Ina Ua Taumafai Le  Mauga e Sosoo Atu i le Sami

TUSIA E LE SUI O LE ALA MAI! I VENESUELA

I LE vā o Caracas, le aai laumua o Venesuela, ma le sami o loo iai se mauga e 7,000 futu [2,000 mita] e igoa o le El Ávila. I le itu i mātū o le mauga o loo iai se laufanua umī ae vāiti lava ma anoanoaʻi tagata e ʻaināina, i le talafatai o le atunuu. O iinā e iai le malae vaalele tele o Venesuela, ma ina ia ō ese mai le malae vaalele e agaʻi atu i Caracas, e tatau ai i turisi ona latou ui atu i se ala e eli atu i lalo o le mauga.

Ina ua uma lologa o timuga ia Tesema 1999, na matuā lē toe mafai ai e le El Ávila ona talitalia le tele o le vai ua iai. Na foliga mai ua pāpā uma ona autafa a o tatafe ese mai le mauga le faitau miliona o kupita o vai. Na faaupuina e se isi tagata faapea, e foliga mai sa taumafai le mauga e sosoo atu i le sami. O fale—mai tamaʻi fale e oo atu lava i fale tetele o le ʻaumaumea—sa palagaʻi uma atu i ai tafega o vai, o palapala, o ʻalā tetele ma laau. O moega, pusaʻaisa, televise, e oo lava i tagata, ua tafefea faatasi atu ai. Na taʻua e se tasi tamā matua o lona lava manatu o le iʻuga lea o le lalolagi ua oo mai.

Mulimuli ane, na laofie, ma sa tau manifi ifo ai tafega o vai. E tusa ai ma se tasi fua faatatau, e tusa ma le 50,000 tagata atonu na maliliu, ma le 400,000 na leai ni fale e nonofo ai. O māfuaaga na ua taʻua ai lenei mea o “le mala faalenatura sili ona mataʻutia i le talafaasolopito o Venesuela.”

Toetoe Lava a Lē Sao Mai

Ia Tesema 15, na poloka ai le taavale a Juan Carlos Lorenzo ma lona tamā i le vā o ni vaitafe se lua ua pāpā. Na la tiaʻi ai iinā le la taavale ae faatasi atu i le toʻa 35 o tagata sa iai i totonu o se fale. Peitaʻi, e leʻi umi lava, ae amata ona tatafe ifo le vai i totonu o le fale ma na vave lava ona loloto. Na mafai e tagata uma ona feʻaʻei i luga i le taualuga. O le taimi lena, sa amata ona taomia mai le fale i ʻalā tetele ma ogalaau. E leʻi umi, ae solofa ifo i lalo puipui o le fogafale i lalo ma le fogafale lua, ma na totoe ai nei na o pou ma le taualuga. Sa felueaʻi solo vaega o le fale lea o loo tutū pea ae ua vaivai foʻi, a o faaauau pea ona talepe mai.

Na sau se helikopa, peitaʻi sa lē mafai ona sesee i luga o le fale lea ua lē o toe mau lelei. A o toe liliu ese le helikopa,  sa fefaatofaaʻi ma loimata Juan Carlos ma lona tamā, i lo la talitonuga o le iʻuga lava lea o i laʻua. Ae teʻi ua taunuu ane loa isi helikopa e lua. Na taʻi tasitasi ona tasisi aʻe i luga i latou uma sa i le taualuga o le fale ma sa laveai ai, a o faafeleleleleaʻi ma le tomai e pailate a la helikopa i luga aʻe. O le taimi lava na ō ese atu ai helikopa, ae malepe ifo loa ma le fale i tafega o vai. Na toeitiiti lava a lē sao ese atu!

E faitau afe tagata na aveesea faatopetope—i tamaʻi vaalele, i taavale, ma vaa a le vaegaʻau sa mafai ona tuta i matafaga. O solo uumi o tagata—o nisi sa faatiʻetiʻe a latou fanau i o latou tauʻau⁠—na taʻitaʻia uma atu i le matafaga ma faaoo atu i vaa e ala i le toso o maea e fepiiti i ai. E iai nisi na mafai ona latou aveina ni nai meatotino, peitaʻi o le toʻatele e na o le mea lava na pipii i le paʻu na mafai ona latou aveina.

