O Āuga o le Taumafai e Fai Uma le Tele o Mea

UA MAʻI VALEA ATUNUU I SISIFO I ASO NEI I AUALA E VAVE MA FAIGOFIE E MAUA AI MEA.

O MASINI FULUIPU e sefe ai le taimi i le umukuka. E faapena foʻi i le faiga o tagamea ona o masini tālavalava. E faitau miliona tagata ua lē o toe tau ō ese atu mai o latou fale ina ia fai a latou faatauga po o ni teugatupe—e na ona ki lava o le komepiuta ma faaaogā loa le Initineti.

Ioe, ua tumu le lalolagi, po o sona vaega, i ituaiga uma o masini e sefe mai ai le taimi ma galuegafai. O lona uiga, o le a e manatu faapea, ua tatau la ona matuā tele se taimi o le a faaaluina e tagata e faifaimea faatasi ai ma o latou aiga ma fai ai ni faafiafiaga e mālōlō i ai. Ae peitaʻi, ua tele ina faapea mai le toʻatele, ua sili atu ona latou lē lavavā ma ātu o latou mafaufau na i lo se isi lava taimi. E tele ma lavelave māfuaaga.

Ua matilatila lava omiga tau tamaoaiga i le lisi. Sa vaʻiliʻili lelei e le faalapotopotoga o le Australian Centre for Industrial Relations Research and Training le aofaʻiga o itula e faaalu e tagata o lena atunuu e faigaluega ai, ma iloa ai e faapea, “o se vaega e pito sili ona toʻatele o loo lē aunoa ona galulue i le sili atu ma le 49 itula i le vaiaso” ma o “nei faatelega i itula faigaluega e foliga mai sa iai se aafiaga e matuā leaga lava i le olaga o le aiga ma le vaipanoa.” E toʻatele tagata faigaluega ua filifili ina ia nonofo i vaipanoa e maotua mai aai, o nofoaga o loo lanumeamata ai le vao ma toʻafilemu. Ae o lona uiga foʻi la o le a tele ai itula e faaalu i vaiaso taʻitasi—po o aso taʻitasi foʻi—e tausāvali mai ai i nofoaafi ma pasi e matuā tutumu, po o le feoaʻi mai foʻi i auala feomaʻi. O le iʻuga, e faaopoopo atu ai foʻi ma lenei mea i le umi o le aso faigaluega ma ona faafitauli.

Po o E Mafatia i le Lē Lava o le Moe?

Ona o le matuā taatele o faafitauli e fesootaʻi atu i le moe i tausaga lata mai nei, ua oo ai ina faatūina ni vaega e faia ai suʻesuʻega faafomaʻi mo lea faafitauli i le tele o vaega o le lalolagi. Ua iloa e tagata suʻesuʻe e faapea, pe a faifai pea ona lē lava le taimi e momoe ai tagata, e oo ai lava ina faateteleina lo latou mafatiaga o le lē lava o le moe. O le tulaga masani, e manaʻomia e o latou tino ona faamalieina lenei faalogona, ma ugauga mai ai pea e ala i lo latou faalogoina o le lē lavā. Ae talu ai le taatele o le amioga lea ua iai i aso nei o le tau lē lava o le moe, e toʻatele ai tagata ua latou lagonaina pea le lē lavavā i taimi uma.

I se tasi atunuu i Sisifo, ua faaitiitia i le 20 pasene  le taimi o loo momoe ai ona tagata i le senituri na seʻi faatoʻā mavae atu nei, mai se faatatauga o le iva itula i le pō, ae ua paʻū ifo i le fitu itula. Ua aoaoina e tagata suʻesuʻe faamaoniga e iloa ai, o le lē lava o le moe e māfua ai faafitauli i le aʻoaʻoina ma le manatuaina o mea, le faaleagaina o le tomai e gaoioi lelei ai, ma le faavaivaia o vaega o le tino lea e tetee atu i faamaʻi. Ua iloa e le toʻatele o i tatou, o se mafaufau ua lē lavā e faigofie lava ona faia ai ni mea sesē. E faanoanoa lava talu ai, o nei mea sesē e mafai ona ogaoga ma mataʻutia.

