Aua Ne‘i Aafia Oe i Faamatalaga Salalau!
Aua Neʻi Aafia Oe i Faamatalaga Salalau!
“O le tagata valea o le a talitonu o ia i so o se mea.”—FAATAOTO 14:15, TODAY’S ENGLISH VERSION.
E IAI se eseesega—se eseesega tele—i le vā o aʻoaʻoga ma faamatalaga salalau. O aʻoaʻoga e faaali mai ai ia te oe le auala e te mafaufau ai. O faamatalaga salalau e taʻu maia ia te oe mea e ao ona mafaufau ai. O faiaʻoga lelei latou te faailoa maia vala uma o se mataupu ma uunaʻia se talanoaga ati aʻe. O tagata e faasalalauina faamatalaga e lē manofo lelei i le taumafai e uunaʻia malosi oe ina ia e faalogo atu i o latou manatu ma latou te lē mananaʻo e faia se talanoaga. E masani lava ona lē manino mai māfuaaga moni o a latou faamatalaga. Latou te iloiloina totoʻa vala moni uma, ona faaaogā lea o vala e fetaui ma a latou fuafuaga ae nanā isi vala. Latou te faauigasesē foʻi ma mimilosesē mea moni, e matuā tomai lava i pepelo ma faamatalaga e lē saʻo atoatoa. E taulaʻi mai a latou gaoioiga ina ia maua ou faalogona, ae lē o ou tomai e te mafaufau lelei ai.
E taumafai le tagata o loo faasalalauina faamatalaga ia mautinoa e foliga atu lana feʻau o se mea e moni ma talafeagai, ma ia oo ai ia te oe se lagona o loo faatāua ma faitaulia oe pe a e mulimuli atu i ai. O oe o se tasi o tagata atamai, ua pei oe o isi foʻi tagata, ua e saogalemu ma malupuipuia—o lagona na latou te mananaʻo ia oo ifo ia te oe.
E faapefea ona e puipuia oe mai ituaiga o tagata ua taʻua e le Tusi Paia o ē “tautalatala i upu le aoga” ma “faasese atu”? (Tito 1:10) O le taimi lava e te masani ai i nisi o a latou togafiti, ua tatau loa ona mafai ona e vaʻiliʻili lelei so o se feʻau po o ni faamatalaga latou te aumaia ia te oe. O nisi nei o auala e fai ai lenei mea.
Ia filifili lelei: O se mafaufau e tuu faatalanoa e mafai ona faatusa i se paipa lea e mafai ona tafe atu i ai so o se mea lava—e oo lava i vai leaga ma otaotavale. E leai se tasi e manaʻo e faaleagaina sona mafaufau i mea oona. Na lapataʻi mai Solomona, o ia o se tupu ma o se faiaʻoga i aso anamua, e faapea: “O le ua faigofie, e talia e ia upu uma; a o le ua mafaufau, ua faautauta o ia i lona ala.” (Faataoto 14:15) E manaʻomia la ona tatou filifili lelei. E manaʻomia ona tatou vaʻiliʻili lelei so o se faamatalaga e tuuina mai ia i tatou, ma filifili ai mea e talia ma mea e teena.
Ae peitaʻi, tatou te lē fia faauliulitō ai lava ma lē mananaʻo e iloiloina mea moni e ono faaleleia ai o tatou mafaufauga. E mafai faapefea ona tatou maua le paleni lelei? E ala i le faaaogā o se faatulagaga e mafai ona iloiloina ai ni
faamatalaga fou. O iinei ua maua ai e se Kerisiano se puna o le atamai sili. Ua ia te ia le Tusi Paia e fai ma taʻiala mautinoa mo ona mafaufauga. I le isi itu, o loo matala lona mafaufau, lona uiga, e na te taliaina faamatalaga fou. Na te fefulifulisaʻi lelei na faamatalaga fou e fua i tapulaa a le Tusi Paia, ona faaofi lea o mea e moni i ona mafaufauga. I le taimi e tasi, e ala lona mafaufau e iloa atu le mataʻutia o ni faamatalaga e matuā lē ōgatusa lava ma mea faale-Tusi Paia o loo ia faatāuaina.Ia faaaogā le faautauta: O le faautauta o le “maʻai o le utaga mamao i se faaiʻuga e fai.” O “le malosi po o le tomai o le mafaufau lea e faaeseesea ai le tasi mea mai le isi.” O le tagata faautauta na te mātauina lelei vala iloagatā o ni manatu po o ni mea, ma e lelei ana faaiʻuga e fai.
O le faaaogāina o le faautauta, o le a mafai ai ona tatou mātaulia i latou o loo na ona faaaogā a “latou [“upu,” NW] faaneenee ma alofa faaviʻiviʻi” ina ia “faasese i loto o tagata ua le manatu leaga.” (Roma 16:18) O le faautauta e mafai ai ona e lafoaʻi faamatalaga e lē aogā po o manatu taufaasesē, ae faamaʻoti ai le uiga moni o se mataupu. Ae mafai faapefea ona e mautinoa se mea o loo taufaasesē?
