Le Aʻoaʻo Atu—Le Lagona Faamalieina ma le Olioli

“O le ā ua faaauau ai pea ona ou faiaʻoga? E ui e mafai ona avea le aʻoaʻo atu o se mea e faigatā ma vaivai ai, ae o le vaaia o tamaiti uma o loo naunau e aʻoaʻoina se mea ma vaaia lo latou agaʻigaʻi i luma, ua uunaʻia ai aʻu e faaauau pea.” —Leemarys, o se faiaʻoga i le Aai o Niu Ioka.

E UI i nei luʻi uma, o mea na tau faamaamulu ai, o tulaga na faanoanoa ai, e faitau miliona faiaʻoga i le lalolagi aoao na maumauaʻi pea i la latou galuega na filifilia. Ae o le ā ua uunaʻia ai le faitau afe o tamaiti aʻoga e tauivi ina ia agavaa o ni faiaʻoga, ae o loo latou iloa e ono lē talisapaiaina i latou? O le ā ua māfua ai ona latou faaauau pea?

Na faamatala mai e Inna, o se faiaʻoga Rusia, e faapea: “O se mea fiafia le vaaia o ē na avea muamua ma aʻu tamaiti aʻoga ua avea ma tagata matutua, i le faalogo atu o loo latou faamatala mai lo latou faamaonia o le aogā o mea na e aʻoaʻoina ai i latou. E ese le faalaeiau pe a latou faapea mai e latou te manatua pea taimi fiafia na latou faaaluina faatasi ma oe.”

O Giuliano, o se faiaʻoga o loo taʻua i le mataupu ua mavae atu, na faapea mai: “O se tasi o mea e sili ona faamalieina ai, o le iloa lea ua mafai ona e faatupuina le naunau o tamaiti i se mataupu. Mo se faaaʻoaʻoga, ina ua māeʻa ona ou faamatalaina se mea o le talafaasolopito, na faapea mai nisi o tamaiti: ‘⁠Faaauau pea. Toe faamatala mai nisi mea!’ O nei faamatalaga sa leʻi faatalitalia, e mafai ona faafiafiaina ai se taeao faalēmanuia i le aʻoga ona o lea ua e iloa ua e faatupuina ni lagona fou i ē iti. E matuā olioli le vaaia o le pupula tiotio mai o o latou mata ona ua latou malamalama i se mataupu.”

Na taʻua e Elena, o se faiaʻoga i Italia: “Ua ou talitonu i le sili atu o le faamalieina e maua mai i mea iti i aso uma, ni taulau iti o tamaiti aʻoga, na i lo ni iʻuga tetele, ia e seāseā lava ona tutupu.”

Na faapea mai Connie, o se tasi mai Ausetalia ua pe ā ma le 30 ma ona tupu ona tausaga: “O se taui tele le faaaluina e se tamaitiiti na matuā māfana atu iā te oe o se taimi e tusi ai se tusi e faaalia ai lona talisapaia o au galuega.”

Na faaleo mai e Oscar, mai Mendoza i Anitenitina, lenā lava foʻi lagona: “Pe a matou feiloaʻi ma tamaiti aʻoga i luga o le auala po o so o se mea lava ma faaalia mai lo latou talisapaia o mea na ou aʻoaʻoina ai i latou, ou te lagona le alu aogā o na galuega uma.” Na faapea mai Angel, o Mandrid o Sepania: “O le mea e sili ona faamalieina ai aʻu i le tuutoina atu o se vaega o lou olaga mo lenei galuega matagofie ae fitā, o le mea moni lava, o le vaaia o ē iti na ou aʻoaʻoina ua avea ma alii ma tamaʻitaʻi amiotonu, ua avea o se iʻuga o aʻu taumafaiga.”

O Leemarys lea o loo taʻua i le amataga, na  faapea mai: “Ou te lagona moni lava le matuā tāua o faiaʻoga. E iā i matou le tauaveina o se tiute tauave sili ona maoaʻe faapea. Ae pe afai e iʻu lelei—ni tamaiti se toʻasefulu pe na o le toʻatasi foʻi—ua e faataunuuina lau galuega, ma o se faalogona lea e sili ona manaia. Ia faia lau galuega ma le olioli.”

Pe na E Faafetai i Ou Faiaʻoga?