Le Āuga Mataʻutia o le Matuā Vaivai

E iai le talitonuga faapea, o le matuā vaivai ona o le uumi o itula faigaluega o le aso faatasi ai ma le faaitiitia o le ʻaufaigaluega, na māfua ai nisi o mala e sili ona mataʻutia na tutupu i le vaitaimi faaiʻuiʻu o le 20 senituri. E aofia ai le mala faaniukilia lea na tupu i Chernobyl, i Ukraine; le pā o le vaa o le vateatea, le Challenger; ma le masaa o le suauu lea na māfua ona ua paʻulia le vaa suauu o le Exxon Valdez i le āʻau i Prince William Sound, i Alaska.

O ave faaniukilia ia na pasae aʻe i Chernobyl na tupu a o faia se faataʻitaʻiga faapitoa i le nofoaga autū e teu ai le malosi faaniukilia. I lana tusi The 24-Hour Society, ua faapea mai ai Martin Moore-Ede, o le faataʻitaʻiga “sa faia i le vaavaaiga a se vaega o inisinia o le malosiaga tau eletise, o ē na matuā vaivai lava, a itiiti mai e sefulutolu itula sa galulue ai i latou i le nofoaga, pe atonu foʻi na umi atu talu ai e sefulu itula na tuai ai le faataʻitaʻiga, a o faatali mo se faatagaga e amata ai.” I se suʻesuʻega talu ai nei ua taʻua ai e faapea, po o le ā lava le māfuaaga, ae o se tasi āuga faaumiumi o le salalau atu o ave faaniukilia, o le faasefulu lea o taimi ua oso maualuga aʻe ai le aofaʻiga o tamaiti i Ukraine ua aafia i le kanesa o le fatupuipui tairo talu mai le 1986.

Ina ua māeʻa se suʻesuʻega māeʻaeʻa i le māfuaaga na pā ai le vaa o le vateatea, le Challenger, na taʻua ai i se lipoti a le vaega na faatonuina le suʻesuʻega e faapea, o le 20 itula lea sa faatapulaa e gata mai ai le galulue ovataimi, na matuā ova atu lava i tua i le 480 taimi sa galulue ai se tasi vaega faakonekarate, ae 2,512 taimi le isi vaega. Na taʻua atili e le lipoti e faapea, o le vaivai o i latou sa faatonutonuina le galuega, ona o le “tele o aso o galulue i ni itula uumi e lē masani ai, faapea foʻi le lē lava o le moe,” o se tasi foʻi lena o pogai autū i le mauaina o le faatonuga lē saʻo lea na avatu faapea ua tatau ona lele le vaa. Na taʻua e le lipoti e faapea “pe a oo ina matuā tetele ovataimi e fai, e faaitiitia ai le faimea lelei o le tagata faigaluega ae faateteleina le avanoa e faia ai e le tagata o mea sesē.”

E tusa ai o se faamatalaga a sui sinia o le iuni e faapea, o le faaitiitia o tagata faigaluega, i se fuafuaga ina ia tipi ai i lalo tupe faaalu i le faatinoga o galuega, sa tatau ai i le auvaa o le Exxon Valdez ona faaumiumi atu itula e galulue ai ma faia isi tiute faaopoopo. I se lipoti mai le mala na tupu o loo faamatala ai e faapea, o le tagata lona tolu lea sa tiute i le vaa i le taimi na paʻulia ai i le teʻa laʻitiiti o le vaeluaga o le pō, sa alu lena aso atoa mai lava i le vaveao o ala, seʻia oo mai lava i le taeao pō o le aso lea na tupu ai le faalavelave. E toetoe 11 miliona kalone [42,000,000 lita] o suauu—o se aofaʻiga sili ona tele  o le suauu ua masaa i le talafaasolopito o le Iunaite Setete—na faapogaia ai ni faaleagaina mataʻutia i matafaga ma le ola faalenatura, ma faaaluina ai le silia ma le US$2 piliona i le faamamāina ese.

