Se Vaaiga Totoʻa i Lou Lauulu

“I SO o se vaitaimi ma i so o se aganuu,” na mātauina e se tasi tusi, “o le lauulu e faaalia ai se mea e faatatau i le tagata.” E lē o se mea la e ofo ai, i le toʻatele o tagata e naunau tele e tausia lelei o latou lauulu ma teu faamanaia.

Na fesiligia e le Ala Mai! ni tagata teuulu se toʻafā i fesili masani e faatatau i le fausaga o lauulu ma le tausiga o lauulu. Ae e maua ane, e sili atu ona lavelave mea e faatatau i lou lauulu na i lo le foliga mai.

Le Tupu Aʻe ma le Toʻulu o le Lauulu

F: O le ā o faia aʻe ai le lauulu ?

T: O loo iai i le lauulu le mea e taʻua o le keratin, o se polotini e alavalavā. O lauulu taʻitasi e tupu aʻe i se avanoa i le paʻu o le ulu e taʻua o le follicle. I le pito lava la i lalo o follicle taʻitasi o loo iai le papilla, lea o loo anoanoaʻi ai le sapalai o alātoto. O le papilla, e na te faia aʻe sela o le lauulu lea e uunaʻia i luga le follicle ma faamalō e maua mai ai le lauulu.

F: O le talitonuga taatele e faapea e vave atu le tutupu o lauulu pe a ʻoti. Pe e moni lea?

T: Leai. E manatu nisi tagata faapea o lauulu e fafagaina e le tino i le auala lava e tasi lea e fafagaina ai ia lālā laau e le ogalaau. Peitaʻi, o le taimi lava e paʻū ese ai le lauulu mai le paʻu o le ulu, ua avea ma se mea ua mate. O le ʻotiina la o le lauulu, e lē o aafia ai lona tupu aʻe.

F: Aiseā e sinā ai le lauulu?

T: O le āi e pito i totonu o le lauulu o loo  iai se sua (pigment) lea e na te avatua i le lauulu lona lanu. A o mamate atu sela o loo faia ai le lanu, ona oo lea ina sinā le lauulu; o se vaega o le agaʻi ina matutua. O le vave sinā o le lauulu e ono māfua mai i le talaaga o le aiga po o se maʻi. Peitaʻi, o se manatu e lē faavaea le faapea o le lauulu e mafai ona sinā i le pō e tasi. O le sua lea e avatua i le lauulu lona lanu, e tuuina atu i le lauulu i lalo ifo o le paʻu o le ulu. O lea la e manaʻomia se taimi e tupu aʻe ai le sina (pe tusa ma le ʻafa inisi i le masina) ona aliali mai loa lea o sina i le ulu.

F: O ā māfuaaga o le toʻulu o lauulu?

T: O le toʻulu o lauulu o se vaega o le faataamilosaga masani o lauulu. I se fua faatatau, o tagata uma lava taʻitoʻatasi e tusa ma le 50 i le 80 lauulu e toʻulu i aso taʻitasi. Ae o le tula o le ulu o le tama tane e iai lona faavae tau tupuaga ma e foliga mai e māfua i le lē paleni o homone o le tino, ma iʻu atu ai i le tumau o le tula o le ulu. O le toʻulu o lauulu e lē masani ai e taʻua o le ulutula. *

F: E faapea mai nisi o lauulu o se fāʻata lea o le soifua  mālōlōina o se tagata. Po ua e mātauina lena tulaga?

T: Ioe. I lalo ifo o le paʻu o le ulu, e fafagaina ai e le toto le lauulu. O lea la o lauulu e mālōlōina lelei e faaalia mai ai le lelei tele o le sapalai i ai a le toto. Peitaʻi, o le tagata e lē lelei lana taumafa po o le soona faaaogā o le ʻava malosi e ono iloa faapea ua oo ina vaivai ma motumotu gofie ona lauulu, ona ua lē mauaina e ona lauulu mai lona toto mea e manaʻomia mo le tausiga lelei o ona lauulu. O le toʻulu o lauulu, po o le motumotu gofie foʻi, e mafai ona avea ma faailoga muamua o se maʻi po o le maʻitaga.

Tausia Lelei le Paʻu o Lou Ulu ma Ou Lauulu

F: Faamatala pe faapefea ona “shampoo” le lauulu ma le paʻu o le ulu.