Po o oe ea o se tamaitiiti aʻoga po o se matua na faafetaia se faiaʻoga mo le taimi, taumafaiga, ma le naunau sa faaalia? Pe sa e lafoina atu ea se tusi faafetai? Na faamatala mai e Arthur se manatu tāua e faapea: “E faalaeiauina foʻi faiaʻoga latou pe a avatu i ai se faamālō. E tatau i le malo, mātua, ma tamaiti aʻoga ona matuā faafetaia i latou ma la latou auaunaga.”

Na tusi mai LouAnne Johnson o se tusitala ma o se faiaʻoga foʻi e faapea: “Mo tusi taʻitasi na ou maua sa faitioina ai se faiaʻoga, e faitau selau tusi sa aumaia se faamālō na ou maua, ia na faamautinoa ai loʻu talitonuga e sili atu le toʻatele o faiaʻoga lelei na i lo faiaʻoga lē lelei.” O le mea e mataʻina ai, ua toʻatele tagata latou te totogiina ni leoleo nanā ina ia “saʻilia sē na avea muamua ma o latou faiaʻoga. O loo mananaʻo tagata e suʻeina o latou faiaʻoga ina ia faafetai iā i latou.”

Ua faataatia e faiaʻoga se faavae aogā mo aʻoaʻoga a se tasi. E oo lava i polofesa sili i iunivesite maualuluga o loo nofoaitalafu i faiaʻoga o ē sa faaaluina le taimi ma taumafaiga e faatupuina ma atiina aʻe lo latou naunau mo aʻoaʻoga, le poto, ma le malamalama. Ua faapea mai Arthur i Nairobi: “O tagata maualuluga uma lava o le malo ma isi vaega tumaʻoti sa iai se taimi i o latou olaga na aʻoaʻoina ai e se faiaʻoga.”

Maʻeu se lotofaafetai e tatau ona iai mo na tamaʻitaʻi ma alii na faagaeeina lo tatou naunau fia malamalama, o ē na faapupulaina mafaufau ma loto, o ē na faaalia iā i tatou le auala e faamalieina ai lo tatou galala mo le poto ma le malamalama!

Pe e lē sili atu ea la ona tatau ona tatou matuā lotofaafetai mo le Aʻoaʻo Sili, o Ieova le Atua, o lē na faagaeeina upu o loo i le Faataoto 2:1-6: “Loʻu atalii e, afai e te talia aʻu upu, ma e teu i lou loto aʻu poloaiga, e uai atu ai ou taliga i le poto, e faasaga atu ai lou loto i le faautauta; afai lava e te valaau atu i le atamai, ma e leo tele atu i le faautauta; afai e te sailiili ia te ia, e pei ona sailiili i le ario; afai e te suesue i ai, pei ona suesue i le oloa lilo; ona e lagona ai lea o le mataʻu ia Ieova, ma e maua ai le poto i le Atua. Aua o Ieova na te foai mai le poto; mai lona fofoga le poto ma le faautauta.”

Mātau le upu lē mautinoa o le “afai” lea o loo faatolu taimi o loo maua ai i lenā mau faatupu manatu. Seʻi mafaufau, pe afai tatou te lotomalilie e taliaina le luʻi, e mafai ona tatou “maua ai le poto i le Atua”! E mautinoa, o le aʻoaʻoga sili lenā.

[Pusa i le itulau 19]

O se Matua Fiafia

O le tusi o loo mulimuli mai na mauaina e se faiaʻoga o le Aai o Niu Ioka:

“Ou te manaʻo e matuā faafetaia oe mai le taʻele o loʻu loto ma talisapaia mea ua e faia mo laʻu fanau. E ala i au aʻoaʻoga, ma le tomai, ua e fesoasoani ai iā i latou e ausia ni tulaga lelei lea ou te mautinoa e lē mafai ona latou maua pe ana lē seanoa oe. Ua e faafiafiaina aʻu ona o laʻu fanau—o se mea o le a lē mafai ona ou faagaloina. Soifua, S. B.”

Pe e te silafia se faiaʻoga e mafai ona e faalaeiauina?

[Ata i le itulau 18]

‘⁠E matuā olioli le vaaia o le pupula tiotio mai o mata o se tamaitiiti ina ua malamalama i se mataupu.’—GIULIANO, ITALIA

[Ata i le itulau 19]

‘⁠O se taui tele le faaaluina e se tamaitiiti o se taimi e tusia ai se tusi o le loto talisapaia.’—CONNIE, AUSETALIA