Le Ofoofogia o le Faiga Tau Faataamilosaga

SEʻI tepa faalemafaufau i se fale o loo iai se felavasaʻiga lavelave o ni paipa fetaʻiaʻi solo o loo fetafeaʻi ai ma le saogalemu le suavai o loo iai meaʻai, vai, okesene, ma otaota. E lē gata i lena, o loo iai i nei paipa le auala e toe faaleleia ai e i latou i latou lava, ma e mafai ona toe faaopoopo e paipa nisi paipa pe a suia tulaga manaʻomia i le fale. Maʻeu se fausaga atamai!

Peitaʻi, e sili atu ai ona “lavelave le felavasaʻiga” o mea o loo i lou tino. E lē gata ina fesoasoani i le faatonutonuina o le māfanafana o lou tino, ae e na te tauaveina foʻi ia le mau homone eseese, po o avefeʻau tau vailaau, ma le puipuiga malosi faasaga i faamaʻi. O lea galuega lavelave atoa e vaivai ma galemulemu, e mafai ai ona tatalia mea e faateʻia ai ma fetuutuunaʻi atu i gaoioiga a isi vaega o le tino. E leai se inisinia faaletagata e mafai ona fuafuaina lena ituaiga o faiga, ae o le faiga lena na faia e Lē na Foafoaina Mea ina ua ia faia uaua, alātoto, ma alātoto ninii (capillary) o le tino o le tagata.

O Vaega Autū o le Faiga Tau Faataamilosaga

O le faiga tau faataamilosaga o loo i le tino o le tagata, o le mea moni lava, e lua vaega o loo galulue faatasi. O le tasi o le faataamilosaga o le toto mai le fatu i alātoto (cardiovascular system), lea e aofia ai le fatu, le toto, ma alātoto uma lava. O le isi, o le faiga e aoina ai le suavai (lymphatic system)—o alāsuavai felavasaʻi ia e feaveaʻia le suavai ua totoe, e taʻua o le lymph, mai tisu po o anogase o le tino ma toe faafoʻi atu i le fegasoloaʻiga o le fetafeaʻi o le toto. Pe ana faapea e faataatitia sasaʻo alātoto o se tagata matua e toʻatasi, o le a oo atu nei alātoto i le umi e 60,000 maila [100,000 kilomita] ma e mafai ona faataamilo faalua ma le ʻafa i le lalolagi! O lenei faiga matuā maoaʻe o loo avatua le toto e maua ai le ola i le faitau piliona o sela, ma e faia aʻe e le toto le pe tusa o le 8 pasene o le mamafa o le tino o le tagata.

O le mea moni o le malosiaga o loo i tua o le faataamilosaga o le toto mai le fatu i alātoto, o le fatu. O le fatu, e pei lona telē o le telē o lau moto, ma e na te pamuina e lē itiiti ifo i le 2,500 kalone [9,500 lita] o le toto i lou tino atoa i aso uma—e tali tutusa ma le siiina o le mamafa e tasi le tone i le maualuga e 40 futu [e tusa ma le 10 mita] i le taʻi 24 itula!

Se Asiasiga i le Faataamilosaga o le Toto Mai le Fatu i Alātoto

O lē fea ala o loo tafe atu ai le toto? Seʻi o tatou amata i le toto e leai se okesene o iai ua taunuu ane i le fatu, e ala atu i uaua tetelē e lua—le uaua telē e i luga (superior vena cava) ma le uaua telē e i lalo (inferior vena cava). (Tagaʻi i le ata.) E muamua ona faaalu atu e nei uaua ia le toto i le vaega muamua o le fatu, e taʻua o le atrium taumatau. Ona pamu atu lea e le atrium taumatau i le vaega e malosi atu o le venitura  (ventricle) taumatau lea. Mai i inā e alu atu ai le toto agaʻi i māmā e ala atu i le pulmonary trunk ma tafe atu ai loa i alātoto e lua e taʻua o pulmonary artery—e na o le pau lava na o alātoto e tauaveina le toto e leai se okesene o iai. O le gaoioiga lenei e masani ona faia e uaua (vein).

