Po o Saogalemu Lau Tamaitiiti?

E tusa ai ma le lipoti mai le U.S. National Highway Traffic Safety Administration (NHTSA), o le lavevea o taavale, o le pogai autū lea ua maliliu ai tamaiti i le va o le 5 ma le 14 tausaga le matutua. Ua faapea mai le lipoti a le NHTSA: “O le sili atu i le 50 pasene o tamaiti o ē e maliliu i taavale lavevea, e lē taofiofia. E lē gata i lea, e toʻafā mai le toʻalima tamaiti e lē o lelei ona taofiofia.”

Ua ofoina mai e le NHTSA le tele o fautuaga ma lapataʻiga mo i latou o loo ō faatasi ma tamaiti a o ave le taavale. E ui lava i le eseese o tulafono mai lea atunuu i lea atunuu, ma i lea setete i lea setete, o nei taʻiala atonu o le a avea ma mea e faatupu manatu mo le toʻatele o mātua ma i latou o loo vaavaaia tamaiti. Faamolemole seʻi siaki tulafono i lo outou vaipanoa ma faia le mea sili e te mafaia ina ia saogalemu ai lau pasese tāua!

FAUTUAGA MO LE SAOGALEMU

O le nofoaga aupito sili ona saogalemu mo tamaiti uma lava, o le nofoa i tua.

1 O tamaiti pepe meamea, e tatau ona tuu i se nofoa pepe mo le saogalemu e faasaga i tua i le nofoa pito i tua o le taavale.

2 O se tamaitiiti pe ā ma se tausaga le matua ma o lona mamafa e 20 pauna [9 kilokalama] pe a itiiti mai, e mafai ona tuu i se nofoa e faasaga i luma.

3 O se tamaitiiti ua 40 pauna [18 kilokalama] le mamafa, e mafai ona faaaogā se “nofoa maualuga” o loo faamauina i fusipaʻu o le taavale e fusi ai ogavae ma tauʻau.

4 O le tamaitiiti ua tusa ma le 80 pauna [36 kilokalama] ma ua fā futu iva inisi le maualuga [140 senitimita], e mafai ona amata faaaogāina le fusipaʻu o tagata matutua mo le saogalemu.

LAPATAʻIGA

E lē tatau ona nonofo tamaiti i nofoa pito i luma o le taavale mo pasese seʻi vaganā ua latou aulia le 13 tausaga le matutua. O taga ʻea i luma mo le saogalemu o pasese, e mafai ona faapogaia ai ni manuʻa tugā i tamaiti laiti ma pepe.

Pe a faaaogā se nofoa maualuga, e lē lava le saogalemu o le fusipaʻu lea e fusi ai ogavae pe afai e leai se talipupuni i luma o le nofoa lea mo le puipuiga o le tamaitiiti.

Aua neʻi manatu e faapea e lava le fusipaʻu lea e fusi ai le fatafata e puipuia ai se tamaitiiti laʻitiiti; i le taimi e tupu ai le faalavelave, e mafai ona pei e tipiina e le fusipaʻu le ua o le tamaitiiti, ma oo ai i ni manuʻa tugā pe oti ai foʻi.

Ia mulimuli lelei i faatonuga mo le faamauina ma le faaaogāina o nofoa mo tamaiti i taavale. E tusa ai ma le faamatalaga mai le NHTSA, “e oo lava i se nofoa e ‘sili ona saogalemu’ e ono lē mafai ona puipuia ai lau tamaitiiti pe afai e lē saʻo ona faaaogāina.”

[Ata i le itulau 31]

O le faapipiiina saʻo o le nofoa o se tamaitiiti e aofia ai le fusimauina o le fusipaʻu mo le saogalemu