Le Manatu o le Tusi Paia

O Ai e Taʻua o se Faifeʻau?

I LE pō o le maliu faataulagaina o Iesu, na matuā fefinauaʻi ai lava ana uō mamae. E tusa ma le faamatalaga i le Luka 22:24, sa “latou fefinauai foi po o ai so latou e sili.” Sa lē o se taimi muamua lenei na mapuna aʻe ai sea finauga i aposetolo o Iesu. I le tusa ma le faalua taimi muamua atu, na manaʻomia ai ona faasaʻo e Iesu o latou manatu.

Pagā se faanoanoa ona o lenei pō tāua, sa toe faamanatu atu ai e Iesu lava ia ia i latou pe e faapeʻī moni lava le tulaga e tatau ona iai se faifeʻau Kerisiano. Na ia fetalai atu: “O lē sili ia te outou, ia avea o ia ia pei o le aupito itiiti; o lē pule foi, ia pei o le auauna ia.”—Luka 22:26.

E lē tatau ona tatou ofo ona o le manatu sesē sa i le ʻauaposetolo e uiga i le tāua o le tulaga ma le fia lauiloa. A o leʻi afio mai Iesu, o a latou faaaʻoaʻoga autū i mataupu tau i le taʻitaʻiga faalelotu, na maua lea mai tusiupu ma Faresaio. Na i lo o le tuuina atu i tagata o le taʻitaʻiga faaleagaga ma taʻiala, sa tuuina atu faamalosi e nei faifeʻau pepelo ia uputuu maumaututū ma tulafono ua “pupuni [ai] le malo o le lagi i tagata.” Sa avea i latou o ni tagata sa manatu mamafa i tulaga, sa saʻili i le fia lauiloa, ma manatu faapito, o ē faia a latou galuega “ina ia iloa ai e tagata.”—Mataio 23:4, 5, 13.

Se Ituaiga Fou o Faifeʻau

Ae peitaʻi, na faailoa atu e Iesu i ona soo se manatu fou e uiga i le faiva faaleagaga. Na ia aʻoaʻo atu: “Aua neʻi taʻua outou o rapi; auā e toatasi la outou aʻoaʻo; a o outou uma o le au uso outou. Aua foi neʻi tou taʻua se tasi i le lalolagi o lo outou tamā; auā e toatasi lo outou Tamā, o i le lagi ia. . . . A o lē sili ia te outou e fai lea ma a outou auauna.” (Mataio 23:8-11) E lē tatau i soo o Iesu ona faaaʻoaʻo i taʻitaʻi lotu o o latou aso. Afai e latou te mananaʻo e avea ma faifeʻau moni, e tatau ona latou faataʻitaʻi ia Iesu. O le ā le ituaiga o faaaʻoaʻoga na ia tuua?

E masani ona faaaogā e le Tusi Paia le upu Eleni o le di·aʹko·nos mo “faifeʻau.” Ua faamatalaina i le Encyclopedia of Religion e faapea, o lenei upu ua faasino “e lē o le tulaga ae o le faiā faaleauaunaga a le faifeʻau i lē o loo ia auauna atu i ai: i le mulimuli i le  faaaʻoaʻoga a Keriso . . . o loo i le autū o le malamalamaga faa-Kerisiano e uiga i le faiva.”

I le ōgatasi ma le faamatalaga saʻo o le upu “faifeʻau,” na faia ai e Iesu mea uma e fesoasoani atu ai i isi. Na ia faamatala atu ma le onosai e faapea: “O le Atalii o le tagata e lei sau ia ina ia auauna mai tagata ia te ia, a ia auauna atu ia, ma foaiina atu lona ola e fai ma togiola e sui aʻi tagata e toatele.” (Mataio 20:28) Sa faaaogā ma le lē manatu faapito e Iesu lona taimi, malosi, ma le tomai e fesoasoani ai i isi i le itu faaletino ma le faaleagaga. Aiseā? Ona o lona alofa mutimutivale i le motu o tagata ua tuulafoaʻiina faaleagaga ia na lolofi atu e vaai o ia. Sa ia manaʻo e fesoasoani ia i latou. O le alofa ma le aaomafola na uunaʻia ai lana faiva, ma sa manaʻo o ia ina ia faaali atu e ona soo lea lava uiga aaomafola.—Mataio 9:36.