A o iai le toto i totonu o māmā, e faamatuu atu e le toto le karaponi taiokesaita ae mitiia mai le okesene. Ona tafe atu lea o le toto i lalo i le itu agavale o le fatu e taʻua o le atrium agavale e ala atu i pulmonary vein e fā—na o le pau na o uaua e tauaveina le toto o loo iai le okesene. E faatafe atu le toto e le atrium agavale i le vaega aupito sili ona malosi o le fatu i le itu agavale lava, e taʻua o le venitura agavale, lea e na te pamuina atu le toto ua iai le okesene e ala i le aota (aorta) ma alu atu ai loa i le tino. O le taufai oomi faatasi la o atrium e lua o le fatu, sosoo ai ma le taufai oomi faatasi o venitura e lua o le fatu, o nei faagasologa e lua e faia aʻe ai le tātā a le fatu. O afuala (valve) e fā o loo i totonu o le fatu e faamautinoaina e tasi lava le auala o loo tafe ai le toto i totonu o le fatu.

Talu ai e tatau ona pamuina atu le toto ia oo atu i taufaasiʻusiʻuga uma o le tino, o le venitura agavale la e sili atu ona malosi, pe tusa e faaono e sili atu ai i le malosi o le venitura taumatau. Ona o lena malosi, e faigofie ai lava ona māfua ia le fefete po o le patu o puipui o le alātoto (aneurysm) po o le ono pā foʻi o se alātoto o le faiʻai, pe ana lē seanoa le faiga atamai lea e taofiofia ai le malosi o loo uunaʻia ai le toto.

Alātoto Memeʻi

O le alātoto aupito telē o lou tino, o le aota, faatasi ai ma ona maga autū, o loo faia aʻe ai “alātoto memeʻi.” O le avanoa o loo i totonu o nei alātoto, e tetelē, e faigofie ai ona tafe le toto. E iai foʻi i na alātoto ia puipui mafiafia malolosi, o loo felavasaʻi solo ai polotini e pei o se paʻu (elastin). Pe a pamuina atu la e le venitura agavale le toto i nei alātoto, ona fefete lea, ma mitiia ai le malosi tele o le alu atu a le toto ma faaalu atu ai agaʻi i isi vaega o alātoto, o iai maso, po o alātoto e faasoasoaina atu, ia foʻi e iai i totonu ia le polotini e pei o se paʻu. Talu ai le mataʻina o lenei fausaga, e  oo atu i le taimi e taunuu atu ai le toto i alātoto ninii e sili ona vaivai ua fetaui lelei lona malosi ua iai. *

O alātoto ia e faasoasoaina atu le toto, e mai le ʻafa inisi i le 0.01 inisi (1 senitimita-0.3 milimita) le taiamita (diameter) po o le fua o le ogatotonu. E ala i le faatelēina po o le faaitiitia foʻi e pei ona pulea ai e neula faapitoa, o nei alātoto e faatonutonuina le tafe a le toto, ma matuā malosi ai le faataamilosaga o le fetafeaʻiga o le toto. Ae, mo se faataʻitaʻiga, pe a oo ina iai se manuʻa po o se faalētonu foʻi, o ni faailo e iloa ai le malosi o le tafe o le toto lea o loo i afei o alātoto, e faailoa atua i le faiʻai, ona faailoa atu lea e le faiʻai i alātoto i le vaipanoa tonu lea, ina ia taofia le tafe atu o le toto i vaega o le tino e itiiti lo latou tāua, e pei o le paʻu, ae faaalu atu le toto i totoga e sili atu ona tāua. Na faapea mai le mekasini o le New Scientist: “E mafai ona ‘⁠lagona’ e ou alātoto le tafe a le toto, ma gaoioi i ai.” Po o se mea ea la e ofo ai le faamatalaina o ou alātoto o ni “alā paipa atamamai”?

