Faaaogāsesēina o Fualaau—E Iai le Vaifofō!

“E ANOANOAʻI Cocaine sa Ave Faananā na Maua i Totonu o Fagu Uaina.” I lalo ifo o lenā ulutala, na faamatala ai e le nusipepa le auala na maua ai e leoleo i Johannesburg, i Aferika i Saute, se koneteina e laʻu ai uta i vaa, sa iai le tusa ma le 11,600 fagu o le uaina e fai mai Amerika i Saute. Sa palu faatasi i le uaina le 150 i le 180 kilokalama o le cocaine. E talitonuina e faapea, o se uta sili ona tele lea o cocaine ua ave faananā ua mafai ona avatu i totonu o le atunuu.

E ui e foliga mai i lenā mea na tupu e faapea ua taulau manuia taumafaiga e taofia ai le faaaogāsesēina o fualaau, ae o le mea moni lava, e na o se aofaʻiga e 10 i le 15 pasene o fualaau faasāina ua mafai ona maua e leoleo i le lalolagi aoao. O le itu e faanoanoa ai, ua talitutusa lenei mea ma se tagata faitogalaau o loo ia futifutiesea na o nai lau itiiti o se vao e lauolaola ma sili ona leaga, ae o la lava e ola pea ona aa i le eleele.

Ua avea le tele o polofiti o loo maua mai fualaau ma itu ua taofiofia ai taumafaiga a malo ina ia faaitiitia le totōina ma le faatauina atu o nei mea. I le Iunaite Setete lava ia, ua iai se faatatauga o le faitau piliona tālā e maua i le tausaga e tasi mai fefaatauaʻiga o fualaau faasāina. Talu ai le telē o lenā aofaʻiga tupe o loo maua, e lē o se mea la e ofo ai i le aafia ai foʻi o leoleo ma tagata mautofiga i malo, e oo lava i ē o loo i tulaga maualuluga, i lenei soligatulafono.

 Na lipotia mai e Alex Bellos o le nusipepa o le Guardian Weekly mai Pasili e faapea, i se suʻesuʻega na faia i le palemene o lenā atunuu, “sa taʻua ai suafa o nisi e toʻatolu o loo fai ma sui o o latou teritori i le fono tele, e toʻa 12 sui mai le maota maualalo a le fono tele, ma le toʻatolu o pulenuu . . . i se lisi e silia ma le 800 tagata o loo masalomia le faia o sa latou vaega i soligatulafono ua lelei ona faamaopoopoina, ma le feaveaʻia o fualaau, ae lē tusa ai ma le tulafono, i totonu o Pasili.” Sa aofia ai foʻi i le lisi “leoleo, lōia, tagata faipisinisi ma le ʻaufaifaatoʻaga i setete e 17 mai setete e 27.” E tusa ai o nei mea na maua, sa taʻua e se polofesa o mataupu faapolotiki i le Brasília University e faapea: “O nei mea na maua ua matuā tuuaʻia ai vaega uma o le atunuu o Pasili.” O le faamatalaga foʻi lenā e ono faia i le tele o nofoaga ia e tele ai le mauaina o fualaau. Ua avea tulafono o faafetauaʻiga mo le mauaina mai ma le moomia o nei mea ma itu ua atili faateteleina ai le faafitauli.

Pe a fua atu i se taulau o taofiofiga faaletulafono, ua lagolagoina ai e nisi tagata le faia o se tulafono ina ia faataga ai nisi fualaau. O le manatu taatele e faapea, e tatau ona iai se faatagaga i tagata taʻitoʻatasi e latou te mauaina ai se aofaʻiga itiiti o fualaau mo le faaaogāina e le tagata lava ia. E iai le lagona o lenei faiga atonu o le a sili atu ai ona faigofie mo malo ona latou puleaina ma faaitiitia ai le tetele o polofiti o loo maua a tagata o loo pulea le faatauina atu o fualaau.

