Fualaau—O Ai e Faaaogāina?

TUSIA E LE TUSITALA O LE ALA MAI! I AFERIKA I SAUTE

“E INU fualaau uma lava tagata.” O le faamatalaga taatele lenā atonu e faaaogā ina ia faaosoosoina ai le tagata e talitonugofie i so o se mea, ina ia tofo i fualaau faasāina. Peitaʻi, e fuafua lava i le tulaga o loo tatou faamatalaina ai le upu “fualaau,” e ono moni upu e pei ona taʻua.

O le upu “fualaau” ua faamatalaina faapea: “So o se vailaau lava, pe na gaosia saʻo mai faalenatura, pe e ala i le tuufaatasia o ni mea e lē mai le natura, lea e mafai ona faaaogā e suia ai le auala e malamalama ai i mea, o faalogona, po o isi tulaga e fesootaʻi atu i le mafaufau.” O se faamatalaga lelei lenā ma le lautele o mea ua taʻua o fualaau e aafia ai le mafaufau ma uiga, e ui lava e lē o aofia ai i lenā faamatalaga le anoano o fualaau faafomaʻi ia o loo faaaogā mo maʻi o le tino.

O lona uiga, pe a fua i lenā faamatalaga, o se fualaau foʻi le ʻava malosi. E iai lona lamatiaga pe a lē fuafua lelei lona faaaogāina, lea ua manino mai le faateleina. O se suʻesuʻega na faia i kolisi ma iunivesite i se atunuu i Sisifo na iloa ai “o le soona inu vave ma inu tele i le ʻava, o se faafitauli sili lenā ona mataʻutia tau i fualaau faasāina i tagata aʻoga i iunivesite.” Na faaalia i le suʻesuʻega le 44 pasene o tagata aʻoga sa avea o nisi ua fai ma masani le soona inu vave ma inu tele. *

Ua talia faaletulafono le mauaina o le tapaa, e pei lava o le ʻava malosi, e ui ina o loo iai se mea oona malosi, e taʻua o le nikotini. I se manatu mai le Faalapotopotoga o le Soifua Mālōlōina a le Lalolagi ua taʻua ai le maliliu o le tusa ma le fā miliona tagata i le tausaga ona o le tapaa. Ae peitaʻi, o tagata o loo puleaina kamupani gaosi tapaa, o ni tagata e maumea, ua avea i latou ma tagata taualoa i le olaga. Ua sili foʻi ona pulea e le tapaa le ʻauulaula tapaa, atonu e sili atu na i lo le faaaogāina o le tele o fualaau faasāina.

I tausaga talu ai nei, e anoanoaʻi atunuu ua latou faasāina ona toe faia ni faasilasilaga faatosina mo tapaa ma faailoa atu foʻi isi faasāsāga. E ui i lea, o loo toʻatele  pea tagata e manatu i le ulaula tapaa o se gaoioiga masani ua taliaina e le lautele. O loo faaauau pea ona faaali mai e le ʻaufaitifaga le ulaula o se mea e sili ona matagofie. I se suʻesuʻega na faia e le iunivesite o Kalifonia i San Francisco, e tusa ai o ata tifaga na iai i tausaga o le 1991 e oo mai i le 1996 o loo sili ona tele le tupe e maua mai ai, na latou iloa ai, e tusa ma le 80 pasene o tama autū o ata tifaga o loo faaali mai o ni tagata e ulaula.

Ae Faapefea Fualaau ua Taʻua e “Lē Āfaina”?

E mautinoa lava le toʻatele o tagata ua manuia mai fualaau ma vailaau o loo faaaogā i togafitiga faafomaʻi, peitaʻi e mafai foʻi ona faaaogāsesēina. E iai nisi taimi e ono pei ai o le mea fua le tusi mai e fomaʻi o ni talavai o fualaau, pe tauanau malosi foʻi i latou e tagata mamaʻi ina ia tala atu mo i latou ni fualaau e lē manaʻomia ona latou inumia. Na taʻua e se tasi fomaʻi e faapea: “E lē o taimi uma o faaaluina ai e fomaʻi le taimi ina ia la vaʻili lelei ai ma le tagata maʻi le māfuaaga o āuga o loo ia faalogoina. Ua faigofie lava le fai atu, ‘Inu le fualaau lea.’ Peitaʻi e lē o matuā togafitia lelei le faafitauli autū.”

