O Faafitauli o Tamaiti Ua Oo Mai le Vaifofō!

SEʻI manatu i se lalolagi lea e manaʻomia moni ai lava tamaiti uma, e alofagia moni ai, ma faamanuiaina i le iai o ni mātua alolofa e tausia, e iai se faanaunauga moni e avatu le taʻitaʻiga ma taʻiala e aupito sili ona lelei mo a latou fanau. Seʻi manatu i se lalolagi lea e mālōlōina lelei ai faaletino ma faalemafaufau tamaiti uma taʻitoʻatasi, lea o le a lē toe maua ai ni tamaiti e nonofo solo i le auala, ma lē toe fāoa ai le fiafiaga saʻoloto faatamaiti e ala i le faafaigaluegaina o i latou ona o manaʻoga tau tamaoaiga!

Pe e manaʻomia? O le mea moni lena. Pe talitonuina? O le manatu lena i ai o Molimau a Ieova, ma e lua māfuaaga ua talitonuina ai.

E Mafai Ona Saunia e Mātua se Vaega o le Vaifofō

E lē taumatea e te ioe faapea o tagata ua matutua, o loo iai le malosi e foʻia ai—i nisi o taimi e oo lava i le puipuia o le tutupu—o nisi o faafitauli i tamaiti. Ioe, e mafai ona fai pe afai e lotomalilie i latou ua matutua e faia faapea. Ioe, o loo i mātua lava latou, se tasi o ki mo le foʻiaina o le faafitauli.

 Mo se faataʻitaʻiga, o tagata matutua o loo mafai ona mulimuli atu i fautuaga a le Tusi Paia e faapea “aua le teʻa ese le avā i lana tane, . . . aua foi le faateʻaeseina e le tane o lana avā” e lē o pagatia a latou fanau ona o le ola i se aiga ua taapeape ona o teteʻaga po o talaga faaipoipoga.—1 Korinito 7:10, 11, LF.

O tagata matutua o loo lotomalilie e mulimuli atu i fautuaga a le Tusi Paia ia “savavali ma le matagofie . . . aua le poula ma le onā,” e lē o pagatia a latou fanau i puapuaga ia e oo i fanau e onanā ma pulea e fualaau faasāina o latou mātua.—Roma 13:13; Efeso 5:18.

O tagata ua matutua o loo lotomalilie e mulimuli atu i le fautuaga a le Tusi Paia “ia faamamao . . . ma le faitaaga” o loo fesoasoani e faaitiitia le lamatiaga o a latou fanau i le ola aʻe e avea ma tamaiti e lē o manaʻomia, lea e ono tupu i aiga e toʻatasi le matua.—1 Tesalonia 4:3; Mataio 19:9.

O tagata ua matutua o loo lotomalilie e mulimuli atu i fautuaga a le Tusi Paia, “Aua neʻi faaita i a outou fanau, ina neʻi faapalapala i latou,” ma i latou e “alofa atu i a latou fanau” o le a lē oo i a latou fanau le tigā o so o se faataumaʻoia i le tino po o le mafaufau.—Kolose 3:21; Tito 2:4.

I lona aotelega, afai e lotomalilie uma tagata ua matutua e mulimuli atu i le fautuaga a le Tusi Paia na tuuina mai e Iesu, “O mea uma foi tou te loto i ai ia faia e tagata ia te outou, ia faapea lava ona outou faia ia te i latou,” po o le a iai ea la le faitau miliona o tamaiti e lē o manaʻomia ma e lē alofagia?—Mataio 7:12.

O le mea e fiafia ai, ona e toʻatele tagata ua matutua e lotomalilie e faia mea uma e pei ona taʻua i luga. Ae, e faanoanoa e faapea atu, e lē o tagata uma ua matutua e malilie e faia faapea, ma o iinā tonu lava o loo taatia ai le faafitauli. Ma e oo foʻi ia i latou e lotomalilie, ua iloaina e faapea o a latou taumafaiga e masani lava ona lē taulau ona o le lē lelei atoatoa faaletagata, ma mea e lē o mafai ona puleaina e lo latou malosi. E mafai ona saunia e tagata se vaega o le vaifofō i faafitauli o tamaiti, ae e manino lo latou lē mafaia ona saunia le vaifofō atoatoa.

