Le Tomai ma le Poto Tau Vāʻai Tau

TUSIA E LE TUSITALA O LE ALA MAI! I PERETANIA

IĀ OKETOPA 15, 1987, NA TELEFONI ANE AI SE TAMAʻITAʻI I LE OFISA O LE TV I PERETANIA MA FAAMATALA E FAAPEA NA IA FAALOGO O LOO IAI NI MATAGI MATUĀ MALOLOSI O LOO LALATA ANE. NA FAAMAUTINOA ATU E LE TAGATA VĀʻAI TAU I LE ʻAUFAAFOFOGA: “AUA LE POPOLE. E LEAI SE MEA FAAPENA O TUPU.” PEITAʻI, I LENA LAVA PŌ, NA TAIA AI EGELANI I SAUTE I MATAGI MALOLOSI LEA NA FAATAMAʻIA AI LAAU E 15 MILIONA, MA FAAPOGAIA AI LE MALILIU O TAGATA E TOʻA 19, MA FAALEAGAINA AI MEA E SILI ATU I LE 1.4 PILIONA TĀLĀ AMERIKA LE TAU.

I TAEAO taʻitasi, e ki ai e le faitau miliona o i tatou a tatou leitiō ma televise mo le tala i le tau. Pe a auaoa ea le lagi ona faapea ai lea o le a timu? Po o le a tumau pea le lā o le taeao? Po o le faasolo atu ea ina vevela o le a liusuavai ai le kiona ma le aisa? O le taimi lava tatou te faalogo ai i le tala o le tau, ona tatou filifili loa lea po o ā ofu tatou te ofuina, ae pe ave foʻi se faamalu pe leai.

E ui i lea, e mai lea taimi i lea taimi, e manino mai ai lava le lē saʻo o le tala i le tau. Ioe, e ui lava i le telē o se faaleleia ua fai ina ia mafai ona saʻo atoatoa le tala i le tau i tausaga talu ai nei, ae o le valoiaina o le tau o se tuufaatasiga mataʻina o le tomai ma le poto lea e mautinoa lava e lē saʻo i taimi uma. O le ā o loo aofia ai i le valoiaina o le tau, ma o le ā le maufaatuatuaina o tala i le tau? Ina ia maua se tali, seʻi o tatou iloiloina muamua le auala o faia aʻe ai le valoiaina o le tala i le tau.

Le Fuaina o le Tau

I taimi o le Tusi Paia, o le vaaiga o le tala i le tau sa faalagolago autū atu lava i mea e mātauina i le vaaiga a mata. (Mataio 16:2, 3) I aso nei, ua iai i tagata e suʻesuʻeina le tau ia ni meafaigaluega lavelave mo le fuaina o le tau, o meafaigaluega e lē lavelave, lea o loo fuaina ai le mamafa o le ea, le vevela, le susū, faapea matagi ma savili.

I le 1643, na muaʻi fausia ai e Evangelista Torricelli o se tagata Italia e poto i le natura o mea (physicist) ia se barometer—o se fua faigofie e fuaina ai le mamafa o le ea. E leʻi umi ae mātauina faapea e alu i luga ma lalo le mamafa o le ea a o suia le tulaga o le tau, o le paʻū o le mamafa o le ea e masani lava ona faailo mai ai ni matagi malolosi. O le hygrometer, lea e fuaina ai le susū o le ea, na fausia i le 1664. Ae i le 1714, na faia ai e le tagata Siamani e poto i le natura o mea o Daniel Fahrenheit se fua o le vevela (mercury thermometer). Ua mafai nei la ona fuaina ma le saʻo ia le vevela.

Pe tusa o le 1765, na talosagaina ai e se saienitisi Falani o Antoine-Laurent Lavoisier e faapea, e tatau ona fua i aso uma le mamafa o le ea, le susū, le saosaoa o le savili ma matagi ma le ala o agaʻi atu i ai. “O nei faamatalaga uma,” na ia folafola mai, “e toetoe lava a mafai i taimi uma ona valoiaina ma le saʻo le tau mo le tasi po o le lua aso i luma atu.” Ae pagā lea, o le faia faapea e mautinoa lava e lē faigofie.