E oo ane i le taimi e alu ese mai ai le toto i alātoto laiti lava—o arteriole—ua solosolo lelei le malosi uunaʻi o le toto i le pe tusa o le 35 milimita o le uʻamea faasuavaia siliva. E tāua tele le sologa lelei o le tafe a le toto i se tulaga maulalo i le taimi lea, ona o lea ua fesootaʻi atu nei alātoto laiti lava (arteriole) i alātoto aupito sili ona ninii i alātoto uma, o capillary.

Sela Mūmū i se Laina e Tasi

O capillary, e matuā ninii lava, tusa e valu i le sefulu micrometer [tasi vae miliona o le mita] ia lona taiamita po o le fua o le ogatotonu, ma e tafe ai i totonu ia sela mūmū i se laina e tasi. E ui o puipui o nei alātoto ninii e na o le tasi le āi o sela lona mafiafia, ae e latou te tauaveina niuturiane po o mea e aogā i le tino (e tauaveina e le vaega faasuavai o le toto e taʻua o le plasma) ma le okesene (lea e tauaveina e sela mūmū) i tisu o lata ane. I le taimi lava e tasi, e aveesea mai ai le karaponi taiokesaita ma isi otaota mai tisu ma toe foʻi atu i alātoto ninii mo le faamatuueseina  atu. E ala i le tamaʻi maso e pei a lapotopoto e taʻua o le sphincter, e mafai ai foʻi e alātoto ninii ona pulea le tafe a le toto iā i latou lava e tusa ai ma manaʻoga o tisu o loo siomia ai.

Mai Venule i Uaua ma Oo Atu ai i le Fatu

Pe a alu ese le toto mai i alātoto, ona ulu atu lea i tamaʻi uaua e taʻu o venule. O nei venule e i le vā o le 8 ma le 100 micrometer le taiamita, ma e fesootaʻi ina ia faia aʻe ai uaua ia e toe faafoʻi atu ai le toto i le fatu. Pe a oo atu le toto i uaua, ua toetoe lava a uma atu lona malosi e tafe ai, o lea la o puipui o uaua ua manifinifi atu na i lo puipui o alātoto. Ua itiiti foʻi lo latou memeʻi. Peitaʻi, ua tetelē atu avanoa i totonu o nei uaua, lea e mafai ai ona taofia atoa le 65 pasene o le toto o lou tino.

Ina ia faapaleniina le maulalo o le uunaʻi o le tafe a le toto, e iai i uaua se auala atamai e toe faafoʻi atu ai le toto i le fatu. Muamua lava, e iai i uaua ni afuala faapitoa e tai pei e foliga i se iputī lea e taofia le kalave mai le faatafe ese atu o le toto mai le fatu. Lona lua, o loo faaaogā e uaua ia maso o loo fesootaʻi ma le auivi o lou tino. E faapefea? Pe a faasaʻo ma toe faapiʻo ou maso, mo se faataʻitaʻiga o maso o ou vae a o e savali, e omia ai uaua o loo latalata ane. Ona o lena tulaga, e uunaʻi malosi atu ai le toto e ala atu i le afuala lea e tasi lava le auala e alu atu ai agaʻi i le fatu. Mulimuli ane, o le malosi o loo i le manava ma le fatafata, lea e fetuunaʻi e ala i le mānava, e fesoasaoni i uaua e faatafe atu le toto o loo iai i le atrium taumatau o le fatu.

Ona o le lelei tele o le galuega a le faataamilosaga o le toto mai le fatu i alātoto, e tusa lava po o loo mālōlō le tagata, ae e na te faafoʻisia le tusa ma le 5 kuata [lita] o le toto i le fatu i minute taʻitasi uma! O le savali e faaopoopo ai le tusa o le 8 kuata (lita) o le toto, ma o se tagata malosi e tamoʻe i le malafoni e ono alu atu le tusa o le 37 kuata [35 lita] o le toto i lona fatu i minute taʻitasi uma—e tusa e faafitu e sili atu ai na i lo le taimi e mālōlō ai!