Ua Taulau Manuia Nisi

O se faiga ina ia lē toe faaaogāina fualaau atonu e muamua lava taofia ai tagata mai le ola faalagolago i fualaau, ona sosoo ai lea ma le toe sologa lelei o o latou soifua mālōlōina. O le itu e faanoanoa ai ona, e toe foʻi loa le tagata lea ua ia tuua le masaniga i le siʻomaga sa masani aʻi muamua, o inā o le a faaosoosoina ai o ia e toe foʻi atu e faaaogā fualaau. Ua taʻu mai e le tusitala o Luigi Zoja le māfuaaga mo lenei mea: “E lē mafai ona taofia se amioga seʻi vaganā ua taumafai e toe suia ia fou le auala e mafaufau ai le tagata.”

O Tarene lea na taʻua i le mataupu seʻi mavae atu, sa ia mauaina se ‘⁠auala fou e mafaufau ai’ na suia ai lona olaga. Ua ia faamatala mai: “Na avea aʻu o se tagata sa lē talitonu i le Atua, peitaʻi mulimuli ane, e ui sa ou faaaogāina fualaau mai lava i le taeao seʻia pāʻia le pō, ae na oo ina ou iloa e tatau ona iai se Atua. A o faagasolo se vaitaimi pe lua i le tolu masina, sa ou taumafai e taofia le faaaogāina o fualaau, peitaʻi sa lē mananaʻo aʻu uō ina ia ou tuua le faaaogāina o fualaau. E ui lava sa faaauau pea ona ou faaaogāina fualaau, ae na amata ona ou faitauina e lē aunoa le Tusi Paia a o oʻu leʻi moe. Sa amata ona faaitiitia loʻu toe auaumea atu i aʻu uō. I se tasi afiafi, sa matuā ma felelei lava i fualaau ma laʻu uō lea sa ma potu faatasi. Sa ou taʻuina atu le Tusi Paia iā te ia. I le taeao na sosoo ai, sa ia telefoni atu ai i lona uso, o se tasi o Molimau a Ieova. Sa faasino mai e lona uso iā i maʻua se Molimau o lē na nofo i le aai lava lea sa ma nonofo ai, ona ou alu loa lea e vaai le Molimau lenā.

“E oo lava i le 11:00 i le pō o fai le ma talanoaga, ma na ou toe foʻi i le fale ma le tele o lomiga faale-Tusi Paia e mafai ona faia ai se suʻesuʻega. Sa amata ona ia faia laʻu suʻesuʻega faale-Tusi Paia  ma na ou taofia foʻi le faaaogāina o fualaau ma ua ou lē toe ulaula. Pe tusa ma le iva masina mulimuli ane, ae papatisoina loa aʻu e avea o se tasi o Molimau a Ieova.”

E lē faigofie le taofia o le masaniga o le ola ai i fualaau. O Mikaele lea sa taʻua i le mataupu na muamua atu, sa ia taʻu mai faigatā na ia fesagaʻia ina ua ia taofia le toe faaaogāina o fualaau i le mavae o le 11 tausaga o ia faaaogāina: “Sa matuā faigatā lava ona ou ʻai ma na faasolo atu ina ou paee. Sa ou lagonaina foʻi le pepē o oʻu tino, sa ou afu i taimi uma ma na pei sa iai se ao pupula e faataamilo i ulu o tagata ou te tilotilo i ai. Sa ou lagonaina se faanaunauga malosi e toe fia faaaogā fualaau, peitaʻi o loʻu mafuta vavalalata atu iā Ieova i le tatalo ma le suʻesuʻeina o le Tusi Paia, na fesoasoani lenā iā te aʻu e tumau ai i le tulaga mamā ua ou iai.” E ioe i latou nei na faaaogāina muamua fualaau e faapea, sa matuā manaʻomia lava ona latou vavae ese atoatoa mai a latou aumea sa iai muamua.

Le Pogai e Lē Taulau ai Taumafaiga a Tagata

O le faaaogāsesēina o fualaau faasāina ua na o se tasi lenā o vala o se faafitauli tele o loo aafia ai le lalolagi aoao. O se taaʻiga malosi mo le faia o mea leaga, o faiga sauā, ma faiga lē alofa, ua matuā lilofia ai le lalolagi atoa. Ua faapea mai le Tusi Paia: “O le lalolagi uma o loo nofo toilalo i loo leaga.” (1 Ioane 5:19) Ua faaalia mai ‘lē o leaga’ e le aposetolo o Ioane i le Faaaliga 12:9: “Ua lafo foi le tarako tele, o le gata tuai lea, ua igoa i le tiapolo, i le ma Satani, o lē faasese i le lalolagi uma; ua lafo ifo i le lalolagi, ua lafo foi ana agelu faatasi ma ia.”

