Le Manatu o le Tusi Paia

O le ā le Tele o le Faapalepale o le Atua?

“AFAI UA ONOSAI LE ATUA, MA UA MATUĀ FAAPALEPALE I IPU O LE TOASA UA FAATATAUINA I LE MALAIA, INA UA FINAGALO O IA E FAAALI MAI AI LONA TOASA, MA FAAILOA MA AI LONA MANA.”—ROMA 9:22.

I LE talafaasolopito atoa ua faapalepale ai le Atua i le tele o mea leaga ma amioga leaga matuiā. I le silia ma le 3,000 tausaga ua mavae, na faapea mai ai ma le faanoanoa Iopu: “Se a le mea ua ola mai ai o e amio leaga, ua oo ina toeaina, ma faateleina lava o latou oloa? Ua faatumauina a latou fanau i o latou luma e faatasi ma i latou, ma e o tutupu ia te i latou ua faatumauina o latou o vaai i ai. Ua saogalemu o latou fale e leai se mea e matatau ai, ua le i ai foi i o latou luga le sasa a le Atua.” (Iopu 21:7-9) O isi o i latou na naunau i le faamasinoga tonu, e pei o le perofeta o Ieremia, na faaalia foʻi lo latou popole i le foliga faapalepale mai o le Atua i tagata leaga.—Ieremia 12:1, 2.

O le ā sou manatu? Po ua e lē malamalama ea i le faatagaina pea e le Atua o le amioleaga? Pe e te lagona i nisi o taimi e faapea ua tatau i le Atua ona faaumatia vave loa tagata amioleaga uma i le taimi lava lenei? Seʻi iloilo mea o loo fai mai ai le Tusi Paia e uiga i mea e muta mai ai le faapalepale o le Atua ma māfuaaga e faia ai faapea.

Aiseā e Faapalepale ai le Atua?

Muamua lava, e tatau ona tatou fesili e faapea: Aiseā lava ua faapalepale ai le Atua, o lē e maualuluga ana tapulaa amiotonu, i mea leaga? (Teuteronome 32:4; Sapakuka 1:13) Po o le uiga ea ua manatu māmā o ia i mea leaga? E matuā leai lava! Ia iloilo le faataʻitaʻiga o loo mulimuli mai: Seʻi faaata i le mafaufau se fomaʻi tipitipi o lē na te lē tausisia tulafono tāua tau i le tumamā ma ia faapogaia foʻi le tigāina tele o ana maʻi. Pe a faapea na galue o ia i se falemaʻi, pe o le a lē vave ea ona aveesea loa o ia? Ae e iai nisi o tulaga atonu e manaʻomia ai ona matuā faaalia le faapalepale. Mo se faaaʻoaʻoga, i se tulaga o ni faalavelave tutupu faafuaseʻi, pe atonu i se nofoaga o loo faia ai se taua, po ua lē talafeagai ea ona onosaia fomaʻi tipitipi a o galulue i ni tulaga e lē mautū ma lamatia, atonu po o le faaaogāina foʻi o ni meafaigaluega faafomaʻi e masani ona vaai i ai e itiiti so latou aogā?

I se tulaga tutusa, ua faapalepale ai ma le onosai le Atua i le tele o mea na te silafia e matuā lē talafeagai. E ui lava e ʻinoʻino o ia i le amioleaga, ae ua ia faatagaina e faaauau pea mo sina taimi. Ua iai ni māfuaaga lelei mo lona faia faapea. O se tasi o māfuaaga, ua faataga ai e lenei mea se taimi e foʻiaina ai e faavavau i le taimi lava e tasi luʻi ia na lāgā e le fouvalega a Satani i le faatoʻaga o Etena. O luʻi nei e fesootaʻi vavalalata atu i le saʻo ma le talafeagai o le auala e pule ai le Atua. E lē gata i lea, o le tumau o lona onosaia o mea sesē ua maua ai le taimi ma le avanoa mo i latou o loo aafia i mea leaga ina ia suia.

O se Atua e Alofa Mutimutivale ma Onosai

O o tatou uluaʻi mātua, o Atamu ma Eva, na auai atu i le fouvalega a Satani e faasaga i le Atua. Sa mafai ona faaumatiaina ma le tonu e le Atua i laʻua i lenā lava taimi. Ae na i lo lenā, na faaalia e ia lava le alofa mutimutivale ma le onosai, e faatagaina ai ma le alofa i laʻua ina ia faia ni a la fanau. Ae o ia fanau, ma le fanau uma a tagata na tupuga mai iā i laʻua, sa fananau mai i se tulaga agasala.—Roma 5:12; 8:20-22.

