Ua Toetoe Lava a Mou Atu

O SAM, o se korila e tolu tausaga le matua o loo i le ata, e mautinoa lava o loo foliga faanoanoa. Ae atonu e lē tatau ona faateʻia ai i tatou. Ua fasimatea e tagata tulimanu lona tinā, ua tuua ai o ia e aunoa ma ni mātua ma ua leai ai se avanoa e toe foʻi atu ai i lona siomaga faalenatura. Ae pagā lea, i le na o ni nai masina talu ona puʻeina le ata, ae mate loa Sam ona o se faalētonu i lona alāʻea. Ae e lē na o ia se korila ua faalētonu lona faasaoina.

O le soona faatamaʻia o lo latou nofoaga faalenatura ua tuua ai nei meaola i se tulaga lamatia o lo latou ituaiga. Talu ai o korila o loo fasimatea i nisi o nofoaga mo meataumafa, o tagata tulimanu o loo iai a latou fana faaonapōnei ua matuā lamatia ai lava le umi e mafai ai ona iai pea nei meaola. E ui o le lumanaʻi mo korila e foliga mai ua leai se faamoemoe, ae ua faapena foʻi ma isi ituaiga o meaola.

O se lipoti na saunia e le International Union for Conservation of Nature and Natural Resources (IUCN) ua faaalia ai se tulaga o le leai o se faamoemoe o le tele o meaola taaloa o le lalolagi. A o faagasolo ni nai tausaga ua tuanaʻi, ua tele atu ituaiga o meaola ua oo i se tulaga e lamatia ai lo latou iai pea, ma o le televave o le faaitiitia ua tulaʻi mai ai se popolega. O le IUCN, o se faalapotopotoga lea e na te siakiina le tulaga o loo iai le faitau afe o ituaiga o meaola, na tusia talu ai nei sa latou Lisi o Meaola ua Lamatia, ua faia ina ia faalauiloaina ai le silafia o le tulaga leaga ua lamatia ai nei le ola o meaola taaloa o le lalolagi.

E toetoe lava o le kuata o mamele uma, po o meaola i le lalolagi ia e faasusu a latou tama faatasi ai ma le tusa o le tasi vae valu o manulele, ua lamatia nei i le tulaga ua toetoe lava ina a mou atu. E na o le pau na o ituaiga o meaola ua mafai ona faia i ai ni faamaumauga. O le tulaga e tusa ai o le faasaoina o le tele o ituaiga o meaola i lo tatou paneta, o loo tumau pea ona lē iloaina.

 Afai o loo e faanoanoa ai i lenei tulaga malaia, o faapefea la faalogona o Lē na Foafoaina i tatou e faatatau i ai? Ua ia taʻua i lana Afioga, le Tusi Paia e faapea: “O ia te au manu uma i le vao matua.” (Salamo 50:10) O lea e mautinoa, e lē mafai ona ia lē amanaiaina le faatamaiaina ma le lē pulea o galuega a ona lava aao. I le tusi o Faaaliga, ua faamautinoa mai ai e le Atua iā i tatou e faapea o ia o le a “fano ai i latou o e o loo faafanoina le lalolagi.”—Faaaliga 11:18, NW.

O le puipuia e lē gata i ituaiga o meaola taaloa o loo i le paneta ae faapea foʻi ma lona siosiomaga faaeteetegatā, lea o loo tatou faalagolago uma lava i ai, o ni galuega faanatinati ia se lua o le a faia e le Malo o le Atua pe a ‘faia e le Atua ia fou mea uma lava.’—Faaaliga 21:5; Mataio 6:10.

 [Pusa/Ata i le itulau 28, 29]

Taika (Panthera tigris)

▪ Fua faatatau o le faitau aofaʻi o loo i lo latou siʻomaga masani: e tusa ma le 5,000 i le 7,500 (ua paʻū ai i lalo mai le tusa o le 100,000 i le senituri ua tuanaʻi)

▪ Lamatiaga autū: puʻeina ae lē tusa ai ma le tulafono, faaonāina, leai se nofoaga masani e mau ai, ma le tuueseeseina o taika.

[Pusa/Ata i le itulau 29]

Giant Panda (Ailuropoda melanoleuca)

▪ Fua faatatau o le faitau aofaʻi o loo i lo latou siʻomaga masani: 1,000⁠—o se tasi o meaola ua seāseā maua i le lalolagi

▪ Lamatiaga autū: e telegese lo latou fanafanau, ma le faatamaʻiaina o le vaomatua o ofe lea e faalagolago i ai mo meaʻai

[Ē Ana le Ata]

Foto: Zoo de la Casa de Campo, Madrid

[Pusa/Ata i le itulau 29]

Orangutan (Pongo pygmaeus)

▪ Fua faatatau o le faitau aofaʻi o loo i lo latou siʻomaga masani: pe tusa ma le 20,000

▪ Lamatiaga autū: mū o le vaomatua, tātuuina o laau, aveina e lē tusa ai ma le tulafono, ma le avefaananā mo fefaatauaʻiga

[Ē Ana le Ata]

Foto: Zoo, Santillana del Mar, Cantabria, España

[Pusa/Ata i le itulau 30]

Lesser (Red) Panda (Ailurus fulgens)

▪ Fua faatatau o le faitau aofaʻi o loo i lo latou siomaga masani: e lē o iloa, ae e foliga mai o loo fai ifo lona ituaiga ona o le faalegaina o lona siomaga e tagata ma le telegese o lo latou fanafanau

▪ Lamatiaga autū: aveina e lē tusa ai ma le tulafono, o le faaleagaina o le vaomatua o loo iai ofe, ma le faatataa o lafu a le ʻaufailafumanu i laufanua sa masani ona ola ai

[Ē Ana le Ata]

Foto: Zoo, Santillana del Mar, Cantabria, España

[Pusa/Ata i le itulau 30]

Goeldi’s Monkey (Callimico goeldii)

▪ Fua faatatau o le faitau aofaʻi o loo i lo latou siomaga masani: e lē o iloa (o lenei meaola na faatoʻā mauaina i le 1904)

▪ Lamatiaga autū: faatamaʻiaga o le vaomatua o le Amasone ma le toʻaitiiti o lo latou faitau aofaʻi o iai, lea e faigofie ai lava ona faaesea i latou

[Ē Ana le Ata]

Foto: Zoo de la Casa de Campo, Madrid

[Pusa/Ata i le itulau 30]

Red-Crowned Crane (Grus japonensis)

▪ Fua faatatau o le faitau aofaʻi o loo i lo latou siomaga masani: pe tusa ma le 2,000

▪ Lamatiaga autū: fetaui ma uaea eletise malolosi, faaleagaina o le nofoaga masani e tautuufua ai, ma le onanā

[Ē Ana le Ata]

© 1986 Steve Kaufman