O le a Iai Meaʻai Paleni mo Tagata Uma

O LE taumafaina o meaʻai paleni, o se mea e fiafia i ai. Ae e pei ona tatou iloa, e lē faigofie i taimi uma ona maua na meaʻai. Ae o le mea e sili atu ona leaga, e faitau miliona tagata e latou te lē o popole po o saogalemu ma paleni lelei a latou meaʻai. E tasi lava le mea o loo latou pupū i ai, ia lava meaʻai e maua ina ia ola ai. Po o lona uiga o le tulaga lea o mea na finagalo le Atua ia iai?

Seʻi mafaufau i ai. Ina ua tuuina e le Atua le tamāloa ma le fafine i le lalolagi, pe na iai ea se mea na la popole ai e uiga i meaʻai? E matuā leai lava! Ua faapea mai le faamatalaga i le tusi o le Tusi Paia o Kenese: “Ua faatutupuina foi e Ieova le Atua i le fanua o laau uma e matagofie i le vaai, e lelei foi pe a ʻaina.” (Kenese 2:9) O lea, sa maua ai pea e Atamu ma Eva le anoanoaʻi o ituaiga eseese o meaʻai susua. Sa silafia lelei lava e le Atua o lē na foafoaina i laʻua mea tonu sa la manaʻomia e aai ai; sa ia silafia foʻi po o ā mea o le a faafiafiaina ai i laʻua. E moni, e tatou te lē o i le faatoʻaga o Etena i aso nei. Ae po ua suia ea e le Atua lana uluaʻi fuafuaga mo tagata ma le lalolagi?

E iai se mafuaaga lelei e tatou te talitonu ai e faapea, ua lē o toe umi se taimi, ona maua lea e tagata uma i le lalolagi ia le soifua mālōlōina lelei, ma le anoanoaʻi o meaʻai o le a  aunoa ma se faalētonu! E mafai ona avea lenei talitonuga ma fesoasoani malosi iā i tatou e mauaina ai se uiga paleni, e faatatau i le mataupu tau i meaʻai saogalemu i aso nei. O sea faamoemoe, afai e mautinoa ma maufaatuatuaina, e mafai ona fesoasoani iā i tatou e ʻalofia ai le faatupuina o ni manatu e popole vale po o le soona maelega naʻuā.

E faapefea ona tatou matuā mautinoa ua lē o toe umi se taimi ona suia atoatoa lea o le olaga? Ua iloa e tagata aʻoga mataalia o le Afioga a le Atua e faapea, ua tatou ola nei i “aso e gata ai” o lenei faiga o mea. O le faiga o mea o loo iai nei, o loo pulea e le atamai faaletagata, lea e lē o mautinoa ma ua faalagolago i le saʻilia o auala eseese ina ia taulau ai, i le tele o vala o le olaga. Pe a oo i auala eseese e saunia ai meaʻai, e matuā lē mautinoa lava po o saogalemu po o lamatia. O lenā lē mautinoa e māfua ai le fefe, le lē femalilieaʻi, ma le lē autasi.—2 Timoteo 3:1-5.

Ua folafola mai e Lē na Foafoaina tagata le suia o lenei faiga o mea i se faiga o mea e matuā fou lava. O le a faataunuuina lava lana uluaʻi fuafuaga ina ia avea le lalolagi atoa ma parataiso e pei o le faatoʻaga o Etena, ia faatumulia i se aiga faaletagata fiafia ma soifua mālōlōina lelei. I lenā taimi, o le a faatumulia ai le lalolagi i le atamai o le Atua, le malosi lelei atoatoa lea e autasia ai. (Isaia 11:9) O le a lē toe iai se atamai lē mautinoa o tagata. O le a aveeseina uma e le faiga fou o mea a le Atua masalosaloga uma e uiga i le saogalemu o a tatou meataumafa. Pe e lē talafeagai ea la le faia o se faaiʻuga e faapea, o le a malamalama foʻi le Atua lea na foafoaina tagata i o tatou manaʻoga tau i meataumafa?

Meataumafa Lelei Atoatoa Mai Lē na Foafoaina Mea

O loo iai i le Tusi Paia valoaga pupula e uiga i tulaga o le soifuaga o le a iai i le faiga o mea o loo fotuaʻi mai. Na tusia e le perofeta o Isaia e faapea: “Ona foai lea e ia (le Atua) le timu i āu saito, e te luluina ai i le eleele; i le ma mea e ʻai e tutupu mai i le eleele, e tupu tele ma le lelei; o le aso lea e tataa ai au manu i le taaga lautele. O povi foi ma asini o e galulue i le laueleele e aai i latou i mea e ʻai ua faamasimaina, o le mea ua saviligia i le asu ma le ili.”

Ua taʻua foʻi i le valoaga a Isaia e faapea: “E faia e Ieova o ʻau i lenei mauga mo nuu uma le faigaai o mea lelei, o le tausamiga o uaina ua tuu ai ʻalu; o mea e silisili ona lelei, o uaina ua faamaninoina sa tuu ai ʻalu.” Ua faamatalaina i le The New American Bible le fuaiupu mulimuli e faapea, “o se faigaai o meaʻai lololo ma uaina e sili ona lelei, meaʻai susua, lololo, ma uaina mamā, e sili ona lelei.”—Isaia 25:6; 30:23, 24.

Pe te fiafia i lenā olaga? Ua faamautinoaina i tatou e le valoaga a Isaia e faapea, o i latou uma e ola i le faiga fou a le Atua, o le a maua le anoanoaʻi o meaʻai. Po o le a saogalemu ea na meaʻai? Ioe, e mautinoa lava lenā tulaga. Ua faamautinoa mai foʻi e se tasi valoaga iā i tatou e faapea, o tagata o le Atua “e taitasi ma nofo i lalo o lona vine, ma lalo o lona mati; e leai foi se na te faamatau mai.” (Mika 4:4) O lenā saogalemu atoatoa, o le a faamaonia e le Malo Faa-Mesia o le Atua, lea o le a pule i le lalolagi uma lava i le lumanaʻi lata mai.—Isaia 9:6, 7.

O le a lē toe iai se masalosalo po o le a saogalemu meaʻai pe leai. I le tuu faafeagai ai, o le a tatou fiafia e fai atu le tasi i le isi: “Ālo la ia i lau taumafataga.”

[Faamatalaga faaopoopo i le itulau 22]

Ua lē o toe umi se taimi, ona maua lea e tagata uma i le lalolagi ia le soifua mālōlōina lelei, ma le anoanoaʻi o meaʻai o le a aunoa ma se faalētonu

 [Ata i le itulau 20]

Ua folafola mai e le Atua mea taumafa saogalemu ma e aunoa ma se faalētonu mo tagata uma