E oo lava i fualaau ia e lē tau tusia maia se talavai, e pei o asipulini ma paracetamol (Tylenol, Panadol), e mafai ona faapogaia ai ni faafitauli matuiā tau i le soifua mālōlōina pe a sesē ona faaaogā. E silia ma le 2,000 tagata i le lalolagi aoao o loo maliliu i tausaga taʻitasi ona o le faaaogāsesēina o paracetamol.

Pe a fua i la tatou faamatalaina o le uiga o le fualaau lea na muaʻi taʻua, o se fualaau foʻi la le caffeine lea e maua i le lauti ma le kofe, e ui e seāseā tatou manatu i ai faapena a o tatou inuina le ipu lauti po o le ipu kofe e sili ona tatou naunau i ai mo la tatou mālū o le taeao. Ma e matuā lē fetaui lava pe a faavasega uma mea inu e pei o le lauti ma le kofe, i le tulaga tutusa ma fualaau po o ni vailaau oona e pei o le heroin. Ua leai se eseesega ma le faatusatusa atu o se tamaʻi pusi lea e tausia e se aiga, i se leona feʻai. E ui i lea, e tusa ai o faamatalaga a nisi tagata atamamai i mataupu tau i le soifua mālōlōina, pe afai o lau masani e sili atu i le lima ipu kofe pe iva ipu lauti e te inuina i le aso, e mafai ona e āfaina ai. E lē gata i lea, afai e faafuaseʻi ona e matuā faaitiitia lou toe inuina o nei mea, e mafai ona e fesagaʻi ma aafiaga e tai tutusa ma aafiaga sa oo i se tamaʻitaʻi sa fai mona mausa le inu lauti, ae ina ua ia tuua lea masani, sa oo iā te ia le tulaga o le faasuati, tigā tutui o le ulu, ma le ilitatagofie i le malamalama.

Ae Faapefea le Faaaogāina Faasolitulafono o Fualaau?

O le mataupu o loo sili ona fai ma faafitauli, o le faaaogāina lea o fualaau i taaloga. Na matilatila mai lenā mataupu i le tauvāga taʻutaʻua a le lalolagi i tietiega uilavilivae (Tour de France) sa faia i le 1998, lea na tutuli ese ai mai le tauvāga ni tagata tietie uila se toʻaiva a le ʻau sa tulaga muamua i lea tauvāga, talu ai lo latou faaaogāina o fualaau ma vailaau mo le faaumiumiina o lo latou malosi e tauvā ai. E faia e tagata taaalo auala eseese e sao mai ai i suʻesuʻega pe o faaaogāina e se tasi ni fualaau po o vailaau. Ua lipotia mai e le mekasini o le Time e faapea, o nisi ua oo lava ina latou faia le mea e taʻua o le “‘fesuiaʻi o feʻauvai,’ o lona uiga e avatu le feʻauvai o loo ‘mamā’ o le isi tagata ma tuu i totonu o o latou tagāmimi (seʻi tulou) e ala atu i se faagaʻau, o se faiga e tele ina tigā.”

O lea e tatou te leʻi oo atu e talanoaina le tele ma le lavelave o fualaau faasāina ua faaaogā mo ni fuafuaga e peiseaʻī e “mapu” i ai. E aofia ai le mariuana, ecstasy (methylenedioxy-methamphetamine, po o le MDMA), LSD (lysergic acid diethylamide), fualaau e faagaee ai (fualaau e faateleina ai le gaoioi o musele o le tino pei o cocaine ma amphetamine), fualaau e faatoʻafilemu ai (fualaau e tau faatoʻatoʻa ai le mafaufau e pei o tranquilizer), ma le heroin. Ae aua foʻi nei galo ituaiga eseese o mea e sogisogi ai, e pei o le kelū ma le karasini, o mea na o loo matuā fiafia i ai talavou. O le mea moni, o nei mea e sogisogi ai, e lē o ni mea e faasāina ona maua e tagata ma o loo faigofie lava ona maua.

