Ausiaina o Faamoemoega Maualuluga

O LE uiga lelei faava-o-malo, le faatasiga o uso, le filemu—o ai sē o le a lē viiviia na faamoemoega maualuluga e sili ona matagofie? Sa talitonu lē na ia toe lāgā maia le Olimipeka, o Baron Pierre de Coubertin e faapea, o le a mafai e taaloga ona tineia fevesiaʻiga i le vā o atunuu e ala i le uunaʻia o le faaaloalo sili mo tagata e tauvā i taaloga e tusa lava po o le ā lo latou lanu, o lotu, po o le ituaiga. Sa ia lagona faapea “o se lalolagi e sili atu ona lelei e faatoʻā mafai ona maua pe a iai ni tagata e sili atu ona lelei.” Ae pe mafai moni ea e taaloga ona aumaia se lalolagi filemu? Pe a fua atu i lo latou talaaga ua tuanaʻi, o le a tatou tali atu ai e leai.

E moni e iai le itu e lelei ai taaloga, ae o le aʻoaʻoina mai le Tusi Paia, o le ki lea i le uunaʻia atili o le filemu moni. O le mea moni, e mafai e mataupu  silisili o le Tusi Paia ona fua mai ai ni “tagata e sili atu ona lelei,” e pei ona taʻua ai e Coubertin. Seʻi manatu i nisi o mau o loo uunaʻia atili ai le filemu i tagata o ē faatatauina, e tusa lava po o le ā lo latou atunuu.

“O le mea lea e iloa ai e tagata uma lava o oʻu soo outou, pe afai ua outou fealofani.”—Ioane 13:35.

“Afai e mafaia ia te outou, ia outou nofo lelei ma tagata uma lava.”—Roma 12:18.

“Ia tatou agalelei, ia faatatau i mea e tutupu i lea aso ma lea aso, i tagata uma lava.”—Kalatia 6:10.

“Aua neʻi faia se mea e tasi ma le finau vale, ma le mitamita fua; a ia taitasi outou ma manatu ma le loto maulalo, ua sili nisi ia te ia.”—Filipi 2:3, LF.

“E itiiti le aoga o le faamasani i la le tino; a o le amio Atua e aoga lea i mea uma lava, o loo i ai le mea ua folafolaina mai i la le olaga nei atoa ma lē atali.”—1 Timoteo 4:8, LT.

Pe aogā moni ea faamoemoega maualuluga ua folasia atu i nei mau? Seʻi manatu i le mea na tupu i Munich, i Siamani. I le 1974, i le na o le lua tausaga talu ona mavae Taaloga o le Olimipeka sa faia i lena aai lea na iloga ai le faaleagaina e faiga faatupu faalavelave ma fasiotiga tagata, sa faia ai e Molimau a Ieova sa latou tauaofiaga faava-o-atunuu i le Faletaalo o le Olimipeka. Sa faatasi ai i le aofia, vaega o tagata mai Eleni ma Take—o atunuu sa fetauaʻi. O le mea moni, i lena lava tau māfanafana, sa fetauaʻi ai fitafita Eleni ma fitafita Take e māfua i le motu o Kuperu. Pe sa ono aafia ai i lenei taua Kerisiano o ē na auai atu i le tauaofiaga? E leai! Maʻeu se ootia o loto o ē na vaavaai atu a o feofoofoaʻi tagata Eleni ma tagata Take ma latou taʻua le tasi ma le isi, o le uso ma le tuafafine!

Ua lauiloa Molimau a Ieova i le lalolagi aoao mo le ausiaina o faiā filemu lea ua foʻia ai po o ā lava eseesega i le vā o atunuu, o ituaiga, ma tupuaga. O le mea moni, latou te lē o faapea mai ua latou ausia atoatoa le faamoemoega maualuga o le iai o le autasi ma le felagolagomaʻi i le lalolagi aoao. I le pei o isi tagata uma, e tatau ona latou taumafai malosi e usitaia le fautuaga a le aposetolo Kerisiano o Paulo e faapea: ‘Ia toese e outou le tagata tuai atoa ma ana amio, a ia outou oofu i le tagata fou.’ (Kolose 3:9, 10) E ui lava i lea, e malosi lo latou talitonuga faapea o le usitaia o mataupu silisili o le Tusi Paia e mafai ona fesoasoani i tagata ina ia latou “saili i le filemu ma tausisi i ai.”—1 Peteru 3:11.

E faanoanoa lava, ona o Taaloga o le Olimipeka—e ui i o latou faamoemoega maualuluga—lea e puna mai ai uiga sili ona leaga i le toʻatele o tagata. Ae i se faaeseesega, ua aumaia e le Afioga mamana a le Atua le mea e sili ona lelei i tagata, o le uunaʻia atili o uiga lelei ma le filemu faava-o-atunuu.

[Ata i le itulau 8]

E uunaʻia atili e Taaloga o le Olimipeka tauvāga

[Ē Ana le Ata]

Aus dem Fundus der MÜNCHNER OLYMPIAPARK GMBH, München

[Ata i le itulau 9]

E uunaʻia atili e le Tusi Paia le filemu