Le Suʻeina ma le Faamauina o le Tulaga o le Tau

I le 1854 na goto ai se vaatau a Falani ma ni vaaoloa e 38 i se matagi mataʻutia e latalata i le taulaga o Balaklava i Crimea. Na taʻu atu e le pulega a Falani iā Urbain-Jean-Joseph Leverrier o le faatonusili o le Nofoaga mo le Vāʻai Fetu i Pale, ina ia faia i ai ni suʻesuʻega. O le iloiloina o faamaumauga  i le suʻesuʻega o le tau, na ia mauaina ai e faapea, na tuputupu aʻe matagi malolosi i aso e lua a o leʻi oo mai lenei mala ma na aofia ai Europa e amata mai i mātū i sisifo ma agaʻi atu ai i saute i sasaʻe. Ana faapea na faagaoioia se faiga e faamaumau ma suʻeina ai le auala e agaʻi atu i ai matagi malolosi, na tatau la ona taʻuina mamao atu ia lapataʻiga i vaa. Na faavae ai loa se tautua faaleatunuu i le lapataʻia o matagi malolosi i Falani. O lea la, ua oo mai nei se faiga fou mo le suʻesuʻeina o le tulaga o le tau.

Peitaʻi, e manaʻomia foʻi se auala vave mo saienitisi e mauaina ai faamaumauga patino o le tau mai isi nofoaga. Na fausia i lena taimi e Samuel Morse se telekarafi e alu i le eletise, o le mea tonu lava lena sa manaʻomia mo le faia o lena tulaga. Na mafai ai loa e le Nofoaga mo le Vāʻai Fetu i Pale ona amata lolomiina uluaʻi faafanua o le tau i le faatulagaga fou i le 1863. E oo ane i le 1872, ua faia foʻi faapena e le Ofisa o Vāʻai Tau i Peretania.

O le tele e mauaina ai e tagata vāʻai tau faamaumauga patino o suʻesuʻega o le tau, o le tele foʻi lena e latou te iloa ai le matuā lavelave o le tau o loo iai. Na faia ia ni fuafuaga fou mo le tusia o faamatalaga ma ata ina ia mafai ai e faafanua o le tau ona faaoo mai ia faamatalaga faaopoopo. O se faataʻitaʻiga o ni isobar, o laina ia e tusia e faafesootaʻia ai nofoaga o loo tutusa ai le fua o le mamafa o le ea. O ni isotherm o laina ia e faafesootaʻia nofoaga ia e tutusa le vevela po o le mālūlū. E faaaogā foʻi e faafanua o le tau ia ni faailoga e faaalia ai le itu o loo agi i ai le matagi ma le malosi o loo agi ai, faatasi ai ma laina ia e faaalia ai le fesootaʻiga o le vaega o le ea māfanafana ma le vaega o le ea mālūlū.

Ua iai foʻi ni meafaigaluega lavelave ua faia. I aso nei e faitau selau nofoaga o vāʻai tau i le lalolagi o loo faalele atu paluni o loo iai ni radiosonde—o meafaigaluega e fuaina tulaga o loo iai le atimosifia ma toe uaealesi mai ai ia faamatalaga. O loo faaaogāina foʻi ia reitā. O le toe foʻi mai o peau ea leitiō mai matāua ma vaega ninii o aisa o loo i ao, e mafai ai e tagata e suʻesuʻeina le tau ona iloa po o fea o agaʻi i ai matagi malolosi.

O le vave see atu i luma i le faia o suʻesuʻega saʻo o le tau na amata mai i le 1960 ina ua fanaina atu i lugā i le vateatea le TIROS I, o le uluaʻi satelite vāʻai tau a le lalolagi, na faaauupegaina i se meapuʻeata (TV camera). O le taimi nei, o satelite vāʻai tau e taamilo i le lalolagi mai i le tasi pole i le isi pole, ae o geostationary satellite e latou te tausia se tulaga faatulagaina i luga aʻe o le fogaeleele ma faaauau ona mataʻitūina le vaega o le kelope o loo mafai ona au atu i ai lo latou mafai. O nei ituaiga e lua o satelite e la te puʻeina ma faasalalauina maia ia ata o le tau, lea e la te vaaia mamao mai i luga aʻe o ao.