 Na fuafua e le Atua le faasaoina mai o le tagata mai lona tulaga pagatia. (Kenese 3:15) E ui i lea, i le taimi lava e tasi, ona e malamalama o ia i le auala ua aafia ai i tatou i le lē lelei atoatoa lea sa tuufaasolo mai iā Atamu, ua ia faaalia ai le tele o le onosai ma le alofa mutimutivale. (Salamo 51:5; 103:13) E ‘⁠tele lona alofa’ ma e nofosauni ma le finagalo malie e “matuā faamagaloina.” —Salamo 86:5, 15; Isaia 55:6, 7.

O Tapulaa o le Faapalepale o le Atua

Ae peitaʻi, o le a avea o se lē alofa ma se mea lē talafeagai mo le Atua le faatagaina pea o mea sesē e faaauau e faavavau. E leai se tamā alofa o le a tumau pea ona faapalepale i se tasi o lana fanau o loo faaauau pea ona faia ma le loto i ai ni mea e matuā faatigā ai i isi tagata o le aiga. O lea la, o le onosai o Ieova i le feagai ai ma le agasala, e faapaleniina pea e ala i isi uiga e pei o le alofa, atamai, ma le faamasinotonu. (Esoto 34:6, 7) O le taimi lava e faataunuu ai le fuafuaga o lona faapalepale, o le a faamuta ai loa lona faapalepale i mea leaga.—Roma 9:22.

Na faailoa mai ma le manino e le aposetolo o Paulo lenei mea. Na ia faapea mai i se tasi taimi: “O le [Atua] na tuufaitalia nuu uma lava o augātagata ua mavae atu, latou te sāvavali i o latou lava ala.” (Galuega 14:16, LT) I se isi taimi na taʻua ai e Paulo le auala ‘na faapalepale ai le Atua i ona po o le vālea’ i se vaega o tagata o ē ua lē usiusitai i ana tulafono ma mataupu silisili. Na faapea mai atili Paulo: “O loo fetalai mai nei [le Atua] i tagata uma i nuu uma lava ia salamo.” Aiseā? “Auā ua faatuina e ia le aso e faamasinoina ai le lalolagi ma le tonu.”—Galuega 17:30, 31.

Ia Maua Nei Aogā Mai le Faapalepale o le Atua

O lea, e mautinoa lava e leai se tasi e tatau ona faia se faaiʻuga e faapea e mafai ona ia lē amanaʻiaina tulafono a le Atua ae na ona ole atu lava mo le faamagaloga a le Atua pe a ia manaʻo e sola ese mai āuga o ana gaoioiga na fai. (Iosua 24:19) E toʻatele tagata i Isaraelu anamua na manatu e mafai ona latou faia faapena. Na leʻi suia o latou uiga. Sa latou misia le fuafuaga o le faapalepale ma le onosai o le Atua. Sa leʻi faapalepale pea e faavavau le Atua i a latou mea leaga.—Isaia 1:16-20.

Ua faailoa mai e le Tusi Paia e faapea ina ia ʻalofia le aafia i le faamasinoga mulimuli a le Atua, e tatau i se tagata ona “salamo”—o lona uiga, ia iloaina ma le faanoanoa lona tulaga lē lelei atoatoa ma le agasala i luma o le Atua, ma liliu ese moni mai le leaga. (Galuega 3:19-21) Ona mulimuli ane lea, e faavae i le taulaga togiola a Keriso, o le a faamagaloina o ia e Ieova le Atua. (Galuega 2:38; Efeso 1:6, 7) I lana taimi atofaina, o le a aveesea ai e le Atua āuga leaga uma o le agasala a Atamu. O le a iai “le lagi fou ma le lalolagi fou” lea o le a ia lē toe faapalepale ai i ‘mea o loo iai nei lea o loo alalaga mai ina ia faaumatia.’ (Faaaliga 21:1-5; Roma 9:22, Phillips) Maʻeu se iʻuga matagofie ona o le faapalepale uigaese, ae faatapulaaina, o le Atua!

[Ata i le itulau 29]

Na faatagaina e le Atua Atamu ma Eva ina ia maua ni a la fanau