I nisi o tulaga e ono mama ia afuala o uaua ona o se tulaga tuufaasolo i se aiga o se tasi, po ona ua lapoʻa tele, po ua oo ina maʻitaga, po o le tū mo se taimi umi. A oo ina faalētonu nei afuala, e maua mai ai ni faaputuga toto i lalo ifo o na afuala, ma māfua ai le fulafula o uaua ma oo ai ina avea ma mea ua taʻua o uaua patupatu (varicose vein). I se tulaga tutusa, o le oono, e pei o le taimi e fanau ai se pepe, po o le oono malosi a o faia se feʻau mamao (tulou), e faaopoopo ai le omiga i totonu o le manava, lea e faalavelavea ai le toe foʻi atu o le toto mai uaua o le alāfeau ma le gaau telē (large intestine). Pe a tupu lenei mea, e oo ina maua ai uaua patupatu e taʻua o hemorrhoid.

Faiga e Aoina ai le Suavai

Pe a tufa atu e alātoto ninii ia niuturiane i tisu ma toe faafoʻisia mai ia le otaota, e itiiti ifo teisi lava le suavai e latou te aoina mai na i lo le suavai lea na latou tufaina atu. E tafe ese atu agaʻi i tisu ia ni polotini tāua o le toto. O lea la, e manaʻomia ai e le tino le faiga lea e aoina ai le suavai. E na te aoina uma suavai e totoe, e taʻua o le lymph, ma toe faafoʻi atu i le fetafeaʻiga o le toto e ala atu i se uaua telē i le pito i lalo o le ua ma le isi uaua e i le fatafata.

E tele vala o alāsuavai e aoina ai le suavai, e pei lava foʻi o alātoto ma uaua. O alāsuavai aupito ninii (lymph capillary) e taatitia e faaputu isi i luga aʻe o isi. O nei alāsuavai ninii e matuā faigofie tele ona mitiia mai le suavai o loo totoe ma faaui atu i alāsuavai e lapopoʻa atu, lea e aoina le suavai ma aveina atu i alāsuavai autū. E fesootaʻi faatasi nei alāsuavai autū e faia aʻe ai lymph duct, lea e latou te toe faatafeina atu i uaua.

E na o le tasi le auala e tafe atu ai le suavai—e agaʻi atu i le fatu. O lea la, o alāsuavai e lē taamilo e pei ona faia e le faataamilosaga o le toto mai le fatu i alātoto. O gaoioiga vaivai a maso i le alāsuavai, faatasi ai ma le fesoasoani a le tātā a alātoto o loo lata ane ma le gaoioi o itutino, e fesoasoani e uunaʻia le suavai e ala atu i le faiga e ao ai le suavai. O so o se taimi lava la e poloka ai le alāsuavai e faapogaia ai foʻi ona faaputuputu le suavai i le vaimea lena o loo aafia, ma faatupu ai se fula e taʻua o le edema.

E mafai foʻi e meaola ninii e faatupuina faamaʻi ona ui atu e ala i le alāsuavai. O lea, ua avatu e Lē na Foafoaina Mea se malosi i le faiga e aoina ai le suavai, o se puipuiga malosi lea e ala i vaega o le tino e taʻua o lymph node—o loo salalau solo i le alāsuavai—i le atepili, le taima (thymus), le fatufaaī, le pitogaau, ma lymphoid follicle (Peyer’s patches) i le fifi. O nei totoga e fesoasoani e gaosia ma faaputuina ia lymphocyte, o sela aupito tāua ia o le faiga e puipuia ai le tino mai faamaʻi. O lea la, afai e mālōlōina lelei le faiga e aoina ai le suavai, e saosaolaumea foʻi lea i se tino e mālōlōina lelei.