O Āuga e Sili Atu Ona Iloagatā o le Vaivai

E tusa ai o se tasi taumatematega, o le lē lavā ma le vaivai ua iʻu ai ina faaaluina e le lalolagi a itiiti mai e US$377 piliona i tausaga taʻitasi! Peitaʻi e leai se aofaʻiga tupe e mafai ona faatutusa atu i le tau o le ola ma le soifua mālōlōina o le tagata, lea ua masani pea ona aafia ai. Seʻi fai ma faataʻitaʻiga, o faalavelave i alatetele. I le lipoti a se falemaʻi i Sini, Ausetalia, e gafa ma faafitauli o le lē paleni o le moe, ua taʻua ai e faapea, e i le vā o le 20 ma le 30 pasene o faalavelave i alatetele i lena atunuu e māfua ona o avetaavale o loo tulemomoe a o aveina taavale. E iai se fua faatatau e faapea, i le Iunaite Setete, ua avea ai le lē lavā ma māfuaaga a itiiti mai, e 100,000 faalavelave tau taavale ua tutupu ai i tausaga taʻitasi.

Ae peitaʻi, atonu e lē iʻu ai i inā āuga o le vaivai. E iai le faamoemoega o se tagata e aafia i se faalavelave ma faanatinati atu i le falemaʻi mo se taotoga, ina ia taunuu atu ae o loo ala ma mataalia mai le fomaʻi o le a gafa ma ia. Peitaʻi, ona o le pisi o le tiute ma le uumi o ni itula na faigaluega ai, atonu o le a lē ala ai ma mataalia mai le fomaʻi! Na faaalia i se lipoti mai le Matagaluega o le Soifua Mālōlōina ma le Manuia i Ausetalia e faapea, e tusa ma le 10 pasene o fomaʻi sa galulue e oo atu i le 65 itula i le vaiaso, e 17 pasene o fomaʻi faapitoa uma sa sili atu itula na galulue ai na i lo lena aofaʻiga, ae 5 pasene o “fomaʻi laiti” sa galulue e sili atu ma le 80 itula i le vaiaso!

Ua taʻua e Martin Moore-Ede e faapea: “O loo maua e masini se puipuiga e ala i tusi taʻiala, o faasilasilaga lapataʻi o loo faapipii ai, ma aʻoga e toleni ai i le faaaogāina. Peitaʻi e leai ni puipuiga faapena mo tagata ina ua fananau mai i lenei lalolagi. . . . O le mea e ofo ai, ona ua matuā itiiti lava so tatou iloa i vaega patino o le tagata, ae ua sili atu ona lelei lo tatou iloa i totoga mo le faagaoioiga ma polokalame o le masini lea e faaaogā e le tagata.”

E lē o iai i o tatou tino ni molī mūmū emoemo ma ni faailoilo e taʻu mai ai iā i tatou ina ia taofi pe faifai mālie. Ae ui i lea, o loo ia aumaia iā i tatou ni faailoga e lapataʻi mai ai. E aofia i nei faailoga le lē lavā faaumiumi, o suiga i uiga, o faalogona mafatia, ma le mātele ina apoiagofie i vairusi o loo taatele. Pe afai ua maua oe i nei āuga—i le mautinoa lena, e lē o iai nisi ou faafitauli tau i lou soifua mālōlōina e te lē o silafia—atonu ua tatau nei loa la ona toe iloiloina le ituaiga o olaga o loo e soifua ai.

O Āuga Taatele o le Pisi Naʻuā

O se olaga ua tumu i omiga ma le lē lava o le moe ua iai ana āvega i faiā faaletagata. Seʻi manatu i le tulaga o se ulugalii na faatoʻā uma lava ona faaipoipo, o Ioane ma Maria. * Sa la mananaʻo i le mea o loo faanaunau uma i ai le toʻatele o ulugalii fou—o se fale manaia ma ia lava le tulaga tau tupe. O lea na la taufai faigaluega uma ai faasolo atoa. Peitaʻi, ona o le eseese o o la taimi faigaluega, na seāseā ai lava o la maua se taimi e mafuta faatasi ai. E leʻi umi ae amata ona leaga le la faiā. Ae peitaʻi, sa la lē amanaʻiaina āuga na aliali mai, ae faaauau pea iā la faasologa pisi i le galuega, seʻia oo lava ina malepe le la faaipoipoga, lea e leʻi leva ona amata.