Le Valoiaina o le Tala i le Tau

A o faigofie ona iloaina le tau i le taimi nei, peitaʻi e matuā faigatā lava ona valoia le tau o le a iai i le isi itula o sosoo ai, le aso, po o le vaiaso. Ina ua faatoʻā mavae lava le Taua Muamua a le Lalolagi, na manatu ai le tagata Peretania e suʻesuʻe i le tau  e suafa iā Lewis Richardson e faapea, talu ai e mulimuli atu le atimosifia i le tulafono tau i le kalave po o malosiaga, e na te ono faaaogāina la le faamatematika e valoia ai le tau. Ae o fua, e matuā lavelave lava, ma o le faia la o iloiloga e alu ai le tele o taimi lea e oo ai ina mou ese atu le vaega lea e fetaui ai le ea vevela ma le vaega o le ea mālūlū a o leʻi māeʻa ona faia iloiloga a le tagata vāʻai tau. E lē gata i lea, na faaaogāina e Richardson ia faitauga o le tau na fai i le taʻi ono itula ma fai. Na mātauina e le tagata Falani e suʻesuʻeina le tau e suafa iā René Chaboud e faapea: “O se tala i le tau e feoloolo le saʻo, lea e manaʻomia ona fua i le vā a umi lava o le tolusefulu minute.”

Peitaʻi, o le oo mai o komepiuta, ua mafai ai ona fuafua i se taimi puupuu ia mea na fuafua i se taimi umi. Na faaaogā e tagata e suʻesuʻeina le tau ia le fua a Richardson e faia aʻe ai se fausaga faafuainumera lavelave—se faasologa o vala faamatematika lea o loo aofia uma ai tulafono faalenatura e pulea ai le tau.

Ina ia faaaogā nei vala, ua vaevaeina ai e tagata e suʻesuʻeina le tau ia le fogaeleele i grid (poloka sikuea e tutusa lelei vā). O le taimi nei, o le fua a le lalolagi o loo faaaogā e le Ofisa o Vāʻai Tau i Peretania, e iai ni grid point e tusa ma le 50 maila le vā o le tasi mai i le isi. O le atimosifia e i luga aʻe o sikuea taʻitasi e taʻua o le pusa, ma o iloiloga e faatatau i matagi i le atimosifia, le mamafa o le ea, le māfanafana ma le mālūlū, ma le susū o le ea e faamauina i maualuluga eseese e 20. E iloilo e le komepiuta faamaumauga o suʻesuʻega ua maua mai i nofoaga o vāʻai tau i le lalolagi atoa—e silia ma le 3,500 na nofoaga—ona aumaia lea o le tala o le tau o le a iai le tau i le lalolagi i le isi 15 minute. O le taimi lava e uma ai ona faia lena mea, ona vave loa lea ona faia le tala o le tau i le isi 15 minute. O le faia soo o lenei faagasologa, e mafai e le komepiuta ona faia le tala i le tau mo aso e ono i le na o le 15 minute.

Mo le tele o isi faamatalaga ma le saʻo o tala i le tau i le atunuu lava latou, ua faaaogā ai e le Ofisa o Vāʻai Tau i Peretania le Limited Area Model (se faafanua mo se vaipanoa patino), lea e aofia ai le Atalani i Mātū ma Europa. E na te faaaogāina ni grid point e i le vā e tusa ma le taʻi 30 maila [50 kilomita]. O loo iai foʻi se ata faapena o loo aofia ai na o Atumotu o Peretania ma vasa o loo siʻomia ai. O loo iai ni grid point e 262,384 e taʻi sefulu maila [15 kilomita] e vā aʻi, ae 31 ni vertical level (tulaga eseese o le maualuga)!

Le Matafaioi a le Tagata Vāʻai Tau

O lea, o le valoiaina o le tau, e lē na o le faasaienisi o loo faavae ai. O loo faaupu faapea e le World Book Encyclopedia, “o fua o loo faaaogā e komepiuta ua na o ni faamatalaga e tau lalata ane i ai o mea o loo tutupu i le atimosifia.” E lē gata i lea, e oo lava i se tala saʻo e uiga i le tau mo se oganuu telē ae atonu e lē o aofia ai aafiaga o loo faia e lena laufanua i le tau. O lea e tatau ai foʻi la ona iai nisi o tomai atili. O i inei la e faaaogā loa i ai le tomai o le tagata vāʻai tau. E na te faaaogāina lona poto masani ma lona malamalama e fuafua ai, po o fea o le a tuu i ai le faatāua i faamaumauga o loo ia mauaina. O le auala lena o le a ia faia ai se lipoti saʻo o le tala i le tau.

