Le Matuā Saosaoa o le Olaga i Lenei Lalolagi

PE FAAMATA E IAI NI TAIMI UA LOFITŪINA AI OE I LE SAOSAOA O LE OLAGA? PO UA OO AI EA IĀ TE OE LAGONA FIU, UA LĒ LAVĀ, UA TAUAU INA LĒ MAFAI ONA TATALI? AFAI O LE TULAGA LENA UA IAI, E LĒ NA O OE LA.

UA ILOA e le faitau miliona o tagata, aemaise lava i aai tetele e faapea, ua matuā uigaese ma mataʻutia le televave o loo iai le olaga. Ua patino le moni o lenei manatu i atunuu i Sisifo. I se fonotaga faalelotu na faia lata mai nei i le Iunaite Setete, na fesili atu ai se failauga i lana ʻaufaalogologo, ina ia sii mai o latou aao pe afai o latou lagona le lē lavavā i le tele o taimi. Na pei o le ā le taufai alu aʻe i luga o lima.

Ua faapea mai le tusi Why Am I So Tired?: “Ua tumu le olaga i ona pō nei i popolega sa leʻi iai muamua—le faatopetope ina neʻi misi le vaalele, o mea e ao ona fai a o leʻi oo i le aso e faamuta ai, o fanau e manaʻomia ona momoli ma toe piki i le taimi tonu mai aʻoga faataʻitaʻi—e lē muta le lisi o meafai.” E matuā lē fou lava la le faamatalaina o le vaivai, e faapea o se puna o tigā i o tatou taimi. *

I tausaga ua mavae atu, sa faigofie lava le olaga, ma sa faifai mālie foʻi le faagasologa o le olaga. Sa mātele ina ola tagata e tusa ai o faagasologa masani o le olaga—o le ao e fai ai galuega, ae o le pō e faatasi ai le tagata ma lona aiga ma momoe ai. I aso nei, e anoanoaʻi māfuaaga ua lagona ai e tagata le faateleina o le vaivai ma le lē lavā.

Ua Faafuaseʻi Lava Ona Uumi Aso

O se tasi o vala ona atonu ua lē uumi taimi e momoe ai tagata. Ma o se tasi o atinaʻe mataʻina ua amata ona aafia ai le taimi moe, o le iai o le malamalama o molī eletise. E na ona ʻeu lava o le ki o le molī, mafai loa e tagata ona latou pulea le umi o le “aso,” ma oo ai lava ina ala umi tagata i pō. O le mea moni, e toʻatele ua itiiti lava se mea e mafai ona latou faia i lenei itu, talu ai ua amata ona faigaluega faasoloatoa falegaosimea, ma ua faauumi atu ai foʻi e falefaigaluega a latou itula faigaluega. Na faapea mai se tasi alii tusitala: “Ua fanau mai se sosaiete e luasefulu fā itula lona umi.”

O isi atinaʻe o le atamai maoaʻe ua iai, e pei o leitiō, TV, ma le masini komepiuta a le tagata lava ia, ua faapena foʻi ona faia sa latou vaega i le taofiaina o tagata mai le lē lava o le moe. I le tele o atunuu, ua 24 itula e faagasolo ai polokalame o le televise. Ua lē o se mea fou la mo i latou e faananau atu i ata tifaga ma tagata e naunau i taaloga,  ona ō atu fia momoe ma lē lavavā i galuega talu ai le alu o se pō atoa o matamata i le televise. Ua avea foʻi le iai o komepiuta i fale, atoa ai ma le lē gata mai o faatosinaga o loo aumaia ai, ma itu ua maileia ai le faitau miliona o tagata e ala umi i le pō. O le mea moni, o nei mea e lē leaga; ae peitaʻi, ua atili uunaʻia ai nisi tagata ina ia lē amanaʻiaina le manaʻoga mo le faia o se mālōlōga.

Ua Televave le Gasologa o le Olaga

Ua lē gata ina uumi o tatou aso, ae foliga mai foʻi ua sili atu ona saosaoa le gasologa o le olaga—e māfua foʻi ona o le atamai maoaʻe ua iai. O taavale solofanua i aso ua mavae e matuā vala lava ma taavale saosaoa i aso nei, o nofoaafi e pei o le see o le pulufana le saosaoa, ma vaalele tetele. O le mea moni, e mafai e se tagata faipisinisi, o lē atonu sa savali le tamā o lona tamā, i le galuega pe tietie atu foʻi i se solofanua po o se pasika, ae i aso nei ua mafai e lena tagata faipisinisi ona fai lana taumafataga i le isi itu o le Vasa Atalani ona lele atu lea i le vaalele i le isi itu mo le isi taumafataga o lena lava aso e tasi!

I totonu o ofisa, ua faapena foʻi ona aafia i se fesuiaʻiga lē leoa i manaʻoga tau i le saosaoa ma le tele o galuega e mafai ona faatinoina. O laau lomitusi ma le lafoina o meli i auala masani, ua suia nei i komepiuta, masini fax, ma I-meli. O tamaʻi komepiuta e mafai e le tagata ona fealuaʻi ma feaveaʻi (notebook computer), o telefoni feaveaʻi, ma pipa (pager), ua avea ma itu e faasoloatoa ai le faiga o galuega i le fale e pei lava o loo fai i le ofisa.

O le mea moni, e leai se tasi o i tatou e mafai ona faatelegeseina le saosaoa lea o loo alu ai le gasologa o le lalolagi. Ae peitaʻi, i o tatou lava tulaga totino, e mafai ona tatou faia fetuutuunaʻiga na e mafai ai ona tatou ola i se olaga e sili atu ona toʻafilemu ma sili ona paleni. Ae peitaʻi, a o tatou leʻi talanoaina lenei mataupu, seʻi o tatou iloiloina nisi o āuga e mafai ona aafia ai i tatou faapea foʻi le sosaiete atoa o tagata, talu ai le mataʻutia o le saosaoa o le olaga i aso nei.

[Faaopoopoga i lalo]