“O Nisi Taimi Ou te Faapea ai o Saʻu Miti!”

Na pupula toʻa atu Lourdes i le taulaga mai le faamalama o lona fale, o loo ufitia e ona tamatamaʻilima le tete o lona gutu. O ia o se fafine Amerika Latina o lē na puapuagatia mo le 20 tausaga i lana tane sauā o Alfredo. Ae sa iai se uunaʻiga iā Alfredo e faia se suiga. Peitaʻi, o loo faigatā pea iā Lourdes ona faamatala e faatatau i tigā o le tino ma faalogona sa ia onosaia.

“Na amata i le na o le lua lava vaiaso talu ona mavae la ma faaipoipoga,” o le tala lea a Lourdes i se leo mālū. “Na iai se taimi na toʻulu ai oʻu nifo e lua i lana tuʻi. I le isi taimi sa ou ʻalo ai, ae alu atu saʻo lava lana tuʻi tau i le kapoti tautau lavalava. Ae sa sili atu ona tigā ia igoa taufaifai. Sa ia lauina aʻu ou te ‘valea e lē aogā’ ma fai aʻu e pei e leai soʻu mafaufau. Sa ou manaʻo ou te alu ese, ae e faapefea ona ou alu ma ave tamaiti e toʻatolu?”

Na paʻi lemū atu Alfredo i le tauʻau o Lourdes. “O aʻu o le tagata e maualuga laʻu galuega,” o lana faamatalaga lea. “Na ou lagona le masiasi ina ua ou mauaina loʻu tusi samania ma tuuina mai ai se faatonuga ua sā lava ona ou toe faaoolima i laʻu avā. Sa ou taumafai e sui, ae e leʻi umi ae toe fai foʻi laʻu amio.”

Na faapefea ona suia tulaga o mea? “O se tamaʻitaʻi i le faleoloa i le tulimanu o ia o se Molimau a Ieova,” o le faamatalaga lea a Lourdes, ma ua vaaia nei i ona foliga lona toʻa. “Na ia ofo e fesoasoani mai iā te aʻu ina ia malamalama i le Tusi Paia. Sa oʻu aʻoaʻoina ai faapea e tāua tele fafine iā Ieova le Atua. Sa amata ona ou auai i sauniga a Molimau a Ieova e ui lava ina ita Alfredo i taimi muamua na ou auai ai. O se mea fou iā te aʻu le faaaluina o se taimi faatasi ma uō i le Maota o le Malo. Sa ou maofa i le iloaina faapea e mafai ona iai ni oʻu lava talitonuga, saʻoloto e faailoa atu, ma aʻoaʻoina ai foʻi isi. Sa ou iloa faapea e tāua aʻu i le Atua. Na aumaia e lenei tulaga le lototele iā te aʻu.

“Sa iai se suiga mataʻina o le a lē galo iā te aʻu. Sa auai pea Alfredo i le Misasā a le Katoliko i Aso Sa taʻitasi, ma sa lē malie i le mea o loo oʻu faia ma Molimau a Ieova. Sa ou tepa saʻo atu iā te ia ma faapea atu i se leo mālū ae mautinoa: ‘O le mea o loo e manatu i ai Alfredo, e lē o le mea lea o loo oʻu manatu i ai.’ E na te leʻi fasia aʻu! E leʻi umi lenā taimi ae ou papatiso loa, ma e na te leʻi toe fasia lava aʻu e tusa ma le lima tausaga talu mai lenā taimi.”

Ae na iai suiga e sili atu na oo mai. Na faamatala e Alfredo e faapea: “Pe tusa ma le tolu tausaga talu ona uma le papatisoga o Lourdes, na valaaulia ai aʻu e se tasi o Molimau a Ieova i lona fale, o lē e ma te faigaluega faatasi, ma na ia faamatalaina iā te aʻu ni mea e matuā mataʻina mai le Tusi Paia. E aunoa ma le taʻuina i laʻu avā, o lea ua amata la ma suʻesuʻega faale-Tusi Paia. E leʻi umi ae ma ō atu faatasi loa ma Lourdes i sauniga. O le tele o lauga na ou faalogo i ai sa faatatau atu i le olaga faaleaiga, ma sa masani ona ou lagonaina ai le masiasi.”

Sa fiafia Alfredo e vaai i tagata o le faapotopotoga, e aofia ai ma tamāloloa, o saluina le fale ina ua māeʻa le sauniga. Ina ua asiasi atu o ia i o latou aiga, na ia vaaia ai tane o loo fesoasoani i a latou avā i le fufuluina o ipu. O nei mea laiti na faataʻitaʻi atu ai iā Alfredo le auala e faaalia ai le alofa moni.

E leʻi umi, ae papatisoina loa Alfredo, ma o loo auauna nei o ia ma lana avā o ni faifeʻau faataimi atoa. “E masani ona ia fesoasoani iā te aʻu e faamamā le laulau pe a uma taumafataga ma teuina moega,” o le faamatalaga lea a Lourdes. “E faamālō mai o ia i laʻu kuka, ma tuu mai e fai aʻu filifiliga—e pei o musika ou te manaʻo e faalogologo i ai ma mea ma te mananaʻo e faatau mai mo le fale. O mea nei e lē taitai ona faia e Alfredo i le taimi muamua! Talu ai nei, o se taimi muamua lea na ia faatauina mai ai mo aʻu se teu fugalaau. O nisi taimi ou te faapea ai o saʻu miti!”

 [Ata i le itulau 10]

“Sa ou iloa faapea e tāua aʻu i le Atua. Na aumaia e lenei tulaga le lototele iā te aʻu”

[Ata i le itulau 10]

Sa fiafia Alfredo e vaai i tagata o le faapotopotoga, e aofia ai ma tamāloloa, o saluina le fale ina ua māeʻa le sauniga

[Ata i le itulau 10]

Na ia vaaia tane o loo fesoasoani i a latou avā i le fufuluina o ipu

[Ata i le itulau 10]

“Talu ai nei, o se taimi muamua lea na ia faatauina mai ai mo aʻu se teu fugālaau”