T: O mea ua tutupu ua faaalia ai faapea o le toʻatele o tagata e iai faafitauli i le mago o paʻu o latou ulu, e shampoo soo o latou ulu. O le mea moni, o le suauu o loo i ou lauulu e faigofie lava ona palapalā ma paʻupaʻua ai lou ulu ma e mafai ona poloka ai le pū o le suauu lea e oo atu ai i follicle. O lea e talafeagai ai le shampoo e lē aunoa. Ae o nei suauu, e masani ona puipuia ai foʻi lou paʻu faasaga i siama mataʻutia ma taofia ai le susū e manaʻomia. O le shampoo soo, ua e aveesea ai mai le paʻu o lou ulu lenei puipuiga ma mauaina ai faafitauli e pei o le mago o le paʻu o le ulu. O le toʻatele o tagata atamamai e latou te fautuaina le shampoo pe a palapalā le paʻu o le ulu po o lauulu. O tagata e suauua o latou lauulu e tatau ona shampoo soo na i lo i latou e lelei pe mamago o latou lauulu.

Afai e shampoo, ia lomi le paʻu o lou ulu. O le faia faapea e aveesea ai sela pepē i le paʻu o le ulu ma faaleleia atili ai le faataamilosaga a le toto, lea e na te fafagaina ou lauulu. Ia manatua e tofu faamamā lelei! Afai na leʻi faamamāina lelei ou lima ina ua uma ona fufulu i se fasimoli, o le a mago ma mavaevae lou paʻu. I se tulaga tutusa, afai e leʻi lelei ona faamamā ese le shampoo, e mafai ona mago ma paʻupaʻua ai le paʻu o le ulu.

F: E mafai faapefea ona tausia le paʻu o le ulu e mago?

T: Ia tele ni vai e inu, ma taumafa ni meaʻai e aogā i le tino. E faasūsū ai lou paʻu ma fafaga lelei ai le sapalai o lou toto. Faaaogā se shampoo e vaivai, ma ia lomilomi soo le paʻu o lou ulu. O nisi tagata e latou te faaaogāina ni conditioner e uu ai le ulu ma vai (lotion) e faasūsū ai le paʻu o le ulu.

Teuina o Lou Lauulu

T: O le ā e ao ona teu i le mafaufau o se tagata pe a asiasi atu i se tagata teuulu?

F: Afai e te manaʻo e sui le teuga o lou lauulu, aumai se ata o le ituaiga o teu lea e te manaʻo i ai, atonu ma le ituaiga o teu e te lē manaʻo i ai. Ia faamatala saʻo le mea e te manaʻo i ai ma le tele o le taimi e te manaʻo e faaalu i le teuina o lou lauulu i aso taʻitasi, ona o nisi o teuga o lauulu e tele le taimi e manaʻomia e faaalu ai na i lo isi teuga. Ia teu i le mafaufau faapea e masani lava ona manaʻomia ni asiasiga se lua pe tolu ina ia iloa lelei ai e le tagata teuulu lou lauulu ma ati aʻe se sootaga lelei ma oe. O lea aua neʻi vave ona e fiu i lau tagata teuulu!

O le ā o Taʻu Mai e Ou Lauulu

O le tausia ma le teuina o le lauulu o vala na o le faailoaina mai o le tagata lava ia. Ua ʻotiina lauulu, faauumi, faasasaʻo, faamigimigi, vali, ma teuga eseese ina ia faatutusa atu i aʻega ua iai, o talitonuga faalotu, e oo lava i manatu o le lautele ma le faapolotiki. Seʻi tagaʻi totoʻa ane i ou lauulu. O le ā o loo faaalia mai ai e faatatau iā te oe? O lauulu e mālōlōina lelei e manaia ona teuina, e faamatagofieina ai lē e ona le ulu ma e mataʻina mai e isi.

[Faaopoopoga i lalo]

[Ata i le itulau 26]

O le taumafaina o meaʻai e aogā i le tino ma le tele o vai e inuina e ono fesoasoani e foʻia ai le mago o le paʻu o le ulu

[Ata i le itulau 26]

O le sinā o le lauulu o se vaega e masani ai o le agaʻi ina matua

[Ata i le itulau 26]

O le “shampoo” soo o le ulu e mafai ona aveesea ai mai le paʻu o lou ulu ia suauu e puipuia ai