O Ē Aumau i Ana i Aso Nei

TUSIA E LE SUI O LE ALA MAI! I LESOTHO

O Ē AUMAU I ANA i o tatou taimi? Na matou maua nisi i Lesotho, o se malo maugā i le itu i saute o Aferika. O lo latou nuu o Ha Kome, e 40 maila [60 kilomita] lona mamao mai Maseru, le laumua o Lesotho, i auvae mauga o mauga maualuluga o Maluti. A o faagasolo masina o le tau māfanafana, e ufitia ai itu o nei mauga e fugalaau mūmū sesega. Ua aumaia e nei fugalaau matagofie o le poka (red-hot pokers) e masani ona lauiloa ai, se faaeseesega o lanu pe a fua atu i le lanu lauʻava o le vao o lena vaipanoa.

 Iinā, o loo ola ai nisi o aiga i le ituaiga o olaga ua faitau senituri o loo faapea lava ona ola ai. Latou te fausia o latou fale i totonu o ana o loo i itu o mauga. O laau ma isi mea, e pei o ū, o loo faia ai le fusi o le puipui mafiafia i le pito i luma. Ua faalamolemoleina le puipui i se paluga o le palapala ma otaota vale o povi o loo pō aʻi. O lenei puipui lamolemole e mafai ai ona maua se puipuiga mai le tau mālūlū o Lesotho, pe a oo ina matuā maʻatiʻati le mālūlū o le tau. I totonu, e iai se nofoaga e maualalo ifo teisi e taʻua o le ifo, o lona uiga o le “taʻinafi,” lea foʻi e faaaogā e aumaia ai sina māfanafana pe a oo ina mālūlū.

O le fāʻalo, le puipui i le pito i tua, ma e masani lava e faapena foʻi i puipui i autafa, e faia uma aʻe lava i papa o le ana lava latou. E pō atu i ai le paluga o le palapala ma otaotavale o povi i puipui nei, ma e toe faia faapea i tausaga taʻitasi. O lenei faiga e maua ai le lanu ma e molemole ai foʻi le tino o le papa. O paʻu povi e teuteuina ai totonu ma e faaaogā foʻi e fai ma faamalū e momoe ai.

Pe a ō atu tagata asiasi mai atunuu i Sisifo o le a latou iloa ai e matuā ese lava le fou o lea ituaiga o olaga. O ituaiga o ofu e masani ai o palanikeke felanulanuaʻi ma pulou lauvao e faalaumiumi i luga. E masani lava ona vaaia tama leoleo mamoe o feoaʻi e leoleo a latou lafu e aunoa ma ni seevae. O tamāloloa o le nuu e mafai ona vaaia o galulue i o latou togasana po o loo sagisagi talanoa atu i isi tamāloloa.

E aliaʻe mai lea taimi i lea taimi faailoga o fausaga faatekinisi faaonaponei. O tamaʻi vaalele e fai ma felelei aʻe i luga o lea vaipanoa atoa ai ma taavale e aai uma paʻu e fā (four-wheel-drive) o loo avatua tagata asiasi i ana, e pei o ni mea e faafiafia ai le ʻautalavou ma le ʻaumatutua o le nuu. O le tele lava o gasesega e faia i fafo e faaaogā ai se ogaumu uliuli e tolu ona vae e faia i le uʻamea e tafu i alala. Ona o le tau leai o ni alala, o otaotavale o povi ua mamago, o ū, ma nai isi lava lālā laau e faaaogā e tafu ai afi. O meafaigaluega e faaaogā i fale e taatele i tagata e aumau i nei ana e aofia ai le maaolo masani a le nuu mo le oloina o sana ma se laau mo le saʻeuina o le polesi e faia i le sana.

Ua lauiloa Lesotho i ata tusi a tagata e aumau i le vao, lea o loo maua i le tele o ana ma i luga o papa i totonu o le atunuu atoa. O nei tagata o i latou ia na uluaʻi nofoia ana o Ha Kome. O loo faamatalaina i a latou ata le tele o ituaiga o galuega, mai le fagota e faaaogā ai vaa i siva e taga eseese lea e faia ai e tagata sisiva matapulepule e foliga i manu. E faamatalaina mai foʻi i ata ia manu, e pei o manukī lapopoʻa, leona, puaasami, ma eland, o se ituaiga o anetelope e sili ona lapoʻa. O le tele o ata tusi i ana o Ha Kome ua mou atu. Ua na o nisi lava o toēga o ata o loo iai pea e faamanatu ai tusiga ata a tagata sa nonofo i le vao.

O loo faia se sao a se vaega o Molimau a Ieova i la latou galuega talaʻi i se vaipanoa e lē mamao tele ma Ha Kome. Mai lea taimi i lea taimi, latou te asiasi atu ai i ē aumau i ana, o ē ua lauiloa i lo latou talimalo i tagata asiasi atu. E masani lava ona faafeiloaʻia Molimau i se ipu polesi masani a le nuu e taʻua o le motoho. E toʻatele i latou i Ha Kome o loo naunau e taliaina lomiga faale-Tusi Paia. E masani lava ona latou faaalia le talisapaia mo lomiga e ala i le ofoina atu o fualaau faisua, fuāmoa, po o isi lava mea e fai ma foaʻi mo le galuega tau aʻoaʻo atu a Molimau.

E iai ia i latou nei o loo aumau i ana i aso nei se faaaloalo loloto mo le Tusi Paia ma e naunau e faia le tele o fesili e uiga i le olaga, oti, ma e uiga i o latou talitonuga faaleaganuu. O le galuega a Molimau maelega i lena vaipanoa ua iʻu ai i le tele o suʻesuʻega faale-Tusi Paia. I lenei auala, ua maua ai e fatu o le upu moni le eleele lelei i loto o nei tagata lotomaulalo.—Mataio 13:8.

[Faafanua i le itulau 26]

HA KOME