E lē gata i ona lava vaivaiga, ae e tatau foʻi i le tagata ona manumalo mai lenei fili e sili ona malosi. O Satani lea na māfua ai ona paʻū le tagata i le amataga. Ua ia maumauaʻi e faaleagaina atili le fanau a tagata ma faaliliueseina i latou mai le Atua. E foliga mai o le faaaogāsesēina e tagata o fualaau o se tasi lea o vaega o lana faufauga. O loo gaoioi ma le lotoa o ia talu ai ua ia iloa “ua saasaa ona po.”—Faaaliga 12:12.

O le ā le Vaifofō Mai le Atua?

Ua faaalia e le Tusi Paia le sauniuniga alofa a Lē na Foafoaina Mea ina ia togiolaina le fanau a tagata mai lo latou tulaga agasala. I le 1 Korinito 15:22, ua taʻu mai ai iā i tatou e faapea: “Faapei ona oti uma ia Atamu, e faapea foi ona faaolaina uma ia Keriso.” Na finagalo malie Iesu e afio mai i le lalolagi o se tagata lelei atoatoa ma faataulagaina lona soifuaga i le lalolagi ina ia togiolaina le fanau a tagata mai aafiaga o le agasala ma le oti.

O le iloaina o le māfuaaga ua maliliu ai faapea le vaifofō i faafitauli o le tagata, ua uunaʻia ai ma faamalosia le toʻatele ina ia latou vavae ese mai le puleaina e fualaau. Peitaʻi ua faia e le Tusi Paia nisi mea e sili atu na i lo le na ona fesoasoani mai ina ia tatou taʻitoʻatasi ma faafetaiaʻia le faafitauli o fualaau i aso nei. O loo taʻu mai e le Tusi Paia le taimi, pe a uma ona faamutaina taaʻiga a Satani, e faaiʻuina ai e faavavau faafitauli uma o le lalolagi, e aofia ai ma le faaaogāsesēina o fualaau.

O loo faamatalaina i le tusi o Faaaliga “le vaitafe manino o le vai o le ola, e manino e pei o le maa tioata, ua tafe ifo mai le nofoālii o le Atua ma le Tamai Mamoe.” (Faaaliga 22:1) O lenei vaitafe faafaatusa o loo faaata mai ai le sauniuniga a le Atua e ala mai iā Iesu Keriso, ina ia toe faafoʻisia le tagata i le olaga lelei atoatoa i luga o se lalolagi parataiso. O loo faamatalaina e le Faaaliga laau o le ola o loo tutupu lauolaola i autafa o le vaitafe, ona faapea mai lea: “O lau foi o le laau e faamalolo ai nuu.” (Faaaliga 22:2) O na laulaau faafaatusa ua fai ma ata o sauniuniga faamālōlō a Ieova ina ia toe faafoʻisia ai le fanau a tagata i le lelei atoatoa faaleagaga ma le faaletino.

O le iʻuga, o le a saʻoloto le tagata, e lē gata mai le faaaogāsesēina o fualaau, ae mai isi faalavelave ma faafitauli uma o loo pagatia ai o ia i lenei faiga o mea ua faaleagaina!

[Pusa/Ata i le itulau 9]

Pe e Iai ni Aafiaga Leaga o le Mariuana?

E feoloolo le aofaʻiga o ni atunuu o loo latou mafaufau e talia faaletulafono le faaaogāina o le mariuana, aemaise lava mo togafitiga faafomaʻi. Ua faaalia e faapea o lea fualaau e teʻa ai faalogona faafaufau ia e māfua ona o le togafitiga e taʻua o le chemotherapy, ma e tusa ai o faamaoniga ua iloa ai e fesoasoani foʻi i ē ua aafia i le AIDS ina ia foʻia ai le faafitauli o le lē manogi o se meaʻai. Ua faaaogāina foʻi e faateʻa ai tigā.

