Pe a Alu le Faiga Mālōlōga a Povi!

TUSIA E LE SUI O LE ALA MAI! I SUISILANI

PE NA e silafia ea e faitau afe povi i Suisilani e ō mo sa latou faiga mālōlōga i tausaga taʻitasi? Maʻimau pe ana seʻi e tagaʻi i le fiafia tele o nei manu i a latou faiga mālōlōga!

A o faagasolo masina o le tau mālūlū ma le kiona i Suisilani, e faamalumalu ai nai povi taususu i totonu o falepovi. Maʻeu se mapusaga fiafia pe a oo mai le tau e totogo ai mea, ua mafai ai e povi ona ō atu i fafo ma ʻaiʻai solo i le mutia lanumeamata o loo ola solo ai tamaʻi laau e sasama malosi o latou fuga. E fai lava ma tuutaoso i luga, e foliga mai o se faailoga o lo latou matuā olioli i le suiga o le nofoaga ma le tau lea ua iai.

E oo atu ia Me po o le amatamataga o Iuni, ua iai ma isi laufanua lafulemu pe a oo ina liusuavai le kiona ma aliali aʻe ai le mutia i nofoaga maualuluga. Ua oo nei i le taimi e tafafao ai povi i atumauga mo le tau māfanafana.

O Laufanua Lafulemu ua Faasūsūina Lelei

I Suisilani, e tusa ma le 10,000 laufanua lafulemu o loo iai i nofoaga maualuluga, ma ua ufitia uma ai le tusa ma le 4,000 maila faatafafā [10,000 kilomita faatafafā] o le laufanua. E tusa lena o le tasi kuata o le telē o le fanua atoa o le atunuu. O lea, e matuā fai ai gaoioiga sili mo le puipuia o lenei alamanuia tāua.

E galulue faatasi tagata ma manu ina ia kilia uma ese laau lavelave ma laau tuitui mai le laufanua i nofoaga maualuluga. Mo lea fuafuaga, ua tuu atu ai e le ʻaufaifaatoʻaga le tusa ma le 500,000 povi e tausia e ni failafupovi ua iai o latou tomai faapitoa i lea matātā. E ō atu loli po o nofoaafi e laʻu povi taususu ma tamaʻipovi mo se faiga mālōlōga o le tau māfanafana ina ia faatataa i atumauga.

Talu ai e lē tau lelei i luga auala taavale ma auala nofoaafi, e faaoo ai la lenei faigamalaga i le savavali. A o faasolo pea masina o le tau māfanafana e faapena foʻi ona agaʻigaʻi atu pea lafupovi i vaega pito i luga. O nisi taimi iinā i laufanua lafulemu e i le vā o le 6,000 ma le 7,000 futu [2,000 ma le 2,200 mita] lo latou maualuluga mai le fogatai, e maua ai e povi se vao e ola i atumauga e suamalie lona tofo, ma fugalaau felanulanuaʻi matagofie. E tele le suāvai e maua mai punāvai o atumauga, e lē taitai ai la oo i se tulaga utiuti le suāvai.

I nisi taimi, e laʻu ifo ai i lalo le suāsusu lelei lea e maua mai povi, mo le fofoga taumafa pe faaaogā foʻi mo nisi mea. Ae o le tele lava o taimi, e faaaogā ai lava iinā i fale o loo iai i atumauga mo le faiga o le pata po o le sisi. A o faasolo ina pupuu aso o le tau māfanafana, ona toe taʻitaʻi ifo foʻi lea o lafupovi i laufanua maualalalo. Ona oo mai loa lea o le aso—e fuafua lava i le tau, ae masani lava e latalata i le faaiʻuga o Setema—e toe tataʻi uma atu ai lafupovi i o latou falepovi e tuu ai mo le tau mālūlū. Ioe, ua toeitiiti nei uma la latou faiga mālōlōga o le tau māfanafana! Ae muamua lava, e iai se savali faapitoa e fai.

Le Aso Tele!

E fai uma faamaumauga o le suāsusu e maua mai povi, ma o povi e sili ona lelei o le a teuteuina e tusa ai o le aofaʻiga o le suāsusu na mafai ona maua mai ai. O le povi na tele le suāsusu e maua mai ai, o le povi lena e taʻitaʻia maia le solo e agaʻi mai i le aai. E teuteu uma ulu o povi i fugalaau pepa felanulanuaʻi, o lipine, ma lālā o tamaʻi laau launinii. E tele povi e tautau se tamaʻi logo uʻamea i o latou ua, e faasilasila mai ai lo latou toʻai taunuu mai.

E faailoga e le ʻaufailafumanu lenei aso faapitoa e ala i lo latou laʻei uma i ofutino papaʻe ma o latou faapelaue veloveta uli ua matuā teuteuina faamatagofie. I lena lava taimi, i lalo i vanu, e faapotopoto uma ane ai tagata faifaatoʻaga ina ia latou faaitualalua ma patipati atu a o agaʻi mai le solo.

Pe a taunuu ane i lalo, ona toe taʻitaʻi atu lea o povi ia i latou moni e ana, e tausi ai iinā mo le isi foʻi tau mālūlū. Peitaʻi, e lē umi lava, ae toe oo foʻi i le isi taimi mo faiga mālōlōga i atumauga! Oka se olaga ina a manaia!