O i inei ua iʻu ai la tatou asiasiga i le faiga tau faataamilosaga. Peitaʻi, e oo lava i lenei asiasiga puupuu ua mafai ona faaalia mai ai se faiga mataʻina e maofa ai i le lavelave ma le māeʻaeʻa lelei ona fai. Ae e sili atu i lena, e faia ma le filemu lenei galuega e lē uma, e aunoa ma lou iloaina—seʻi vaganā lava ua maʻi. O lea la, ia tausia lelei le faiga tau faataamilosaga i lou tino, ona ia tausia foʻi lea o oe.

[Faaopoopoga i lalo]

[Pusa/Ata i le itulau 20]

Ia Tausia Lelei Ou Alātoto!

O le arteriosclerosis po o le “malō o alātoto,” o le māfuaaga autū lea o le maliu i le tele o atunuu ona o le poloka o alātoto. O le ituaiga taatele lava o le poloka o alātoto, lea e tupu ona o le faatupulaʻia o gaʻo, e tai pei o ni mea ia e faia ai le polesi, i totonu o alātoto. O nei faaputuga gaʻo e māfua ai ona vāiti totonu o le alātoto, po o le avanoa i totonu o le alātoto, lea e ono poloka atoatoa ai le alātoto ma oo ai ina pā. O le poloka atoatoa e ono tupu foʻi ona o ʻaluʻalu toto e fetafeaʻi solo po o le oso malosi o le maso o loo i le puipui o le alātoto.

O le tulaga e sili ona mataʻutia, o le faatupulaʻia lea o gaʻo i puipui o alātoto o le fatu, lea e fafagaina ia le maso o le fatu lava latou. O le tulaga e oo i ai, o le a lē lava le sapalai o le toto i le maso o le fatu lava latou, o āuga e tupu mai ai o le angina—o se tigatigā o le fatafata lea e masani ona tupu pe a gaoioi malosi. Pe a oo ina poloka atoatoa se alātoto o le fatu, e mafai ona oo atu ai i le fatu pē ma le faaleagaina o le maso o le fatu. O se fatu pē mataʻutia e ono faapogaia ai le nofo atoatoa o le fatu e lē toe gaoioi.

O vala mataʻutia o le poloka o alātoto e aofia ai le ulaula tapaa, mafatiaga tau i faalogona, maʻi suka, le puta tele, leai o se faamalosi tino, le toto maualuga, mea taumafa e tele ai le gaʻo, ma le tulaga o se maʻi e tuufaasolo i se aiga.

[Ata]

Mālōlōina

Faatoʻā amata ona tau poloka

Faateleina le poloka

[Siata]

(Tagaʻi i le lomiga mo le ata atoa)

Alātoto o le fatu

[Siata i le itulau 18, 19]

(Tagaʻi i le lomiga mo le ata atoa)

Le Faataamilosaga o le Toto Mai le Fatu i Alātoto

MĀMĀ

FATU

Venitura agavale

UAUA

ALĀTOTO

ALĀTOTO LAITI

VENULE

ALĀTOTO NINII

FATU

Venitura taumatau

Toto ua iai le okesene

Toto ua leai se okesene

Mai le tino

UAUA TELĒ I LALO

ATRIUM TAUMATAU

VENITURA TAUMATAU

afuala

Agaʻi i māmā

PULMONARY ARTERY

Mai māmā

ATRIUM AGAVALE

afuala

VENITURA AGAVALE

AOTA

Agaʻi i le tino

[Siata i le itulau 19]

(Tagaʻi i le lomiga mo le ata atoa)

Le Auala e Tātā ai le Fatu

1. Mālōlō

2. Le oomi a atrium

3. Le oomi a venitura

[Ata i le itulau 19]

E tafe atu sela o le toto e ala i alātoto e 60,000 maila le umi

[Ata i le itulau 20]

Ata o alātoto ninii o loo iai sela mūmū i se laina e tasi

[Ē Ana le Ata]

Lennart Nilsson