Faamatalaga Salalau e Mafai Ona Mata‘utia
Faamatalaga Salalau e Mafai Ona Mataʻutia
“E foʻi faafia mai faataamilosaga a se tala pepelo ae o le la lava e tau amata faataamilo atu se tala moni.”—Sa faamatalaina ai e MARK TWAIN.
“LOU Siū malaia!” o le tutui atu lea o faamatalaga a le faiaʻoga, a o pasasa atu ma le pō i lana tamaitiiti aʻoga e fitu tausaga le matua. Ona ia faatonu lea o le vasega e fai mai le laina i si tamaitiiti ma tuufeanu i ona foliga.
Sa iloa lelei e le faiaʻoga ma le tamaitiiti aʻoga—e tauusoga i laʻua—e lē o ni Iutaia tupuaga o mātua o le tamaitiiti. Sa lē auai foʻi le aiga o le tamaitiiti i le lotu Iutaia a tagata Siū. Na i lo lea, o i latou o ni Molimau a Ieova. Sa faaaogā e le faiaʻoga uiga faailogatagata sa taatele i lena vaitaimi agaʻi i tagata Siū, e faatupu ai le ʻinoʻino i lana tamaitiiti aʻoga. E tele tausaga sa taʻu atu ai e le patele i le faiaʻoga lenei ma lana vasega e faapea, o Molimau a Ieova o ni tagata e tatau ona matuā inosia. Sa faaigoa uma mātua o si tamaitiiti faapea o ni Komunisi ma o ni sui o le CIA (Central Intelligence Agency). Ia, ona gasolosolo atu loa lea o le vasega a le tamaitiiti, ua matuā tuufeanu atu i foliga o si “Siū malaia.”
Na sao mai pea lea tama, ma mafai ona faamatala mai lana tala. Ae lē o le tulaga lena na tupu i le tusa ma le ono miliona o tagata Siū sa nonofo i Siamani ma atunuu tuaoi i le tusa ma le 60 tausaga ua mavae. Sa avea faamatalaga pepelo ma le matagā ma auupega i le faaumatiaina o ola o tagata Siū sa lokaina e le ʻau Nasi i potu e iai le kasa oona e faamomole ai ma nofoaga o faasalaga. O le salalau atu, le ogaoga, le fai pogisa, ma le mataʻutia o uiga faailogatagata sa faia i tagata Siū na māfua ai ona manatu le toʻatele i tagata Siū faapea o ni fili, ua lē gata ina manaʻomia ona faatamaʻia ae o se mea foʻi ua talafeagai. I lena tulaga, sa faamaonia ai le avea o faamatalaga salalau (propaganda) o se auupega o faatamaʻiaga tetele.
Ioe, o faamatalaga salalau e mafai ona fai faaaliali e ala i le faaaogā o ni faailoga o le ʻinoʻino e pei o le faailoga faa-Nasi (swastika) pe fai faaalatua atu foʻi i le faia o ni tausuaga lē migao. O na auala taufaaosooso e masani lava ona faaaogā e taʻitaʻi faatautalatasi, le ʻaufaipolotiki, o taʻitaʻi lotu, le ʻaufaifaasalalauga faatosina, o tagata e gafa ma faatauga o oloa tetele, le ʻautusitala, le ʻaufaasalalau i leitiō ma televise, i latou o loo faaauilumaina ni kamupani po o isi faalapotopotoga, ma isi o ē fai mo latou mausa le faaaafia o mafaufauga ma amioga a isi.
O le mea moni, e mafai ona faaaogā feʻau salalau e faataunuu ai ni fuafuaga aogā faaleolaga nei, e pei ona faia i tauiviga mo le taofia o le avetaavale onā. Peitaʻi e mafai foʻi ona faaaogā faamatalaga salalau e uunaʻia atili ai le ita i ituaiga o tupuaga po o vaega faalotu toʻaitiiti, pe ina ia faatosina mai ai tagata e faatau sikareti. “I aso taʻitasi ua matuā tuʻipala ai i tatou i le mau fesootaʻiga faatosina,” ua taʻua ai e tagata suʻesuʻe o Anthony Pratkanis ma Elliot Aronson. “O nei fesootaʻiga faatosina e lē o taufaaosooso mai e ala i ni talanoaga manino, ae ala mai i ni faiga taufaavalea e faigofie ona uaʻi atu i ai o tatou loto ma o tatou faalogona ootia faaletagata. E tusa lava pe lelei pe leaga, ae ua avea lo tatou vaitaimi, ma augatupulaga o faamatalaga salalau.”
Pe ua faapefea ona faaaogā faamatalaga salalau e faaaafia ai mafaufauga ma gaoioiga a tagata i le gasologa mai o senituri? O le ā se mea e mafai ona e faia ina ia puipuia ai oe lava mai faamatalaga salalau mataʻutia? Po o iai ea se puna o ni faamatalaga e maufaatuatuaina? O le a talanoaina nei fesili faatasi ma isi fesili, i mataupu o loo sosoo mai.
[Ata i le itulau 3]
Sa faaaogā faamatalaga salalau e taʻusalaina ai fua tagata Siū i le taimi o le “Holocaust”