Pe a Lē Lanumoli Aano o Moli

TUSIA E LE TUSITALA O LE ALA MAI! I ITALIA

O AFEA e lē lanumoli ai aano o moli? E peiseai e uigalua lena fesili i le gagana Peretania, peitaʻi e lē o faapena. I le motu o Sicily i Italia, e manino ai lava le tali, “Pe a oo ina lanumūmū!”

O loo tatou talanoa i moli mūmū ʻulaʻula e ola i Sicily, ua taʻua faapena ona o le uigaese o le lanu o o latou aano, lea e iai moli e lanumoli ae mūmū malosi isi ona vaega, o moli e lanumoli ae mūmū ma toetoe lava enaena isi ona vaega, o moli e lanumoli ae mūmū paauli isi ona vaega, ma moli e lanumoli ae toetoe lava uliuli isi ona vaega. O lanu o o latou paʻū e lanumoli ae toe tafa atu ai ma le mūmū po o le violē sesega, ma o le sasala o lo latou manogi e faaoso fua ai lava lou fia tofo i ai. E aati lo latou tofo ma malase le suamalie, ma ua fai mai nisi, o lona tofo “e tai pei o le tofo o le ituaiga o laau suamalie e taʻu o le raspberry.”

O fualaau ʻaina suamalie e aati lo latou tofo e pei o moli ma tipolo, ua leva ona totōina i Italia talu mai anamuā. E foliga na aumaia moli i Sicily mai Asia i le lona fā o senituri T.A., peitaʻi o na moli e oona ma sa toetoe lava sasama (e lē mūmū) o latou lanu. Na aumaia le moli suamalie i Europa e tagata Potukali i le lona 14 ma le lona 15 o senituri, ma o i inā loa na amata ai ona faailoa atu i vaipanoa uma o Amerika, faatasi ai ma isi ituaiga eseese o fualaau ʻaina e pei o moli ma tipolo. Peitaʻi, o le amatamataga o le senituri lona 20 lea na faatoʻā faamautinoa aloaʻia ai le ola o moli mūmū ʻulaʻula i Sicily.

Aiseā e Mūmū Ai?

O moli uma lava e iai le carotene, o le sua lanumoli sesega lava e tasi lea e māfua ai foʻi ona maua le lanu o lega o fuāmoa ma lanu o karoti. O le itu e uigaese ai moli mūmū ʻulaʻula ia e maua i Sicily, i ituaiga e taʻua o le Moro, Tarocco, ma Sanguinello, ona e latou te faatuputupuina aʻe se sua lanumūmū e taʻua o le anthocyanin, lea e māfua ai ona liu i le mūmū lanu o fua pe a pula. * Peitaʻi pe afai e seʻi ese atu se tamaʻi laau o le moli mūmū ʻulaʻula mai i inei—o se vaipanoa i totonu lava o oganuu o Catania, Syracuse, ma Enna—ma taumafai e totō i se isi laufanua, o le a fua mai ai ni fua atonu e lē mūmū o latou lanu. Aiseā? O le ā se mea ua faapitoa ai lenei vaega i sasaʻe o Sicily?

E lē o matuā manino uma mai vala e aofia ai i le faatupuina o le sua o le anthocyanin i moli mūmū ʻulaʻula i Sicily. O loo taumafai pea e faamautinoa po o ā ni aafiaga, pe afai e iai, o loo faia e le palapala i le sua, lea e maua i le lanu o le fua o le laau. Pe a oo ina pula le fua, e iai nisi vala, a lē o le taofia po o le faatupuina ai foʻi o le tuputupu aʻe o le sua mūmū, lea e māfua ai ona lanu mūmū le paʻu o le moli. Mo se faaaʻoaʻoga, ua mātauina faapea, e amata ona mūmū le lanu o le fua pe a oo ina mālūlū le tau i pō ma malosi le susulu o le lā i le ao. Ae mo lona tofo, o le tele o le susulu mai o le lā e mautinoa ai le fetaui lelei o le suamalie, ae afai e toʻulu ai ma ni nai suātimu, ona mautinoa lava lea o le matuā malase o le suamalie.

E iai le talitonuga e faapea, o lenei tuufaatasiga uigaese o vala uma ua māfua ai le matilatila ese lava o moli mūmū ʻulaʻula o Sicily. E iai foʻi laau fua suamalie  faapena ua totōina i isi vaega o le itu i saute o Italia faapea foʻi i Sepania, Morocco, Florida ma Kalifonia, peitaʻi ua taʻua mai faapea, e leai ma se tasi ua mafai ona ia totōina se moli e maua uma i ai le sosia lea e maua i le moli mūmū ʻulaʻula a Sicily.

O se Fualaau ʻAina Suamalie e Ao Ona Talisapaia

E ui lava i le uigaese o o latou lanu, ae o loo iai foʻi i nei fualaau ʻaina suamalie se aogā tele tau meaʻai. O le ituaiga moli o le Tarocco e aupito sili ona tele le vaitamini-C o loo iai. E tasi lava se moli lapoʻa ae lava telē lena e maua ai le vaitamini-C lea e tāua mo le tino i aso taʻitasi. Ua taʻua le anoanoaʻi o aogā e maua mai moli mūmū ʻulaʻula. O se faataʻitaʻiga, o se ipu malamalama e tasi ua tumu i le sua totoo o le moli lea ua faatoʻā tatau mai, e avea lena ma puna manaia ma le mālōlōina e faigofie i le tino ona faaaogā, o masoā e maua ai le malosi o le tino, o minerale ma alava e aogā i le tino. E lētioa lava la a tauivi tagata o loo totōina moli i Sicily e puipuia la latou laau faapitoa lenei, ma faatuputeleina le talisapaia e isi o lea laau.

Ua talitonu tagata atamamai, o nei fualaau ʻaina suamalie mai Sicily e “aofia ai i moli e sili ona lelei i le lalolagi mo se taumafataga suamalie, talu ai le manaia o lo latou tofo, le paleni lelei o lo latou aava ma le suamalie, aemaise le faigatā ona faateʻa ese o lona tofo suamalie pe a uma ona taumafaina.” E iai se aso e ono maua ai se avanoa e te tofo ai lava oe i ai ma fai ai lau faaiʻuga pe e te ioe i lea manatu.

E ui e fai lava sina fou o lona aliaʻi mai, ae o le moli mūmū ʻulaʻula o se tasi o le anoanoaʻi o ituaiga eseese o taumafa mananaia o le foafoaga a Ieova, lea ua mafai ai ona maua e le tagata le fiafia. O lea, o so o se tasi e talisapaia le aao foaʻi o le Atua, e oo lava i “laau e fua mai . . . [e] vivii atu i le suafa o Ieova.”—Salamo 148:9, 13; Kenese 1:29.

[Faaopoopoga i lalo]