I lona soifuaga atoa, na faataatia ai e Iesu se faaaʻoaʻo mo isi faifeʻau i le lumanaʻi. Na fetalai o ia e faapea: “E tele le saito e seleseleina, a o le au fai galuega e toaitiiti ia; o lea ia outou aioi atu ai i le Alii e ana le saito e seleseleina, ina ia aauina mai e ia ni e galulue i lana saito e seleseleina.” (Mataio 9:37, 38) Ioe, o faifeʻau a Keriso sa tatau ona avea o ni ē galulue i le galuega aupito sili e leʻi faapea lava ona vaaia muamua i le lalolagi—i le saunia o faamāfanafanaga faaleagaga i tagata uma lava e ala i le talaʻi ma aʻoaʻo atu o le tala lelei o le Malo o le Atua.—Mataio 28:19, 20.

O lenei taulaʻi atu i le foaʻi atu ma i le auauna atu i manaʻoga o isi lea na matuā tutasi ai lava le auala na faia ai le faiva a Iesu. Sa ia aʻoaʻo ana faifeʻau ina ia avea ma tagata faigaluega, o faifaiva faaleagaga, ma o ni leoleo mamoe, ae ia lē o ni tagata e faapea mai e mafai ona fai valovaloga lilo ma o ni tagata popoto i ofu ma teuga faapitoa ma le fia mamalu.—Mataio 4:19; 23:5; Ioane 21:15-17.

Le Manatu o le Tusi Paia

O le mea e faanoanoa ai, a o faagasolo senituri, na mimilosesē ai lenei manatu lē manatu faapito ma le maualuga e uiga i faifeʻau e faapea o i latou o ni tagata talaʻi e faataulagaina totino ma o ni aʻoaʻo. O le mea na avea i le amataga o se faiva faa-Kerisiano na liua e avea ma faalapotopotoga o tulaga aloaʻia faalotu. Sa faavaeina ai ni vaega faalotu, ma ni tulaga, ma faaeaeaina ai i latou i ni tulaga maualuluga ma le pule ma e masani foʻi ona faaputuina le tele o le ʻoa. O le mea lenei na māfua ai le tuueseesea o tagata. Na faatūina ai se vasega o taʻitaʻi lotu lea sa tele lava ina tuuina atu i ai le faia o sakalameta faalotu ma avatu aʻoaʻiga i ē ua faia mea sesē. I senituri mulimuli ane na suia ai le Faa-Kerisiano o le uluaʻi senituri mai se lotu olaola lea sa avea ai tagata uma ma faifeʻau i se lotu ua lē gaoioi ma sa aʻoaʻoina faapitoa ai na o ni nai tagata ma tuuina atu i ai le faatagaga e talaʻi ai ma aʻoaʻo atu.

Ae peitaʻi, ua faailoa mai e le Tusi Paia ia se faifeʻau Kerisiano, e lē ala i ni teuga e faaesea ai, sauniga lavelave faalelotu, se totogi, po ona o se faatagaga mai se malo, ae e ala i lana galuega fitā lē manatu faapito. Na otooto mai e le aposetolo o Paulo lenei uiga e ao ona faaalia e faifeʻau Kerisiano. Sa ia faalaeiauina i latou ina ia aua neʻi faia se mea ma le ‘mitamita fua ae ia faia ma le loto maulalo.’—Filipi 2:3.

E mautinoa lava sa faatino e Paulo mea na ia talaʻia atu. I le mulimulituʻi i le faaaʻoaʻoga a Keriso, e na te leʻi saʻilia ai sona “lava lelei, a o lo le toatele, ina ia faaolaina ai i latou.” Sa malamalama o ia ma lagona fiafia i lona tiute tauave ina ia “avatu le tala lelei ma le le tauia mai,” e pei ona ia fai mai, “ou te le faaaogā le pule ua tatau ia te aʻu i loʻu talaʻi atu.” Sa ia leʻi “saili le viiga mai tagata.”—1 Korinito 9:16-18, LF; 10:33; 1 Tesalonia 2:6.

Maʻeu se faataʻitaʻiga mataʻina o se faifeʻau Kerisiano moni! O i latou e faataʻitaʻi i lana faaaʻoaʻoga aupito sili ona lelei ma savavali i le ala lē manatu faapito na faataatia e Iesu Keriso, i le faaavanoaina atu o i latou, e aunoa ma le manaʻo i se taui, e avatu le fesoasoani faaleagaga ma le faamāfanafanaga o le tala lelei mo isi, ua faaalia i latou lava o faifeʻau moni a le Atua.—1 Peteru 2:21.