Le Malo Tauatua e Saunia le Vaifofō Atoatoa

Sa talitonu maumauaʻi le tusitala o John Ruskin, lea na taʻua i le mataupu na muamua atu e faapea “o le tiute muamua lava o se Malo, o le faamautinoaina lea o tamaiti uma lava taʻitoʻatasi e fananau mai, e tatau ona talafeagai se fale e nofo ai, lavalava e faaaogā, le fafagaina, ma le aʻoaʻoina, seʻia oo atu i o latou tausaga ua mafai ai ona faia a latou lava filifiliga.” Peitaʻi, na taʻutino e Ruskin e faapea, ina “ia [faataunuuina] lenei mea e tatau ona iai se pulega Faalemalo e pulea tagata, lea e tatou te lē o iloa po o le a faapefea ona tupu lena mea.”

E na o se malo e iai sona lagolagosua tauatua e mafai ona iai se pulega alofa lea na tautala i ai Ruskin. O lea, o se malo e faapena uma lava, lea na folafolaina mai—le malo lea na taʻua e Iesu i le Mataio 6:9, 10. O le taimi lava e pulea atoatoa ai e le malo o le Atua mataupu fai a le lalolagi, o le a ia tauaaoina loa lana pulega i luga o tagata uma—fale, lavalava, fafagaina, ma le aʻoaʻoina o ona tagatanuu uma e aofia ai ma tamaiti. (Isaia 65:17-25) Ae o le a sili atu mea o le a faia e lenei malo lelei atoatoa.

I lalo o le pulega o le Malo o le Atua o le a mafai ai e tagata ona tausia aʻe tamaiti i se auala paleni. (Iopu 33:24-26) O le a tausia aʻe tamaiti i le agaga o le filemu ma i totonu o le ʻauuso i le lalolagi aoao, o le manaʻoga mo se tulaga lelei atoatoa lea na faataatia e Malo Aufaatasi i le Taʻutinoga o Aiā Tatau a le Tamaitiiti. (Salamo 46:8, 9) O le a lē toe manaʻomia se Tausaga Faava-o-Malo a le Tamaitiiti po o le Fonotaga i le Aiā Tatau a le Tamaitiiti.

O le toe faafoʻisia o le ola mālōlōina atoatoa i mātua ma tamaiti e lē o atoatoa le malosi o le tino, o se galuega faigofie mo Keriso Iesu, le Tupu o lenei malo faalelagi. O faamālōlōga faavavega na ia faia a o iai i le lalolagi, o ni faamaoniga na. (Luka 6:17-19; Ioane 5:3-9; 9:1-7) E oo i le toe faatutūina mai o tamaiti ma mātua mai i le oti, o le a mafai e lona malosi ona faataunuuina!—Mataio 9:18-25.

Maʻeu le olioli i le iloaina faapea ua latalata mai le taimi mo le Atua e gaoioi ai mo le lelei o tamaiti i le lalolagi!

 [Pusa/Ata i le itulau 24]

Fesoasoani mo Talavou

E fiafia tele Molimau a Ieova e fesoasoani i talavou e lē gata i le ʻalofiaina o faafitauli ae faapea foʻi ma le faaali atu ia i latou o le auala sili e taulimaina ai faafitauli ia e lē maʻalofia. O lea, i le faitau tausaga ua latou lomia ai se aofaʻiga tele o fesoasoani ua faatulaga mo le faamalieina o manaʻoga o talavou—mai lava i le taimi a o leʻi aʻoʻoga seʻia oo i le vā o le 13 ma le 19 tausaga. O nei lomiga e aofia ai tusi Laʻu Tusi o Tala o Le Tusi Paia faapea ma le Questions Young People Ask—Answers That Work faapea ma se vitiō e faaulutala Young People Ask—How Can I Make Real Friends? E mafai ona mauaina mai i Molimau a Ieova o loo nonofo i lou vaipanoa po o le tusi atu i ē o loo lomiaina lenei mekasini.

E faaalia e Molimau a Ieova i a latou lava fanau faapea, e manaʻomia ma alofagia i latou e ala i le talanoaina ma i latou e lē aunoa o o latou faafitauli. E masani ona faaaogā e mātua mataupu lelei o loo aumaia e ala mai i fesoasoani mo suʻesuʻega o loo taʻua i luga, e avea o se faavae mo se polokalame faifai pea o toleniga auiluma o talavou. Atonu e te ono manaʻo e mulimuli atu ma lau fanau i se faasologa faapena.