Tuuina Atu i Tagata le Faamoemoe Moni

NA TUSI atu se talavou e 17 tausaga le matua mai le atunuu sa avea muamua ma vaega o le malo o Rusia, o Moldova, i le ofisa o Molimau a Ieova i lena atunuu e faailoa atu lona talisapaia i mataupu faasolo i le Ala Mai! o Ianuari 8, 1999, o loo iai i le faavaa le ulutala “O le ā se Faamoemoe mo Talavou i Aso Nei?” Na faamatala mai e lē na tusia le tusi e faapea:

“Sa faigatā lava ona taofia oʻu loimata, ma e ao lava ona ou tusi e faafetai atu. O mataupu o loo iai na māfua ai ona ou tomanatu i lagona na ia te aʻu i se taimi e leʻi mamao atu. Ina ua ou nofosauni e pule i loʻu ola, na laveaʻiina aʻu e Molimau a Ieova, e aunoa ma lo latou iloaina. O le talanoa atu ia i latou e uiga i le faamoemoe i le lumanaʻi ma le faamalosia o loʻu mautinoa i le alofa mutimutivale o Lē na Foafoaina Mea na fesoasoani ia te aʻu e faasolosolo mālie ona toe faafoʻisia i le lelei mai se tulaga atuatuvale sa iai. . . .

“O lo outou fesoasoani i tagata e aʻoaʻoina mea e uiga i fuafuaga a le Atua ina ia aumaia ai ni olaga lelei o se faailoga moni lea o le alofa i o outou tuaoi. E iai faamaoniga o nei taumafaiga e lē foʻi fua e aunoa ma ni taunuuga. O a outou taumafaiga i le faamatilatilaina o faafitauli pito sili ona tāua o loo iai i le sosaiete o tagata e taʻuleleia. Ia faaauau pea ona faia lenei galuega lelei. O le a ou faatalitali pea mo lomiga fou taʻitasi o lenei mekasini.”

I le palakalafa “Le Māfuaaga ua Lomia ai le Ala Mai!,” lea o loo iai i le itulau 4 o lomiga uma, o loo faapea mai: “Ua atiina aʻe e lenei mekasini le faatuatua atu ma le mausalī i le folafolaga a Lē na Foafoaina Mea, e uiga i se lalolagi fou filemu ma le saogalemu lea ua toe o se aga ona suia ai lea o le faiga o mea amioleaga ma le solitulafono o loo iai nei.” O le folafolaga a le Atua o loo taʻua i le Tusi Paia ua tuuina atu ai i le faitau miliona o tagata i le lalolagi aoao le malosi e fesagaʻi ai ma faafitauli o lenei vaitaimi ua tumu i faalavelave.

O le a e maua le faamoemoe moni o loo ofoina mai e Lē na Foafoaina i tatou o loo faamatalaina mai ma le matagofie i le polosiua e 32 ona itulau What Is The Purpose of Life? How Can You Find It? Tagaʻi faapitoa lava i vaega ua faaulutalaina “Fuafuaga a le Atua ua Toe o se Aga Iloatino” ma le “Ola e Faavavau i se Lalolagi Parataiso.” E mafai ona e talosaga mo lenei polosiua e ala i le faatumuina ma lafoina mai le kuponi o loo i lalo i le tuatusi o loo i le kuponi po o se tuatusi talafeagai o loo lisiina atu i le itulau 5 o lenei mekasini.

□ Auina mai mo aʻu se kopi o le polosiua What Is the Purpose of Life? How Can You Find It?

□ Faamolemole faafesootaʻi mai aʻu e tusa ai o se suʻesuʻega faale-Tusi Paia e aunoa ma se totogi