“O Le a e Oti!”

UA FAAMATALAINA E LEANNE KARLINSKY

Laʻu saʻiliga mo se togafitiga e aupito sili ona lelei e lē faaaogāina ai le toto e mafai ona maua i Sepania

AFAI e mafai ona e malaga atu i so o se mea o le lalolagi, o fea o le a e filifilia e te alu i ai? Ia te aʻu, sa faigofie lava le tali. Ou te aʻoaʻoa le gagana Sepania i le aʻoga, ma e matou te auai uma lava ma laʻu tane o Jay, ma laʻu tama tama o Joel i le faapotopotoga a Molimau a Ieova e tautala i le gagana Sepania i Galax, i Virginia, i le Iunaite Setete o Amerika. Sa ou moomoo ai lava la ou te fia malaga atu i Sepania. O lea, e mafai la ona e manatu i loʻu fiafia ina ua ofo mai oʻu mātua e la te aveina aʻu iinā! E ui lava ina lē mafai ona ō laʻu tane ma laʻu tama, ae o lea ua toeitiiti lava tau lau o loʻu faamoemoe a o matou ō atu ma oʻu mātua i se malaga tuusaʻo agaʻi i Madrid. I lo matou taunuu atu iinā ia Aperila 21, na matou manatu ai e tietie atu i le taavale i Estella, o se aai laʻitiiti i Navarre, i le itu i mātū o Sepania. Sa ou nofo lelei i le nofoa i tua ma sa vave lava ona ou moe.

O le isi mea ou te manatua, o loʻu taotooto lea i se laufanua, ae o loo susulu mai le lā i oʻu mata. ‘O fea lea ua ou iai? Na faapefea ona ou oo mai iinei? Po o saʻu miti ea?’ A o fetaomi mai nei fesili i loʻu mafaufau, ae amata loa ona tau vavala mai se mea mataʻutia lea ua ou oo iai. Sa iai se mea leaga na tupu ma sa lē na o se miti lenei mea. Sa matuā masaesae ninii lava le lima agavale o loʻu ofu, ma sa lē mafai ona faagaoioi oʻu lima ma oʻu vae. Na ou iloa mulimuli ane, na lavea la matou taavale i se pā uʻamea e puipui ai le auala ma na ou lelea ese ai i fafo mai le taavale a o taavalevale atu i se maulalo e tusa ma le 65 futu (20 mita) i le augutu o se vanu. O le mea e faafetai ai, ona o le leai o se tasi o i matou ma oʻu mātua na manatuaina se mea e uiga i le faalavelave.

Sa ou alaga atu mo se fesoasoani, ma sa nanati mai ia te aʻu se aveloli. Ona ia toe alu ifo lea i lalo i le augutu o le vanu i le mea o iai le taavale, o iinā o loo mau ai oʻu mātua i totonu o le taavale. Na alaga atu le aveloli i le tagata lea na la toʻalua: “Taʻu atu i le taavale laveaʻi e faavave mai! E matuā manunuʻa leaga lava tagata ia e i le taavale!” Ona ia toe foʻi mai lea i le mea lea ou te taoto ai ma ua matuā lē mafai lava ona ou gaoioi, ma i se faanaunauga lelei, sa ia taumafai ai e faasaʻo loʻu vae. Sa ou eʻē i le tigā, o lea na ou iloa ai mo le uluaʻi taimi le matuā leaga o loʻu manuʻa.

E leʻi pine lava ae ou oo atu i le potu mo faalavelave faafuaseʻi i le falemaʻi i Logroño. Sa faafesootaʻia ma le agalelei e leoleo ia Molimau a Ieova i lena vaipanoa e uiga i le mea lea sa ou iai ma le mea na tupu. E leʻi umi lava ae siʻo loʻu moega e le toʻatele o le ʻauuso mai faapotopotoga i Estella ma Logroño, faatasi ma le Komiti o Fesootaʻiga Faafomaʻi o lena lava vaipanoa. O le mea moni, i taimi atoa o oʻu mafatiaga i lenei falemaʻi, o uso Kerisiano pele ou te leʻi feiloaʻi i ai muamua, sa nofosauni ma lotomalilie e feauauaʻi i le tausia o oʻu manaʻoga i le ao atoa ma le po. Sa  latou tausi foʻi ma le alofa i oʻu mātua, o ē na vave ona teʻa i tua mai le falemaʻi ina ua mavae se vaiaso talu ona tupu le faalavelave.