Gaoioiga Laveaʻi

O le ofisa o le lālā a Molimau a Ieova i Venesuela na amata ai gaoioiga laveaʻi i le taimi lava na maua ai le tala e uiga i le mala. Ae peitaʻi, sa poloka auala i laau paʻūʻū ma isi lava mea na gaogaosā solo ai, a o isi auala na matuā tafia lava e le vai. Ina ua mavae ni nai aso, ona toe tatala lea na o se vaega e tasi o le auala autū mo le feoaʻiga i ni mea faanatinati, ma mafai ai loa e taavale a Molimau ona laʻu atu sapalai o vailaau faafomaʻi atoa ai ma tagata sa agavaa e faia togafitiga faafomaʻi. Na faapea mai mulimuli ane se alii ofisa: “Ua iloa lelei lava e le malo e aofia Molimau a Ieova ia i latou o ē muamua taunuu atu ma ni fesoasoani ma aveesea tagata mai le nofoaga o loo tupu ai le mala.”

Sa faamaopoopoina e Molimau ni vaega e saʻiliʻilia i latou o loo manaʻomia se fesoasoani. Sa faatulaga taavale e ave ai i Caracas i latou ua aveesea mai o latou fale, ma e toʻatele lava sa ō atu e augapiu ma se mea e tagolima i ai. Na iai ni nofoaga sa faatulaga solo i le aai sa mafai ona tufatufa atu ai taumafa, o lavalava, ma vailaau faafomaʻi i tagata na latou manaʻomia. Peitaʻi o le toʻatele o i latou sa manaʻomia ni mea e sili atu na i lo taumafa ma lavalava. Sa latou matuā manaʻomia lava se fale e nonofo ai. Ma sa fiafia o latou uso Kerisiano e talia ina ia nonofo i o latou aiga.

Ua leva lava ona mavae atu le mala, ae na iai lava nisi tagata sa faaauau pea ona latou talia o latou tauaiga faapea foʻi o latou uso ma tuafāfine ina ia nonofo faatasi mai latou. O Joel ma Elsa, o ni Molimau i Puerto Cabello, e nonofo i se tamaʻi falemautotogi. E atoa lelei le masina talu ona uma lologa, ae o loo nonofo pea ia i laʻua ni tagata se toʻa 16. E toʻatele na lē gata ina lē toe iai ni o latou fale ae ua lē toe iai foʻi ni a latou galuega. Sa malelepe atu ai foʻi ma o latou fale faigaluega.

O le itu e faanoanoa ai, ona o vaipanoa sa avea muamua ma nofoaga e tumutumu ai tagata mo faiga mālōlōga ma taulaga e iai uafu o vaa, na toetoe lava a lē toe mātaulia. O nisi taavale sa magoto ifo i le palapala, a o isi na fetoaʻi ma pā simā, tāʻaiʻai i ni pou, pe maulu i totonu o faitotoʻa po o faamalama o fale. O se ogapalapala ua toʻa ma malō—e oo le mafiafia i le iva futu [3 mita] i nisi nofoaga—na faapogai ai ona maualuluga nisi auala ma afai e savali ai se tagata, sa sagatonu lelei atu lana vaai i se fogafalealuga po o taualuga o fale na te pāsia!

Na taʻua e nisi tagata i Venesuela faapea na avea le mala ma itu na latou aʻoaʻoina ai se lesona tāua—ia latou lē faatuatua atu i meafaitino. (Luka 12:29-31) E toʻatele nisi na latou talisapaia le fautuaga a Iesu Keriso e faapea: “Aua tou te toloʻaʻi oa mo outou i le lalolagi, o i ai le mogamoga ma le ele e faaumatia ai; o i ai foi tagata gaoi e eli atu, ma gaoi ai. A ia outou toloʻaʻi oa mo outou i le lagi, e le o i ai se mogamoga, po o se ele e faaumatia ai; e le o i ai foi tagata gaoi e eli atu, ma gaoi ai. Auā o le mea ua i ai lo outou oa, e i ai atoa foi ma o outou loto.”—Mataio 6:19-21.

[Faafanua/Ata i le itulau 16, 17]

(Tagaʻi i le lomiga mo le ata atoa)

VENESUELA

Caracas

Nofoaga na tupu ai le mala

KOLOMEPIA

[Ata i le itulau 17]

O Rubén Serrano, ma mea na totoe mai o lona fale

 [Ata i le itulau 18]

1. Sa aoaoina e le ʻautauofo sapalai o fesoasoani laveaʻi i Caracas

2, 3. Na sua ese e le Faapotopotoga a Maiquetía palapala malō ua toʻa, e tusa ma le fitu futu le mafiafia mai lo latou Maota o le Malo

4. O nei Molimau sa tafiesea o latou fale ae na tauofo latou te fausia ni fale fou mo i latou faapea foʻi ma isi

5. O se tasi o fale mai fale fou ua toeitiiti māeʻa ona fausia i San Sebastián de los Reyes