Le Māfuaaga ua Fiu ai Tagata i le Olaga

“O gaoioiga taʻitasi e taʻitaʻia atu ai i le pule i le ola o loo iai ona lava uunaʻiga po o māfuaaga faapitoa: e matuā totino lava, e lē mailoa, ma e matuā mataʻutia.”—Kay Redfield Jamison, o se fomaʻi o le mafaufau.

“E PUAPUAGATIA i le ola.” O upu na sa tusia e Ryunosuke Akutagawa, o se tusitala lauiloa i le amataga o le senituri lona 20 i Iapani, a o leʻi pule i lona ola. Peitaʻi, na ia amataina na faamatalaga i upu nei: “O le mea moni, ou te lē manaʻo e oti, ae . . . ”

I le pei o Akutagawa, o le toʻatele o i latou ua pule i o latou ola e leʻi mananaʻo moni e feoti ae ua na ona mananaʻo “e faamuta po o le ā lava le mea o loo tupu,” o le faamatalaga lenā a se tasi o polofesa e suʻesuʻe i tulaga tau i le mafaufau ma amioga. O faaupuga o loo masani ona tusi na tusitusia e tagata e pule i o latou ola ua faaalia ai lenā tulaga. O faaupuga e pei o le ‘Ua ou lē mafai ona toe tatālia’ po o le ‘Aiseā e faaauau ai pea ona ola?’ ua faaalia ai se faanaunauga loloto e sola ese mai le ogoogo o tulaga pagatia o le olaga. Ae pei ona faamatalaina e se tasi o tagata atamai faapitoa lenā tulaga e faapea, o le pule i le ola ua “pei o le taumafai e togafitia se fulū i se pomu faaniukilia.”

E ui lava e eseese māfuaaga e pule ai tagata i o latou ola, ae o nisi o mea e tutupu i le olaga ua masani ona faapogaia ai le pule i le ola.

Mea e Faapogaia Ai

O se mea ua masani ai talavou o ē ua pulea e le atuatuvale ma oo ai ina pule i o latou ola lo latou faia faapea, e oo lava i ni tulaga e foliga mai o ni mea e faatauvaa i isi. Pe a latou lagonaina le tigā ma ua lē mafai ona fai i ai se mea, e manatu talavou i lo latou oti o se auala e taui ma sui ai i ē na faatigā iā i latou. O Hiroshi Inamura, o se tagata e poto faapitoa i le taulimaina o tagata e fia pule i o latou ola i Iapani, na ia tusi mai e faapea: “E ala i lo latou  oti, e faatāua ai e tamaiti se uunaʻiga faapea ia aʻoaʻia ai le tagata na faapuapuagatiaina i latou.”

O se suʻesuʻega talu ai nei i Peretania na faaalia ai e faapea pe a oo ina soona faileagaina tamaiti, e toetoe lava a fitu taimi e sili atu ai lo latou ono faia o le pule i le ola. O faalogona tigā o loo mafatia ai nei tamaiti e matuā moni lava. O se tamaitiiti e 13 tausaga le matua na nofo ma sisi o ia lava, na tuua se tusi ma taʻua ai igoa o tagata e toʻalima na faapuapuagatiaina o ia ma aveina faamalosi ni tupe mai iā te ia. Na ia tusi mai e faapea: “Faamolemole ia faasaoina isi tamaiti.”

O isi ua taumafai e pule i o latou ola pe a latou oo i faafitauli i le aʻoga po o faafitauli ina ua solitulafono, le mafatia ona ua faamutaina se faigāuō, le leaga o se lipoti mai le aʻoga, le oo i faalogona mafatia ona o suʻega, po o le faanoanoa i popolega e faatatau i le lumanaʻi. I talavou ua ausia togi maualuluga o ē atonu e taumafai ina ia lelei atoatoa mea latou te faia, e mafai e se mea e taofia ai le agaʻigaʻi i luma po o se lē taulau foʻi—pe moni po ua na o ni mafaufauga—ona ono oo ai i le taumafai e pule i le ola.

Mo tagata ua matutua, o faafitauli tautupe pe tau i le galuega, o tulaga masani na e faapogaia ai le pule i le ola. Ina ua mavae le tele o tausaga o le paʻū maulalo o le tamaoaiga i Iapani, na oo ai ina sili atu i le 30,000 i le tausaga i latou ua pule i o latou ola. E tusa ai ma le Mainichi Daily News, e toetoe lava o le tolu vaefā o tamāloloa i le va o le 40 ma le 60 tausaga na pule i o latou ola ma na latou faia faapea “ona o faafitauli e māfua mai i aitalafu, le lē taulau o pisinisi, le mativa, ma le leai o se galuega.” O faafitauli foʻi faaleaiga e ono oo atu ai i le pule i le ola. Na lipotia mai e se nusipepa i Finilani e faapea: “O tamāloloa i le va o le 40 ma le 60 tausaga na tatala talu ai nei a latou faaipoipoga” ua faia aʻe ai se tasi o vaega e aupito sili ona lamatia i le pule i le ola. O se suʻesuʻega na faia i Hagakeri na iloaina ai faapea o le toʻatele lava o teineiti e mafaufau e pule i le ola na ola aʻe i aiga malepelepe.

