Na Fesoasoani e Faasaoina Lona Ola

O le lomiga o Tesema 22, 1999 o le “Awake!” sa faatomua ai le mataupu “Ave Faamalosia—Le Māfuaaga ua Avea ai o se Taufaamataʻu i le Lalolagi Aoao” pei ona tusia i le faavaa. Na faapea mai William Louis Terrell o lenei lomiga o le “Awake!” na fesoasoani e faasaoina lona ola.

E LEʻI leva lava ona teʻa le sefulu i le taeao o le Aso Faraile, Mati 10, 2000, ae faasiilima loa i se fana ma ave faamalosia ia Terrell mai lona fale e Joseph C. Palczynski, Jr. O mataupu i le Awake! lea na taʻua e Terrell sa ia faaauau pea ona manatuaina a o fesagaʻi ma lenei tulaga mataʻutia, o loo i ai fautuaga ia o loo mulimuli mai na saunia e ni tagata popoto i le mea e ao ona fai pe a ave faamalosia:

“Ia felagolagomaʻi; ʻalofia le lotomaaa. O tagata e ave faapagota ae iai se uiga faafinau e masani lava ona matuā faasaunoa i ai, ma e oo ai i latou i se tulaga e sili atu ona lamatia i le fasiotia po o le filifilia foʻi ina ia faasauāina.

“Aua le fefevale. Ia teu i mafaufau o le toʻatele lava o tagata e ave faamalosia e toe faasaoina mai.”

“Ia faaaofia oe i ni talanoaga pupuu pe afai e mafai ai ma taumafai e amata se fesootaʻiga. Afai e vaai atu i latou o loo ave faamalosia tagata o oe foʻi o le isi tagata, e foliga mai la e lē ono faaoo atu ni manuʻaga po o le fasiotia o oe.

“Ia faailoa atu ou manaʻoga i [tagata o loo ave faamalosia oe] i se auala faaaloalo.”

“O fesootaʻiga ua avea o se puipuiga i le tagata o loo ave faamalosia, e pei ona faamatala mai e le tusi Criminal Behavior e faapea: ‘O le tele o le iloaina e le tagata ua ave faamalosia o le tagata o aveina o ia, o le tele foʻi lena o le fiafia o le tasi i le isi. O lenei tulaga uigaese e faailoa mai ai faapea pe a mavae se taimi o le a faaitiitia ai se manatu o lē o loo sesē ina ia faamanuʻalia le tagata na ave faapagota.’”

Sa faia e William Terrell, o lē ua 53 tausaga lona matua ma o se tasi o Molimau a Ieova, le mea silisili na te mafaia e mulimuli ai i na fautuaga mo le toetoe lava 14 itula sa taofia faapagota ai o ia, o le tele lava o taimi e tuuina atu ai le gutu o le fana ia te ia. Na amata nei faiga mataʻutia ina ua faatoʻā uma lava ona tuʻituʻi atu Palczynski i le faitotoʻa o le fale o Terrell i se nuu maotua e latalata i le Interstate Highway 95, ina ua leai se penisini o le taavale na gaoia e Palczynski e alu ai.

Ina ua māeʻa ona faalogo atu i mafatiaga o lenei  tagata ese, na faailoa atu ai loa e Terrell lona faanaunauga e fia fesoasoani ia te ia. Na talosaga atu Palczynski mo se ipu vai ma se auala e malaga atu ai i Baltimore, i Maryland, i le Iunaite Setete o Amerika. Na tali atu Terrell faapea o le a ia faia se fuafuaga mo se tasi na te momolia o ia i le aai o Fredericksburg, i Virginia, lea e mafai ona puʻe ai sana pasi e faaauau ai lana malaga. Ina ua toe liliu mai Terrell ma le ipu vai mo lenei tagata ese, ae ua faafaasaga atu le fana ia te ia. Na faatonuina e Palczynski ia Terrell ina ia ave o ia i le mea o loo fia alu i ai.

Mulimuli i Fautuaga

A o faigamalaga atu i le Interstate 95, sa mulimuli pea Terrell i taʻiala a Palczynski ina ia aua neʻi soona faasaoasaoaina le taavale ma aua lava neʻi taumafai e ave i se auala o le a ono uaʻi mai ai nisi ia i laʻua. Sa tumau pea le toʻafilemu o Terrell ma talanoa atu ai pea ia Palczynski o lē ua 31 tausaga le matua, sa ia faaalia atu le naunau moni ia te ia o se tagata ma i le tulaga na māfua ai ona la feiloaʻi. Na taʻua e Palczynski faapea i le lona tolu o aso ua mavae sa ia alu atu ai e vaai lana uō teine o Tracy, o lē ua la lē toe feoaʻi. Iinā na ia tafanaina ai ni uō se toʻalua a Tracy ma maliliu ai faatasi ma se tuaoi na oso ane e taofi lona aveina o Tracy. Ae mulimuli ane na sola ese Tracy.