E tusa o le 1:00 i le vaveao o le Aso Lulu, na ō mai ai fomaʻi e faia se taotoga o loʻu suilapalapa na gau. Sa ou fai atu i le fomaʻi ou te lē manaʻo i se toto. * E ui sa faatalatū, ae sa talia e le fomaʻi laʻu talosaga, ae peitaʻi sa ia taʻu mai ia te aʻu atonu o le a ou oti. Sa ou ola pea ina ua uma le taotoga, ae sa ou lagona lava se mea ese ona sa leʻi fufuluina oʻu manuʻa, ma sa leʻi suia foʻi oʻu fusiga.

E oo ane i le Aso Faraile ua paʻū le fua o loʻu toto i le 4.7 (blood count), ma ua tau fai atu foʻi loʻu malosi. Na malie le fomaʻi e faia se isi togafitiga ia te aʻu—o ni tui e taʻua o le erythropoietin (EPO), lea e iai faatasi le uʻamea (iron) ma mea e faatupu ai le toto, e faagaoioia ai le faatuputeleina o sela mūmū o le toto. * O le taimi lea, na taunuu mai ai ia Jay ma Joel. Maʻeu le lelei o le vaai atu i laʻu tane ma laʻu tama!

I le toeitiiti lava tā le ʻafa o le tasi i le vaveao, na taʻu atu ai e le fomaʻi ia Jay e faapea, ua uma ona oo mai i le falemaʻi se poloaʻiga mai le faamasinoga ina ia faaaogā le toto pe afai ua agaʻi ina matuā leaga loʻu tulaga. Na taʻu atu e Jay ia te ia e faapea, o loʻu manaʻoga, ia aua neʻi tuiina mai se toto i so o se tulaga lava. Ona tali mai lea o le fomaʻi: “Ia, o le a oti la o ia!”

Na talanoa atu Jay i le Komiti o Fesootaʻiga Faafomaʻi e uiga i le aveina atu o aʻu i se isi falemaʻi—se falemaʻi e talia ai oʻu manaʻoga. E lē faapea o tagata uma i lenei falemaʻi sa iai ni manatu tetee. O se faaaʻoaʻoga, na faamautinoa mai e se tasi tamaʻitaʻi fomaʻi e faapea o le a ia faia le mea aupito sili e faamautinoa ai ua togafitia aʻu e tusa ai ma le faaaloalo uma e tatau ai. Ae sa leʻi pine lava ae uunaʻi malosi aʻu e isi fomaʻi. Na latou fesili mai: “E te manaʻo e te oti ma tuua ai lou aiga?” Sa ou faamautinoa atu ia i latou e faapea, ou te manaʻo i togafitiga aupito sili ona lelei e mafai ona maua e aunoa ma le faaaogāina o le toto. Sa leʻi gaoioi lava fomaʻi e fai se fesoasoani. Sa na ona fai sosoʻa mai lava se tasi fomaʻi: “O le a e oti!”

Na maua e le Komiti o Fesootaʻiga Faafomaʻi se falemaʻi i Barcelona e malilie e togafitia aʻu e aunoa ma le faaaogāina o le toto. Maʻeu se eseesega o nei falemaʻi e lua! I Barcelona, na faataele lelei ai aʻu e ni teine tausimaʻi se toʻalua ma faia aʻu i se auala na oʻu toʻafilemu ai. Ina ua suia oʻu fusiga, na iloa ai e se tasi o tamaʻitaʻi tausimaʻi ua lanumeamata ma ua ufitia i le toto ua mago. Na ia faapea mai, ua masiasi lava o ia ona o le leaga o le auala na faia ai aʻu e tagata o lona atunuu.

Sa vave lava ona ou maua ia togafitia faafomaʻi ia sa tatau ona faia ia te aʻu i le taimi muamua i le falemaʻi i Logroño. Sa ofoofogia lava ia iʻuga o togafitiga. I ni nai aso, na faaleleia ai oʻu totoga sili ona tāua, ma ua oo i le 7.3 le fua o le hemoglobin i loʻu toto. E oo ane i le taimi na ou teʻa ai ma le falemaʻi ua oo i le 10.7. Ina ua ou toe manaʻomia nisi o taotoga i le falemaʻi i le Iunaite Setete, ae ua oo i le 11.9.

Ou te matuā faafetai ona o taumafaiga a fomaʻi ma tamaʻitaʻi tausimaʻi o ē e lotomalilie e amanaʻia manaʻoga o a latou tagata mamaʻi, e tusa lava pe latou te ioeina pe leai. Pe a faaaloalogia e le ʻaufaigaluega a le falemaʻi talitonuga o le tagata maʻi, e tusa lava ua latou togafitia le tino atoa—ma i lea ua latou saunia ai le togafitiga aupito sili ona lelei e mafai ona maua.

[Faaopoopoga i lalo]

[Ata i le itulau 12]

I matou ma laʻu tane ma laʻu tama

[Ata i le itulau 13]

Sui e toʻalua o le Komiti o Fesootaʻiga Faafomaʻi