E ui e lē o iai se maliega autasi uma e tusa ai o iʻuga o suʻesuʻega sa faatinoina, ae o suʻesuʻega sa faia ma lipotia mai i le mekasini o le New Scientist ua faamaonia mai ai nisi o aafiaga leaga o le mariuana.

I se suʻesuʻega na faia e le iunivesite o Harvard, sa latou fefaatusatusaaʻi ai se vaega o ē ulaula mariuana i aso taʻitasi, ma se vaega o ē sa lē faapena le tele o la latou ulaula. Na latou maua ai, e itiiti lava se eseesega o aafiaga i le mafaufau masani o le tagata. Ae peitaʻi, i se suʻesuʻega sa faaautū i le tomai e mafai ai e se tagata ona fesagaʻia ni tulaga fou e tulaʻi mai, na iloa ai, e matuā itiiti lava se tomai faapena o iai iā i latou o loo malosi le ulaula mariuana.

E silia ma le 15 tausaga na faia ai e se isi iunivesite se suʻesuʻega i se vaega o tagata o loo ulaula e lē aunoa i le mariuana, ma se vaega o loo ulaula tapaa. O tagata ulaula mariuana e masani lava ona latou ulaina e taʻi tolu pe fā utufaga i le aso, a o tagata ulaula sikareti e pe ā ma le 20 pe sili atu foʻi sikareti e ulaina i le aso. Peitaʻi, e tutusapau lava le aofaʻiga o tagata mai na vaega uma e lua sa aafia i le tale ma le gaʻe. Na faaalia i ni suʻesuʻega sa faia i o latou māmā, le tutusa o sela ua faaleagaina o tagata i na vaega uma e lua.

E ui ina itiiti ifo le tele e ulaula ai tagata i le mariuana, ae ua iloa e faapea, o se utufaga e tasi e tusa ma le faatoluina le tele o le ta e maua mai ai, na i lo le ta e maua mai i se sikareti. E lē gata i lea, na taʻua e le New Scientist e faapea: “E sili atu ona matuā loloto le mānavaina o le asu e tagata ulaula mariuana ma e umi lava ona latou taofi loloa ai pea la latou mānava.”

Ua taʻua foʻi e faapea, o sela puipui ia e maua mai māmā o tagata e ulaula mariuana, e tusa ma le 35 pasene ua faaitiitia ai so latou malosi e mafai ona galulue ai e teteeina siama, na i lo sela o loo iai i māmā o tagata ulaula tapaa.

[Ē Ana le Ata]

U.S. Navy photo

[Pusa i le itulau 11]

“Se Tuuaʻiga e Sili Ona Tigā” mo Mātua

I se tusi mai le faatonu o se nusipepa a Aferika i Saute e taʻua o le Saturday Star, sa faaalia ai se popolega ona o le maoaʻe o le faatelega ua iai i le faaaogāsesēina o fualaau e talavou i Aferika i Saute, ma faapea mai ai:

“O le faia e a tatou fanau o lenei mea [le faaaogāina o fualaau] ua masani ona avea o se tuuaʻiga e sili ona tigā ai i tatou o mātua faapea foʻi le atunuu atoa. O vaiaso uma ua na o lo tatou pupū atu lava i le saʻiliga o tupe, ua alu uma taimi ma le malosi i le suʻeina o le manuia. E matuā manaʻomia e a tatou fanau o tatou mafaufau, lo tatou malosi. Po o tatou faaaluina ea se taimi aogā ma i latou? E faigofie lava le tuu atu iā i latou o se tupe e faamalie ai o latou loto ma aua ai neʻi toe faalavelave mai iā i tatou. E sili atu ona faigofie lenā na i lo le faalogologo atu iā i latou—i o latou popolega, o latou faamoemoega, ma o latou mafatiaga. I le pō a nanei, a o tatou saofafaʻi i le laulau o se faleʻaiga pe mālōlō e matamata le TV, po o le a tatou iloa ea mea o loo latou faia?”

Pe tatou te iloa ea mea o loo latou mafaufau i ai?

[Ata i le itulau 10]

E toʻatele ua uunaʻia e vavae ese mai le faaaogāsesēina o fualaau