I le afiafi na sosoo ai, a o taumafai Palczynski e ave faamalosia se taavale, na lavea ai se tamaitiiti e lua tausaga le matua i se tasi o ana pulufana, ma malepe ai lona auvae. Na lavea foʻi i ni pulufana le taavale na aveina mai e Jennifer Lyn McDonel. O le mea e faanoanoa ai, na lavea o ia i se pulu ma maliu ai, ma o le isi pulu na lavea ai le nofoa pepe a le la tama e tasi tausaga le matua, ae sa leʻi faaaogāina. O Jennifer ma lana tane, o Thomas, sa agaʻi atu i le Maota o le Malo a Molimau a Ieova, lea sa fuafua la te taulimaina ai ni vaega i le latou sauniga i lena afiafi. Na faamatala mai e Sarah Francis, o le tinā o Jennifer e faapea: “Ua pau lava lena o le pō ua la lē aveina ai le pepe i le Maota o le Malo. [Ana leai] semanū e toʻalua matou te faanoanoa ai.”

A o faaauau pea ona talanoa lemu atu Terrell i lē o loo ave faamalosia o ia, na faapea ane ai Palczynski sa leʻi mafaufau lava e faaoo ni manuʻa i se tasi ma e alofa foʻi ia Tracy ma sa manaʻo ina ia nonofo pea ma ia. Na faamatala mai e Terrell: “Na ou taʻu atu ia te ia na te lē mafai ona suia mea ua tuanaʻi ae na te mafaia ona suia le lumanaʻi, ma na ou faalaeiauina o ia ina ia lipotia o ia i le malo. Na ou taʻu atu ia te ia o le a ou asiasi atu ia te ia i le falepuipui ma suʻesuʻeina le Tusi Paia faatasi ma ia.” Mulimuli ane na lipotia mai ai faapea ina ua faaiʻuina ana aʻoaʻoga i le aʻoga maualuga i le 1987, na faaaluina ai e Palczynski le toetoe lava o lona olaga atoa a lē i le falepuipui po o le nofoaga mo tagata e aafia mafaufau po o le nofo vaavaaia, ma sa na o le sefulu masina mai lena vaitaimi sa lē aafia ai i se tulaga faapena.

I le faaaogāina o lona poto masani o se toeaina Kerisiano ua loa, na faaauau ai pea ona ʻaiʻoi atu Terrell i le tama talavou ua atuatuvale e ala i le faaaogāina o ni faaaʻoaʻoga moni i le olaga o nisi mai le Tusi Paia. Mo se faaaʻoaʻoga, na ia taʻu atu le tala e uiga i se tamāloa lelei, le tupu o Isaraelu o Tavita, o lē na mafaufau tele i le avā a Uria, o se tasi o fitafita i lana ʻautau. Ina ua maʻitō le fafine ia Tavita, na faia e Tavita ni feuiuiaʻiga ina ia oti Uria i le taua. Ina ua faailoa atu ma le faautauta ia Tavita ana agasala, na ia faaalia le salamō moni ma toe maua ai le finagalo malie o le Atua.—2 Samuelu 11:2–12:14.

Na ati aʻe e Terrell se faiā lelei ma lenei tagata fesolasolataʻi, e ala i le fai i ai e valaau o ia i lona igoa fai o Joby. Ina ua tū i se faleoloa ma ua alu atu Terrell e faatau mai ni meaʻai ma se televise e mafai ona feaveaʻi, na fai atu Palczynski o le a ia fasiotia nisi tagata pe afai na te taumafai e lapataʻia so o se tasi. I le iloaina o le tulaga fememeaʻi o le tagata fesolasolataʻi, na usitai ai Terrell. Mulimuli ane, ina ua māeʻa ona la matamata i se faasalalauga o solitulafono a Palczynski i tala fou i le 11, na fusi e Palczynski ia Terrell ona ia sola lemu ese lea ma agaʻi atu i se pitonuu i Baltimore.

Pe tusa o se vaiaso mulimuli ane ai, na maua taitaia ai lava Palczynski i se fale lea o loo ia taofia faamalosi ai nisi o tagata. Na talosagaina Terrell, lea sa talanoa atu i ai le tagata fesolasolataʻi ina ia fesoasoani atu i feutagaʻiga sa faia. O le mea e leaga ai, e leʻi manuia na taumafaiga, ma ia Mati 22, na fanaina ai Palczynski e leoleo na osofaʻia le fale ma oti ai. E leai ma se isi na āfaina.

Ina ua mavae lena na aumai ai e Terrell ni kopi se 600 o le lomiga o le Awake! lea na ia taʻuleleia ona sa fesoasoani e faasaoina lona ola. Na ia tufaina atu le faitau selau o nei kopi i isi. E lotofaafetai Terrell ona sa fai ma ana masani le faitauina o faamatalaga aogā o loo i le Awake!, ma matou te lagona o le a faapena foʻi oe.

[Ata i le itulau 24]

William Terrell