Taumafa Au Fualaau Faisua!

TUSIA E LE TUSITALA O LE ALA MAI! I PASILI

“E oona.” “E leaga lo latou tofo.” “Ou te leʻi ʻaia lava na mea.”

O NISI na o māfuaaga ua mumusu ai le toʻatele e taumafa fualaau faisua. Ae faapefea oe? Pe e te taumafaina fualaau faisua i aso uma? Sa faia e le Ala Mai! ni faatalanoaga e faailoa ai le māfuaaga ua fiafia ai nisi tagata i fualaau faisua ae lē fiafia i ai isi.

O i latou na taumafaina a latou fualaau faisua na faapea mai, na aʻoaʻoina i latou e o latou mātua i le tāua o le taumafaina o fualaau faisua, ma fualaau ʻaina suamalie. I le eseesega, o le toʻatele lava sa lē fiafia i fualaau faisua, sa leʻi masani i le taumafaina o na mea a o tamaiti. Na i lo lena, e sili ia i latou meaʻai lē paleni. Peitaʻi, e oo lava ia i latou nei, e ioeina faapea o fualaau faisua e tāua i le tausiaina o le soifua mālōlōina lelei.

Mātua e, ia aʻoaʻo lau fanau e taumafa fualaau faisua! E faapefea? Ua fautua mai le Facts for Life, na lomia e le United Nations Children’s Fund e faapea, o pepe pe tusa o le ono masina e tatau ona fafagaina i fualaau faisua ua sakaina, fisi, ona palu loa lea ia lē itiiti mai i le faatasi i le aso pe a uma ona faasusu i le tinā po o le fafagaina foʻi i le fagu susu. O le tele o le eseese o ituaiga o meaʻai, o le lelei foʻi lea mo le tamaitiiti. Ua faapea mai Dr. Vagner Lapate, o se fomaʻi Pasili e faapitoa mo tamaiti, e ui ua avea le suāsusu o se meaʻai autū mo uluaʻi tausaga e lua, o le amata fafagaina i isi meaʻai “e uunaʻia ai le pepe e mauaina tofo fou o meaʻai.”

I le tusi Medicina—Mitos y Verdades (Vailaau—Faamatalaga Sesē ma Mea Moni), na fautua mai ai Carla Leonel e faapea, e mafai ona vave amata fafagaina le pepe na i lo o le taimi ua faatulagaina i luga, i sina sua itiiti o le moli, o fualaau ʻaina suamalie ua palu faasuavaia (pei o faʻipula, apu, ma esi), o meaʻai pei o polesi, ma supo e fai i fualaau faisua. O le mea moni, talu ai e eseese manatu i lenei mataupu, o se faiga atamai la mo oe le faafesootaʻia o lau fomaʻi o tamaiti.