuu i Aferika i Sisifo o Cameroon. O le mauga o Cameroon o se mauga mu e tusa ma le 13,353 futu [4,070 mita] lona maualuga. O lenei pasae aʻe o le mauga mu—o le lona lima ai lea o taimi ua tupu ai i le mauga lava lea a o faagasolo le 20 senituri—ua lipotia mai le sili atu ona faaleagaina ai o mea ma le mataʻutia.

Na muaʻi oo mai lenei mala i le aoauli o le Aso Toonai, Mati 27, 1999. Na lipotia mai e nisi na vaaitino i ai, e i le aai o Buea, e tū i le auvaemauga faapea o pa, o fale, ma e oo lava foʻi i laau na matuā lūlūina lava. I le afiafi na sosoo ai, pe tusa o le ʻafa o le valu, na oo mai ai loa le isi lūlūga e sili ona malosi ma mataʻutia i lena itulagi. Sa mafai ona lagonaina lea lūlūga i le mamao e 40 maila [70 kilomita] i Douala. Na faailoa mai i le tala tomua o le nusipepa o Le Messager o le Aso Lua, Mati 30, 1999, e faapea: “Sasao Aʻe o le Mauga Mu o Cameroon—250,000 Tagata o Loo Fesagaʻi ma le Afi.” Na faaauau mai e faapea: “E faalimasefulu ona galulu le eleele i aso e lua; e 4 gutu o le mauga mu lea ua aliaʻe; e faitau selau fale ua faatamaʻiaina; o le maota mo peresitene i Buea ua nutililiia.”

E toʻa 80 nisi o Molimau a Ieova o loo nonofo i Buea. O le tele o fale na faaleagaina ua lē toe mafai ona faaleleia, e aofia ai se tasi o fale sa faaaogā e avea ma Maota o le Malo. Peitaʻi, e leai ma se soifua na leiloa ai.

Gaoioi le Alofa Faa-Kerisiano

Na vave lava ona gaoioi le alofa faa-Kerisiano ina ia faamāmāina le tulaga mataʻutia na tupu ona o le pasae aʻe o le mauga mu. Na tofia se komiti laveaʻi, na saunia e le Vaega Pule o Molimau a Ieova se tupe sa matuā manaʻomia, ma e faitau selau Molimau na vave lava ona latou faataulagaina ma le agaalofa o latou taimi, malosi, ma tupe.

Na auina atu e faapotopotoga o Molimau a Ieova meaʻai. Na tauofo atu e se tasi Molimau ni poloka simā e 1,000. O se tasi na ia faia se fuafuaga e faatau mai ni apa ato fale i se tau taugofie. Ae o le isi na savali mo le sefulu maila [16 kilomita] ina ia aumai laupapa. O se tasi alii talavou sa faaputu ana tupe e totogi atu i mātua o le teine lea o le a la faaipoipo e fai ma tau o lana avā, na toe tolopō lana faaipoipoga ae faaaogā le tupe e faaleleia ai lana ili afi. Na alu atu o ia i le vaomatua, ma ina ua mavae le tolu vaiaso, na ia tipiina ni ogalaau e lava ai se fale atoa! Na aveina atu e ni uso talavou Kerisiano malolosi nei laupapa e tuu i luga o o latou ulu i se nofoaga e tolu maila lona mamao, ina ia aoina ai e se loli.

Na faagaoioia loa le toe fauina o fale ia Aperila 24 ina ua taunuu atu i le nofoaga sa tupu ai le mala le toʻa 60 o le ʻautauofo.  A o faagasolo faaiʻuga o vaiaso na sosoo ai, na oso aʻe lena numera i se tumutumuga e 200. E toʻatolu ni Molimau e faigaluega faasolo atoa na ō ane i le faaiʻuga o o latou aso faigaluega ma faufale seʻia oo ina teʻa mamao le vaeluaga o le po. E faigaluega se Molimau mai Douala i lana galuega totogi i le taeao atoa; ona tietie atu lea i lana uilaafi mo le 40 maila [70 kilomita] ma faigaluega ai seʻia oo i le vaeluaga o le po a o leʻi toe foʻi i le fale. E leʻi atoa se lua masina ae māeʻa fale e ono. I lea taimi, sa faaauau pea ona faia sauniga a le faapotopotoga i Buea i se fale totino o se tasi, e ui lava pe tusa ua faaluaina le aofaʻi o tagata e auai i le numera o sui o le faapotopotoga.

A o faasolo lava lena vaitaimi, na tufatufaina ai e le komiti laveaʻi le 40,000 o fualaau ina ia faamamā ai vai palapalā ma sa saunia tausiga i se falemaʻi mo le pe ā o le toʻa sefulu o i latou na mafatia i faamaʻi e aafia ai le ala ʻea e māfua mai i ʻea oona ma lefulefu o le mauga mu. O le ā le tali mai a i latou na mātauina lea alofa faa-Kerisiano?

E Manumalo le Alofa Faa-Kerisiano

Ina ua māeʻa ona fausiaina e uso se tasi o fale, na faapea mai se tamāloa mai le Provincial Delegation of Agriculture o lē na ia mātauina le galuega: “O se molimau matilatila le fale lava ia . . . , o se faailoga o le alofa.” Na faapea mai le tala a se tasi faiaʻoga: “Ou te leʻi vaai muamua lava i se mea faapea i loʻu olaga . . . . O le mea moni o se faailoga lenei o le Faa-Kerisiano moni.”

O i latou na maua aogā totino sa laugatasia i le fiafia. Na tusi mai Timoteo, e 65 ona tausaga ma e gasegase, e faapea: “O taimi uma lava matou te vāai atu ai i lo matou fale fou, e faatumulia i matou i loimata o le fiafia. Matou te faaauau pea ona faafetai atu ia Ieova i mea ua ia faia mo i matou.” O se fafine e lē o se Molimau a Ieova ua oti lana tane na tuua i latou ma lana fanau e toʻafā e aunoa ma se mea e ola ai ina ua paʻū lo latou fale. Ma o i latou na totogi e fesoasoani ia te ia na latou gaoia mea e faʻalo ai lona fale. Na fesoasoani atu ia te ia Molimau tauofo. Na ia faapea mai: “Ou te lē iloa pe o le a faapefea ona ou faafetai atu. Ua matuā faatumulia loʻu loto i le olioli.” Na mātauina e Elisapeta o le avā a se toeaina Kerisiano e faapea: “Ou te fiafia ona o lea o loo iai le alofa i le faalapotopotoga a Ieova. E faaalia ai o loo tatou auauna i le Atua soifua.”

E malosi tele le pa o le mauga mu, ae e leʻi mafai ona tineia ai le alofa faa-Kerisiano o lenei ʻauuso. E pei lava ona faagaeeina le aposetolo o Paulo e tusi, “e le uma le alofa.”—1 Korinito 13:8.

[Ata i le itulau 12]

O le tatafe mai o le lāva ua liusuavai na māfua ai le tele o le faatamaʻiaga

[Ata i le itulau 13]

Na galulue mamafa le ʻautauofo e toe fausia fale na faaleagaina

[Ata i le itulau 13]

Mauga o Cameroon