O le litaea ma maʻi o le tino o vala autū foʻi na o le faapogaia o le pule i le ola, aemaise lava i tagata ua matutua. E masani lava ona filifilia le pule i le ola o se auala e sola ese ai mai i le pagatia, e lē seʻiloga ona o se maʻi e oo atu ai i le oti, ae pe a manatu le tagata maʻi i ona puapuaga ua lē mafai ona tatalia.

Peitaʻi, e lē o tagata uma e tali atu i nei mea tutupu e ala i le pule i le ola. I le isi itu, pe a fesagaʻi le toʻatele ma ia tulaga mafatia, e latou te lē pule i o latou ola. Aiseā la, e manatu ai nisi o le pule i le ola o le tali lea, a o le toʻatele lava e lē o le tulaga lenā o iai?

Mea Moni o Loo Natia

“O le tele lava o filifiliga ina ia oti e faalagolago atu i le auala e faauigaina ai mea o loo tutupu,” o le faamatalaga lea a Kay Redfield Jamison, o le polofesa o suʻesuʻega tau i le mafaufau i le Johns Hopkins University School of Medicine. (Iunivesite o Aʻoga Tau Vailaau) Na ia faaopoopo mai e faapea: “O le mafaufau o le toʻatele o tagata, pe a oo ina sologa lelei lava, e lē faauigaina so o se mea e tupu faapea ua matuā faigatā tele ua sili ai le pule i le ola.” O Eve K. Mościcki, o le U.S. National Institute of Mental Health (Faalapotopotoga a le Malo mo le Soifua Mālōlōina Faalemafaufau i le Iunaite Setete), na ia mātauina faapea o le tele lava o vala—o nisi o loo natia i lenā taimi—e gaoioi faatasi e tataʻi atu ai i uiga fia pule i le ola. I na vala ua natia e aofia ai faalētonu tau i le mafaufau ma le lē mafai ona puleaina e le tagata se gaoioiga o loo faia, o uiga na fananau mai ma i tatou, ma le tulaga tau vailaau (chemistry) o le faiʻai. Seʻi o tatau iloiloina nisi o na mea.

O vala autū i nei tulaga, o faalētonu tau i le  mafaufau ma se masaniga ua lē mafai ona tuu, e pei o le lotomafatia, feteenaʻi o uiga, maʻi sikiso (schizophrenia), ma le faaaogāsesēina o le ʻava malosi po o fualaau faasāina. O suʻesuʻega na faia i Europa ma le Iunaite Setete ua faaalia ai faapea e silia ma le 90 pasene o tagata e pule i le ola e fesootaʻi atu i na faalētonu. O le mea moni, ua mauaina e tagata suʻesuʻe i Suetena e faapea o tane na leʻi iai na ituaiga o faalētonu, o le fua faatatau o le pule i le ola sa 8.3 i le faitau 100,000, ae o i latou na iai le lotomafatia na matuā oso maualuga i le 650 i le faitau 100,000! Ua faapea mai tagata atamamai faapitoa, o vala na mafua ai le pule i le ola e talitutusa lava ma atunuu i Sasaʻe. E ui i lea, e tusa lava pe tuufaatasi le lotomafatia ma mea tutupu e ono faaosofia ai le pule i le ola, ae e lē avea ai lea ma mea faapea o le a pule se tasi i lona ola.

O le polofesa o Jamison, o lē sa iai se taimi na taumafai ai foʻi o ia e pule i lona ola, ua ia faapea mai: “E foliga mai e mafaia lava e tagata ona onosaia le lotomafatia pe afai o loo iai pea le talitonuga faapea e mafai lava ona toe faaleleia mea.” Peitaʻi, na ia iloa e faapea a oo ina lē mafai ona toe onosaia le atuatuvale lea ua faateleina, o le a faasolo ina vaivai le malosi o le mafaufau e pulea ai uunaʻiga o le pule i le ola. Na ia faatusaina lea tulaga i le auala ua faasolo atu ai ina manifinifi taofi o le taavale ona o le oomi soo.

E tāua le iloaina o na uunaʻiga auā o le lotomafatia e mafai ona foʻia. E mafai ona toe faaleleia lagona o le lē maua o se fesoasoani. Pe a taulimaina vala ia o loo natia, e ono ese ai le auala e tali atu ai tagata i le loto tigā ma le lotomafatia lea e masani lava ona faaosofia ai le pule i le ola.

