Ua Saisaitia i se Faaipoipoga ua Lē o Iai se Alofa

“I se vaipanoa ua faateleina ai talaga faaipoipoga, ua lē gata ina tele faaipoipoga lē fiafia ma foliga mai e iʻu ina tatala, ae ua tele atu foʻi faaipoipoga e foliga mai ua lē o toe iai se fiafia.”—FAALAPOTOPOTOGA O AIGA I AMERIKA.

UA FAAPEA mai se faaupuga, o le tele o le fiafiaga o le olaga ma le tele o ona faanoanoaga, e puna uma mai i le puna e tasi—o le faaipoipoga lea a se tasi. O le mea moni, e tau leai ni mea i le olaga o iai se avanoa e maua mai ai le tele o faalogona fiafia—po o le tele o faalogona mafatia. E pei ona faaalia i le pusa o loo iai i lenei mataupu, e toʻatele ulugalii o loo latou fesagaʻi ma faalogona mafatia.

Peitaʻi ua na o se vaega o le faafitauli ua faaalia mai e le aofaʻiga o talaga faaipoipoga. Mo faaipoipoga taʻitasi ua lē taulau, e lē mafaitaulia le tele o isi faaipoipoga ua peiseai o se vaa o loo na ona faaopeopea lava i luga o se sami sousou. Na sasaa mai lagona o se tasi fafine ua silia ma le 30 tausaga talu ona faaipoipo, e faapea: “Sa masani ona avea i maʻua o se aiga fiafia, peitaʻi o le 12 tausaga ua tuanaʻi atu sa matuā leagafaia lava. Ua lē o toe naunau mai laʻu tane i oʻu faalogona. O le mea moni lava, ua avea o ia ma fili sili i oʻu faalogona ootia.” E tai faapena foʻi le tagi talatala mai a se tane ua toetoe 25 tausaga o faaipoipo: “Ua taʻu mai e laʻu avā ia te aʻu ua lē o toe alofa ia te aʻu. Ua ia faapea mai, e mafai lava ona ma tatalia le tulaga ua oo i ai pe afai e tau lava ina ma nonofo faatasi, ae pule le tagata i le faaaogāina o ona taimi paganoa.”

O le mea moni, o nisi ua oo i nei tulaga sili ona mafatia, ua latou faamutaina a latou faaipoipoga. Peitaʻi, mo le toʻatele, e latou te matuā lē mafaufauina lava se talaga faaipoipoga. Aiseā? E tusa ai o se faamatalaga a Dr. Karen Kayser, o vala e pei o fanau, se luma i le nuu, o tupe, o uō, o tauaiga, ma talitonuga faalotu e ono taofiofia ai pea se ulugalii i le faaipoipoga, e ui lava ua lē o toe iai se alofa. Ua ia faapea mai: “I le lē faia o se talaga faaipoipoga faaletulafono, ua filifili nei tagata faaipoipo e nonofo faatasi pea ma le paaga lea ua teteʻa ese mai ai tau faalogona.”

Pe tatau ea i se ulugalii ua mou ese atu le alofa i le la mafutaga, ona talia se olaga o le lē faamalieina e ui e la te lē o lotomalilie i ai? Pe na pau ea le auala e suia ai le faia o se talaga faaipoipoga, o le faaauau pea lea ona nonofo e ui ua lē o iai se alofa i le mafutaga? O mea ua tutupu e faamaonia ai e mafai ona laveaʻiina le tele o faaipoipoga ua fetaiaʻi ma faafitauli—e lē gata mai le tigā o se faaipoipoga ua malepe, ae laveaʻiina ai foʻi mai le faanoanoaga o le lē toe iai o se alofa.

[Pusa i le itulau 3]

TALAGA FAAIPOIPOGA I LE LALOLAGI AOAO

• Ausetalia: Ua toetoe lava faafāina le aofaʻiga o talaga faaipoipoga talu mai le amatamataga o vaitausaga mai le 1960.

• Peretania: E tusa ai o mea na muaʻi valoia, e 4 mai le 10 faaipoipoga o le a iʻu ina tatalaina.

• Kanata ma Iapani: O talaga faaipoipoga ua aafia ai le tusa o le tasi vaetolu o faaipoipoga.

• Iunaite Setete: Talu mai le 1970, ua lē o toe tele se avanoa e ono tumau ai pea ona nonofo faatasi ni ulugalii ua faaipoipo.

• Zimbabwe: Ua faamutaina e talaga faaipoipoga le tusa ma le 2 mai le 5 o faaipoipoga.