Mo se faataʻitaʻiga, pe a oo ina mālūlū le ea i le Vasa i Mātū ma agaʻi atu i luga o le atu Europa, e masani lava ona faia aʻe ai ia ao manifinifi. Po o lenei ao manifinifi ua avea o se faailoga o ni timuga i le konetineta o Europa i le aso e sosoo ai po o le toe liu ausa i le vevela o le lā, e faalagolago lava i le eseesega o le vevela po o le mālūlū i ni nai vae sefulu o se tikerī. O faamaumauga a le tagata vāʻai tau, faatasi ai ma lona poto i tulaga tai faapena na iai muamua, e mafai ai ona ia tuuina mai ia fautuaga e maufaatuatuaina. O lenei tuufaatasiga o le tomai ma le poto e matuā tāua i le faia o le tala i le tau e saʻo lelei.

O le ā le Tele o le Faatuatuaina o Iai?

Ua faapea mai le Ofisa o Vāʻai Tau i Peretania i le taimi nei, e 86-pasene le saʻo lelei o lana tala i le tau i totonu o le 24 itula. O se fua faatatau o le tau i aso e lima mai le European Centre mo le Medium-Range Weather Forecasts na oo atu i se tulaga o le 80 pasene lona saʻo lelei—lea e sili atu na i lo le faatuatuaina o tala i le tau i aso e lua i tausaga amata o vaitausaga e amata mai le 1970. E mataʻina a latou faamaumauga ae mamao lava mai le saʻo atoatoa. Aiseā ua lē o matuā faatuatuaina ai ia tala i le tau?

E faigofie lava le māfuaaga ua lē o matuā faatuatuaina ai ia tala i le tau ona o le matuā lavelave o le tulaga ua iai le tau. Ae e lē mafai ona faia uma fua (measurement) e manaʻomia ina ia faia ai  valoaga e matuā faatuatuaina. O vaega e matuā tetelē o le vasa, e leai ni pole (buoy) e fuaina ai le tau o iai ia e avatuina ai faamatalaga moni e ala i satelite i nofoaga o vāʻai tau i luga o le laueleele. E seāseā lava i gridpoint i ata o le tau ona fetaui lelei atu i nofoaga o loo iai fale vāʻai tau. E lē gata i lea, e lē o malamalama foʻi saienitisi i malosi uma faalenatura lea e aafia ai lo tatou tau.

O loo faia e lē aunoa ni faaleleiga atili mo le vaaia o le tala i le tau. Mo se faataʻitaʻiga, seʻia oo mai talu ai nei lava, sa faalagolago faapitoa atu le mauaina o tala i le tau i le mātauina o le atimosifia. Ae ona o le 71 pasene o le lalolagi o loo ufitia i le vasa, ua taulaʻi atu ai nei le vaaiga a le ʻausuʻesuʻe i le auala o loo mauaina ai e le vasa le vevela mai le lā ma siitia atu ai lea vevela mai le vasa agaʻi i le ea. E ala i se faatulagaga o loo iai ia pole, ua aumaia faamatalaga e le Global Ocean Observing System e faatatau i suiga itiiti o le siitia o le vevela o le suavai i se tasi o vaipanoa, lea e mafai ona iai ni aafiaga tetele i le tau i se nofoaga o loo mamao pea. *

Na fesiligia le augatamā anamua o Iopu: “E iloa foi ea se tasi ona fofola o le ao, ma le taalili mai o lona [le Atua] fale apitaga?” (Iopu 36:29) I aso nei ua itiiti pea si mea o loo iloa e tagata e faatatau i le faatulagaga o lo tatou tau. E ui i lea, o tala i le tau i aso nei ua lava lona saʻo e manatu mamafa ai i ai. I nisi faaupuga, o le isi taimi e faapea mai ai le tagata vāʻai tau e ono timu, atonu o le a e manaʻo la e ave se faamalu!

[Faaopoopoga i lalo]

[Ata i le itulau 29]

Leverrier

Torricelli

Lavoisier i lona fale suʻesuʻe

Se uluaʻi fua tioata o le vevela

[Ē Ana le Ata]

Ata o Leverrier, Lavoisier, ma Torricelli: Brown Brothers

Fua vevela: © G. Tomsich, Science Source/Photo Researchers

[Ata i le itulau 31]

Satelite, paluni mo le suʻeina o le tau mai le atimosifia, ma komepiuta o nisi o meafaigaluega a tagata vāʻai tau

[Ē Ana le Ata]

Itulau e 2 ma le 31: Satelite: NOAA/Department of Commerce; afā: NASA photo

Commander John Bortniak, NOAA Corps