Ua manatu nisi faapea o uiga na fanau mai ma se tasi atonu e saosaolaumea i le vala lea e natia i le tele o pule i le ola. E moni, o loo iai se vaega a sela o se tagata o loo faia i uiga o se tagata, ma ua faaalia e suʻesuʻega faapea i nisi o talaaga o aiga e sili atu ona tele le pule i le ola ua tutupu mai ai na i lo isi aiga. Peitaʻi, “o le ono mafai ona pule i le ola ona o se talaaga o le aiga e lē faapea ai o le pule i le ola ua lē mafai ona ʻalofia,” o le faamatalaga lea a Jamison.

O le tulaga tau vailaau o le mafaufau e mafai foʻi ona avea ma vala o loo natia. I totonu o le faiʻai e faitau piliona neroni o loo faafesootaʻia feʻau i totonu o le faiʻai. I faatausiʻusiʻuga o neula, o loo iai nai tamaʻi avanoa e taʻua o le synapse lea e avatuina ai e neula faamatalaga e ala i vailaau. O le tulaga o loo iai se neula o loo avatuina faamatalaga, le serotonin, atonu o loo aofia ai i le tulaga tau paiolosi o se tagata, lea e na te ono pule ai i lona ola. I le tusi Inside the Brain o loo faamatalaina ai faapea: “O le maulalo o le tulaga o le serotonin . . . e mafai ona aveesea ai le fiafia i le olaga, faaitiitia ai le fiafia o le tagata i lona ola, ma faateleina ai lamatiaga o le maua i le lotomafatia ma le pule i le ola.”

Ae peitaʻi ane, o le mea moni, e leai se tasi e faapea ua tuupo e pule i lona ola. E faitau miliona tagata o loo faafetaiaʻia le loto tigā ma faalogona mafatia. O le auala o loo tali atu ai le mafaufau ma le loto i omiga ua taʻitaʻia ai nisi e fasiotia i latou lava. E lē na o māfuaaga ua uunaʻia ai loa i le taimi lea ae e tatau foʻi ona taulimaina vala ia o loo natia.

O lea la, o le ā e mafai ona faia e atiina aʻe ai se vaaiga saʻo lea e toe faaolaola ai le olioli ma le naunau mo le ola?

[Pusa i le itulau 6]

Le Ituaiga ma le Pule i le Ola

E tusa ai ma se suʻesuʻega i le Iunaite Setete, a o faalua i le faatolu taimi e foliga mai e ono taumafai ai fafine e pule i o latou ola na i lo tamāloloa, ae o tamāloloa e faafā taimi e foliga mai e taulau ai. Pe tusa e faaluaina le toʻatele o fafine na i lo tamāloloa ua oo i ai faalogona mafatia, lea e ono faamatalaina ai le toʻatele o fafine e taumafai e pule i le ola. Peitaʻi, o lo latou āfaina i le lotomafatia atonu e itiiti ifo le mataʻutia, o lea la e latou te liliu atu ai i auala e itiiti ifo le mataʻutia e faatino ai. O tamāloloa i le isi itu, atonu e taumafai e faaaogā mea e sili atu ona malolosi ma mataʻutia ina ia faamautinoa ai e latou te taulau ai.

Peitaʻi i Saina, e sili atu ona taulau fafine na i lo tamāloloa. O le mea moni, ua faaalia e suʻesuʻega faapea o le 56 pasene o fafine e pule i le ola i le lalolagi e tupu i totonu o Saina, aemaise lava i oganuu maotua. E faapea le faamatalaga o se tasi o māfuaaga o le uunaʻia o fafine e taumafai e pule i le ola lea ua taʻitaʻiina atu ai lava i le pule i le ola, ona o loo faigofie ona mauaina vailaau oona e faamamate ai iniseti.

[Pusa/Ata i le itulau 7]

Pule i le Ola ma le Tuua Toʻatasi

O le tuua toʻatasi o se tasi lea o vala e taʻitaʻiina atu ai tagata i le lotomafatia ma le pule i le ola. O Jouko Lönnqvist, o lē na faauluulu i ai se suʻesuʻega o le pule i le ola i Finilani, na ia faapea mai: “O le toʻatele o [i latou na pule i le ola], o o latou olaga i aso uma lava sa tuua toʻatasi. Sa tele o latou taimi avanoa na iai ae itiiti lava ni fesootaʻiga ma isi na maua.” O Kenshiro Ohara, o se fomaʻi tau i le mafaufau i le Hamamatsu University School of Medicine (Iunivesite o Aʻoga Tau i Vailaau i Hamamatsu) i Iapani, na ia faamatalaina e faapea o le “faaesea” sa i tua o le oso maualuga talu ai nei o le pule i le ola i tamāloloa i le va o le 40 ma le 60 tausaga i lenā atunuu.

[Ata i le itulau 5]

Mo tagata ua matutua, o faafitauli tautupe pe tau i le galuega o tulaga masani na e faapogaia ai le pule i le ola