“E faaalia i suʻesuʻega e faapea, o le aofaʻiga o talaga faaipoipoga i ulugalii e eseese taimi faigaluega  o le tane ma le avā, e tusa ma le 60 pasene e maualuga atu ai na i lo o ulugalii o loo galulue i itula faigaluega masani o le aso,” o se faamatalaga lea a le tusi, The 24-Hour Society. Peitaʻi, pe e latou te galulue faisifi pe leai, ae toʻatele ulugalii ua taumafai e faaofiofi uma le anoanoaʻi o meafai i o latou olaga, ae iʻu ane, ua latou faaleagaina ai a latou faaipoipoga. O isi, o le omia ma le vaivai e ono oo ai i le tulaga ua faaaogāsesēina fualaau ma le ʻava malosi, faapea le lē paleni o le taumafa—o vala e lē gata ina atili ai ona faateteleina le vaivai, ae mafai foʻi ona oo atu ai i le tele o isi faafitauli, pe oo ai lava ina faileagaina le fanau.

Ina ia fesoasoani i mātua e faafetaiaʻia ma le manuia faasologa faigatā o taimi faigaluega, ua faateleina ai le aofaʻi o nofoaga e tausi ai tamaiti, ma o nisi o na nofoaga ua oo lava ina latou ofoina mai la latou auaunaga mo le 24 itula i le aso. Ae mo le toʻatele o isi tamaiti, ua avea le TV o se tausitama moni lava mo i latou. O le mea moni, pe afai e fia tutupu aʻe le fanau ina ia avea o ni tagata matutua e maufaatuatuaina, ma lelei ona fetuutuunaʻi o latou faalogona, latou te manaʻomia la le tele o se taimi uigā ina ia latou faifaimea faatasi ai ma o latou mātua. O lona uiga, o mātua ua tele ina lē lavavā ma ua leai so latou taimi mo a latou fanau, talu ai le taumafai e saʻili mea taugatā e ola ai i le olaga, ae e lē o matuā manaʻomia tele, e atamai ona latou mafaufau i iʻuga e oo i ai—i a latou fanau ma iā i latou lava.

I se olaga i aso nei ua saosaoa ai le agaʻigaʻi i luma o le poto faaonapōnei, ua masani ai lava ona āfaina nai tagata matutua. O le saosaoa o suiga, ma le solo mai pea lava pea o masini fou, ua toʻatele ai tagata ua fenuminumiaʻi, ua lē mautonu, ua fefefe, pe oo lava ina manatu faapea, e matuā lē manaʻomia i latou. O le ā la se lumanaʻi o taatia mai mo i latou?

Po o tatou iai uma ea—o ē talavou ma ē matutua—i se lalolagi e foliga mai o loo agaʻi atu ina matuā saosaoa lava? Po o iai ea ni mea e mafai ona tatou faia ina ia mafai ai ona tatou onosaia ma faaleleia le tulaga aogā o o tatou olaga? Ioe, o loo iai, e pei ona o le a tatou talanoaina i le mataupu o sosoo mai.

[Faaopoopoga i lalo]

[Ata i le itulau 6]

Atonu o le vaivai na māfua ai le mala faaniukilia lea na tupu i Chernobyl, le pā aʻe o le vaa o le vateatea, le “Challenger,” ma le suauu lea na masaa a le “Exxon Valdez”

[Ē Ana le Ata]

Courtesy U.S. Department of Energy’s International Nuclear Safety Program

NASA photo

[Ata i le itulau 7]

O le matuā saosaoa o le gasologa o le olaga e mafai ona iʻu ai ina tulaga faalētonu faaipoipoga

[Ata i le itulau 8]

I a latou taumafaiga ina ia gafatia, ua faaaogā sesē ai e nisi le ʻava malosi