E mafai ona faasesēina i le manatu taatele e faapea, o le tagata ua ola i fualaau lea ua toe o paʻu ma ivi, e faatino lana masaniga lenei i totonu o se potu palapalā ua na ona nofo ai lava. E toʻatele tagata o loo faaaogāina  fualaau, o loo sologa masani lava a latou meafai o le olaga i aso taʻitasi, e ui atonu ua avea la latou masaniga ma itu e oo ai se aafiaga tele pe itiiti foʻi i le tulaga o o latou olaga. E ui i lea, e lē mafai ona tatou manatu māmā ai i le itu e sili ona mataʻutia o le faaaogāina o fualaau oona. E faamatalaina e se tusitala le “mafaia [e nisi tagata o loo faaaogāina le cocaine] ‘⁠ona tuiina’ se aofaʻiga tele o le cocaine i o latou tino i sina taimi puupuu lava, ma oo ai ina pei o latou tino o ni tino matagā i le tatui soo, ua tafetotoi ma totoulia solo.”

Ina ua mavae le faaitiitia na foliga mai sa iai i tausaga faaiʻuiʻu mai le 1980 seʻia oo i le 1989, ua toe faateteleina foʻi le faaaogāina o fualaau faasāina i le lalolagi aoao. Na taʻua e le mekasini o le Newsweek e faapea: “Ua matuā lofitūina tagata o loo pulea faigāmalo i le matuā faateteleina o le feaveaʻia faananā o fualaau faasāina, le oso maualuga aʻe o le faaaogāina o so o se ituaiga o fualaau ma vailaau, faapea le faaitiitia o tupe—ma faamatalaga—e manaʻomia mo le tau faaitiitia o le faafitauli.” Na taʻua e le nusipepa o le Star a Johannesburg, i Aferika i Saute e tusa ai o fuainumera faamaumau mai le malo e faapea, “e toʻatasi mai le toʻafā tagata o loo nonofo i Aferika i Saute ua matuā ola faalagolago lava i le ʻava malosi po o fualaau faasāina.”

Na taʻu mai e le UN Research Institute for Social Development e faapea, “o ē gaosia ma feaveaʻia faasolitulafono fualaau faasāina . . . ua matuā maopoopo lelei ona latou faatulaga a latou gaoioiga i le lalolagi aoao, ma teuina ni aofaʻiga tetele o polofiti e maua mai a latou fualaau faasāina i atunuu o loo tele ai faletupe, e mafai ona teu faalilolilo ai a latou teugatupe tetele ma tetelē foʻi ni tupe e toe maua mai i a latou tupe faafaigaluega. . . . Ua mafai nei e tagata o loo feaveaʻia faasolitulafono fualaau faasāina, ona faagaoioia a latou tupe o loo maua mai nei faiga e lē tusa ai ma le tulafono ina ia peiseaʻī o ni polofiti mamā, e ala i le faaaogā o auala faakomepiuta e mafai ai ona teu solo nei tupe i vaega eseese o le lalolagi, ae tau leai ni tulafono a malo e taofia ai.”

E foliga mai e toʻatele tagata Amerika e ono loteina le cocaine i aso uma lava, e ui ina latou faia ma le lē iloa. Na faamatala mai e se mataupu i le mekasini o le Discover e faapea, o le tele o tupe pepa a Amerika ua iloga ai tulaga o fualaau faasāina.

O le mea moni lava, ua avea le faaaogāina o fualaau, e aofia ai fualaau faasāina, o se mea ua taliaina lautele e tagata i aso nei, ua pei lava o se isi vala o le olaga i aso taʻitasi. I le manatu atu i le telē ua salalau atu ai le faatamaʻiaga e māfua mai fualaau faasāina, faapea foʻi le tapaa ma le ʻava malosi, ua manino mai ai la le fesili, Aiseā ua faaaogāsesē ai e tagata na mea? A o tatou mafaufau loloto i lenei fesili, o se taimi lelei lenei e tatou te toe tepa ai i o tatou lava manatu e faatatau i fualaau.

[Faaopoopoga i lalo]

[Ata i le itulau 3]

O le soona inu vave ma inu tele i le ʻava, o se faafitauli sili lenā i tagata aʻoga i iunivesite

[Ata i le itulau 5]

E toʻatele ua manatu e lē āfaina sikareti ma fualaau ia e manatu o ni mea e “mapu” i ai