Faaaogā ma le Atamai Fualaau Faafomaʻi

TUSIA E LE TUSITALA O LE ALA MAI! I AFERIKA I SAUTE

PE A tusi atu e lau fomaʻi ni fualaau, e mautinoa lava lona faia faapea ma se faanaunauga lelei, e faavae le tusia o lenei talavai mai i iʻuga o ana suʻesuʻega, le poto faafomaʻi, ma le poto masani. Ae ui i lea, e lē tatau ona faatalitalia e le tagata maʻi lana fomaʻi e amoina atoa le avega tauave o lona tulaga sologa lelei. O le tagata maʻi lava e iai le avega tauave e filifili ai po o ā togafitiga na te taliaina.

Pe a inuina ni fualaau e pei ona faatonuina, ia faitau lelei i taʻiala aogā mai lau fomaʻi:

● O fualaau uma lava, e iai o latou āuga lē lelei. E iā te oe la le aiā e iloa ai po o ā fualaau ua tusia atu mo oe ma o ā ni āuga lē lelei e ono tupu mai ai. Afai e lē faamatalaina atu e lau fomaʻi, aua e te faatalatū e fesili i ai. I le tele lava o tulaga, o le a sili atu aogā e maua na i lo o ni faalētonu. Ae e manaʻomia ona faailoa atu iā te oe ina ia mafai ai ona e faia se filifiliga atamai.

● E eseese lava aafiaga o tagata i fualaau. E lē mafai e lau fomaʻi ona taʻutino atu iā te oe ni aafiaga e ono āfaina ai oe ona o ni fualaau e tuuina atu. Ae afai e te nofo ilo i ni āuga lē lelei e leʻi faatalitalia e tulaʻi mai, faafesootaʻi loa lau fomaʻi.

● Ia fesili po o le ā le umi o le a e inuina ai fualaau. Ma ia iloa pe faamata e lē ono avea o se mea o le a e faalagolago pea i ai.

● Ia faaeteete i lou nofo lava o oe ma taofi le inuina o fualaau ona atonu ua e lagona ua e malosi. O le vave ona taofi o le inuina o fualaau, e mafai ona toe oo ai lou maʻi i se tulaga e sili ona leaga. Nai lo o lea, ia muaʻi faailoa i lau fomaʻi lea tulaga.

● Ia inu pea lava fualaau e pei ona faatonuina ai e le fomaʻi.