Ia muaʻi tofotofoina faamatalaga: “Le au pele e,” o upu ia a Ioane, o se faiaʻoga Kerisiano i le uluaʻi senituri, “aua tou te faalogo i agaga uma lava, a ia outou tofotofo i agaga pe mai le Atua i latou.” (1 Ioane 4:1) O nisi tagata i aso nei ua pei ni omomi; latou te mitiiaina so o se mea e tau ane ai. E matuā faigofie lava ona talitonu i so o se mea e taʻu mai ia i tatou.
Peitaʻi e sili mamao atu ona lelei mo tagata taʻitoʻatasi ona filifili e le tagata lava ia mea o le a ia fafagaina ai lona mafaufau. E iai le muagagana e uiga faapea, o ituaiga o tagata o iai i tatou e taʻu atu ai mea o loo tatou aai ai, ma e mafai ona faatatau lenei manatu e lē gata i le tino atoa ma le mafaufau. Po o le ā lava se mea o e faitau, matamata pe faalogologo i ai, ia muaʻi tofotofo pe lē o iai ni faamatalaga e lē saʻo atoatoa pe o ni mea moni.
E lē gata i lea, afai tatou te mananaʻo e paleni o tatou mafaufau, e ao la ona tatou lotomalilie e tofotofoina e lē aunoa o tatou lava manatu a o tatou taliaina faamatalaga fou. E ao ona tatou iloa, o ia mafaufauga, ua na o ni o tatou lava manatu. O le maufaatuatuaina o na manatu e fuafua i le moni o mea o loo tatou iloa, i le uigā o le auala tatou te fefulisaʻia ai, ma tapulaa po o mea tāua ua tatou filifili e faaaogā.
Kolose 2:4) O lea la, pe a taʻu mai ia i tatou ni upu faaoleole, e ao lava ona tatou fai atu ni fesili.
Ia fai atu ni fesili: E pei ona tatou mātauina, e toʻatele tagata i aso nei e mananaʻo e ‘faaseseina i tatou i upu faaoleole.’ (Muamua, ia iloilo pe iai se uiga faaituʻau o le manatu. O le ā le māfuaaga mo le feʻau? Pe afai e tumu le feʻau i igoa faifai ma upu faauigalua, aiseā ua faapea ai? Pe a faataatia ese la le gagana faauigalua, o ā ni mea aogā o iai i le feʻau lava ia? E lē gata i lea, pe a mafai, taumafai e iloiloina le talaaga o i latou o loo faia mai faamatalaga. Po o ni tagata e lauiloa i le tautatala i mea moni? Pe afai o loo fai ma faasino atu i ni “pule,” o ai pe o ā na pule? Aiseā e tatau ai ona e faaaloalogia lenei tagata—po o se faalapotopotoga po o se lomiga—faapea o loo iai se poto faapitoa po o ni faamatalaga maufaatuatuaina i le mataupu o lāgā? Afai e te lagona e foliga mai e ono uunaʻia ai faalogona ootia, fesili ifo ia te oe lava, ‘Pe a faataatia ese mea ia e ono ootia ai faalogona, o ā la ni aogā o iai i le feʻau?’
Aua le tau ina alu i taaʻiga: Afai e te silafia e lē o matuā saʻo lelei se mea o loo manatu i ai isi uma tagata, ia e maua le malosi e suia ai ou manatu. A o foliga mai o loo tutusa uma manatu o isi tagata, pe o lona uiga ea la e tatau foʻi ona e manatu ai faapena? O se manatu lauiloa e lē o se faavae talafeagai lena o se mea moni. I le faagasologa o senituri, ua talia ai e le toʻatele o tagata le mau manatu eseese, ae mulimuli ane toe iloa e sesē. Peitaʻi, o loo iai pea le faanaunauga o le fia mulimuli i taaʻiga a isi. Ua avea le poloaʻiga i le Esoto 23:2 ma faavae lelei: “Aua e te mulimuli atu i le toatele e fai le amio leaga.”
Le Eseesega o le Poto Saʻo ma Faamatalaga Salalau
Muamua atu, na taʻua ai faapea, o le Tusi Paia o le taʻiala mautinoa lea mo mafaufauga mamā. E matuā ioe aʻiaʻi Molimau a Ieova i le fetalaiga na fai atu e Iesu i le Atua: “O lau afioga o le upu moni lea.” (Ioane 17:17) Ua moni lena, talu ai o le Atua, le Tusitala o le Tusi Paia, o “le Atua faamaoni.”—Salamo 31:5.
Ioe, i lenei augatupulaga o le salalau atu o faamatalaga lavelave, e mafai ona tatou saʻili atu ma le mautinoa i le Afioga a Ieova e avea ma puna o upu moni. O le iʻuga, o le a puipuia ai i tatou mai ē o loo mananaʻo e ‘faavalea i tatou i a latou upu faatogafiti.’—2 Peteru 2:3.
[Ata i le itulau 9]
O le faautauta e mafai ai ona e lafoaʻia faamatalaga lē aogā ma taufaasesē
[Ata i le itulau 10]
Ia muaʻi tofotofoina so o se mea lava o e faitau pe matamata i ai, ina ia faamautinoa pe moni
[Ata i le itulau 11]
E lē o taimi uma e moni ai se manatu o lauiloa
[Ata i le itulau 11]
E mafai ona tatou saʻili atu ma le mautinoa i le Afioga a le Atua e avea ma puna o upu moni