Le Manatu o le Tusi Paia

Pe Ao i Kerisiano Ona Faatalitalia le Puipuiga a le Atua?

E masani lava ona taʻua i le Tusi Paia le tomai o le Atua e puipuia ai ona tagata tapuaʻi mai mea e āfaina ai. Na faapea mai le tupu o Tavita: “Ieova e, ia e laveai mai ia te au ai le tagata amio leaga; leoleo mai ia ia te au ai le tagata faasaua.” (Salamo 140:1) I aso nei, o le toʻatele o tagata tapuaʻi o le Atua o ē na fesagaʻi ma faiga sauā, solitulafono, po o mala faalenatura, na toetoe lava a lē sao mai ai i le oti po o le faamanuʻalia ai. Sa taumanatu nisi pe faamata na puipuia faavavega i latou e le Atua mai na mea, aemaise lava talu ai, e iai tulaga sa lē sao mai ai isi tagata matataʻu i le Atua, ae na oo lava i ai ni mala tetele ma se maliu mataʻutia.

PE E puipuia e Ieova le Atua nisi tagata mai mea e āfaina ai ae lē faapea i isi? Pe ao ona tatou faatalitalia e faasaoina faavavega i tatou mai faiga sauā ma mala i aso nei?

Puipuiga Faavavega i Taimi o le Tusi Paia

E anoanoaʻi faamatalaga i le Tusi Paia e uiga i laveaʻiga faavavega ia na faia e le Atua i ona tagata tapuaʻi. (Isaia 38:1-8; Galuega 12:1-11; 16:25, 26) O loo faamatalaina foʻi i le Tusi Paia nisi o taimi sa lē faasaoina ai auauna a Ieova mai mala. (1 Tupu 21:1-16; Galuega 12:1, 2; Eperu 11:35-38) E manino lava la, e mafai ona filifili Ieova e tuuina atu le puipuiga mo se māfuaaga po o se fuafuaga patino pe afai e na te faafinagaloina. I lea, pe afai e lē laveaʻiina Kerisiano taʻitoʻatasi mai mea faigatā, e lē tatau la ona latou manatu e faapea, ua tuulafoaʻiina i latou e le Atua. E tatau ona tatou iloa le mea moni e faapea, e iai mea o le a tutupu, e oo lava i auauna faamaoni a Ieova. Aiseā ua faapea ai?

Le Pogai ua Tutupu ai Mea Leaga i Auauna Faamaoni a le Atua

O le tasi o māfuaaga, ona o le lē lelei atoatoa ma le agasala lea ua tuufaasolo mai iā i tatou mai iā Atamu ma Eva. I lea, ua tatou fesagaʻi ai ma tigā, mafatiaga ma le oti. (Roma 5:12; 6:23)  O le isi māfuaaga, ona o lea ua tatou ola i aso e gata ai. Ua faamatalaina e le Tusi Paia tagata i o tatou aso e faapea, “o e le lotoaiga, o e le ma faaleleia, o e faatuaupua, o e le taofi manao o le tino, o e faasaua, o e inoino i le amio lelei.” (2 Timoteo 3:1-5, LF ) O le faamaoniga o lenā mea, o le taatele lea o le toso teine, ave faamalosia o tagata, fasioti tagata, ma isi solitulafono sauā.

E toʻatele auauna faamaoni a le Atua o loo ola ma faigaluega faatasi ma tagata sauā, ma i nisi taimi e ono lamatia ai i latou i na tagata. Atonu e tatou te fesagaʻi ma se tulaga e faamataʻuina ai le ola ona ua tatou iai i se nofoaga sesē i se taimi sesē. E lē gata i lea, ua tatou tofo i le mea moni na tupu e pei ona faamatalaina e Solomona i lona faapea mai, “a o le tausaga ma le mea e tupu ai e oo ia te i latou uma.”—Failauga 9:11.

E lē gata i lea, na taʻua e le aposetolo o Paulo e faapea, o le a avea Kerisiano ma taulaʻiga o faiga sauā ona e latou te tapuaʻi i le Atua. Na ia faapea mai: “O i latou uma foi o e loto ina nonofo ma le amio Atua ia Keriso Iesu, e sauaina i latou.” (2 Timoteo 3:12) I ni nai tausaga talu ai nei, na faamaonia ai le moni o lenā mea i le tele o atunuu.

O lea la, e lē o sao mai ai tagata matataʻu i le Atua mai āuga o faiga sauā, solitulafono, mala faalenatura, po o le oti faafuaseʻi. O loo taumafai lava Satani e faaaogā le finauga e faapea, o loo puipuia e Ieova Ona tagata, o lea e latou te ola ai e aunoa ma le oo i ai o ni mala. (Iopu 1:9, 10) E lē o le tulaga lenā. Ae peitaʻi, e mafai ona tatou mautinoa, e tusa lava pe lē laveaʻiina faavavega e Ieova ona tagata mai se tulaga mataʻutia, ae na te puipuia lava ona tagata.

Le Auala e Puipuia ai e Ieova Ona Tagata i Aso Nei

E ala i lana Afioga, ua aumaia ai e Ieova taʻiala tauatua e puipuia ai ona tagata. O le tulaga faaleagaga ma le poto mai le Tusi Paia, e mafai ona tatou faia ai se faaiʻuga saʻo ma maua ai le tomai e mafaufau lelei ai, lea e mafai ona fesoasoani iā i tatou e ʻalofia ai mea sesē e lē tatau ma faia ai ni faaiʻuga atamai. (Salamo 38:4; Faataoto 3:21; 22:3) Mo se faaaʻoaʻoga, o le utagiaina o fautuaga a le Tusi Paia e faatatau i amioga lē mamā faaleituaiga, le matapeʻapeʻa, ita, ma faiga sauā, ua faasaoina ai Kerisiano mai le tele o mala. O le leai foʻi o ni fesootaʻiga vavalalata ma tagata amioleaga, e foliga mai, e mafai ona aveesea ai i tatou mai le iai i se nofoaga e ono tupu ai se mala—i le nofoaga sesē i le taimi sesē. (Salamo 26:4, 5; Faataoto 4:14) O i latou e ola e ōgatusa ma mataupu silisili o le Tusi Paia, e mafai ona olioli i se auala sili o le olaga, lea e masani lava ona iʻu i le mauaina o se soifua mālōlōina lelei faaletino ma le mafaufau.

O le mea e sili ona faamāfanafanaina ai, o le iloaina lea e faapea, e tusa lava pe faataga e le Atua mea leaga e tutupu, ae o le a ia saunia mo ona tagata tapuaʻi le malosi talafeagai ina ia mafai ai ona latou onosaia. Ua faamautinoaina i tatou e le aposetolo o Paulo e faapea: “Ua faamaoni le Atua, o le na te le tuuina atu outou i le tofotofoga e sili i se mea ua outou lavatia, a e sauni foi faatasi ma le tofotofoga se mea e sao ai, ina ia outou lava oono.” (1 Korinito 10:13, LT ) Ua folafola mai foʻi e le Tusi Paia “le matuā tele o le mana” e fesoasoani iā i tatou ina ia tatou onosaia ai mala.—2 Korinito 4:7.

E Faia e le Atua e Tusa ma Lona Finagalo

Pe ao i Kerisiano ona faatalitalia e laveaʻiina faavavega i latou e le Atua mai mala uma o loo faaloloʻi mai? E lē o lagolagoina e faamatalaga a le Tusi Paia lenā manatu.

E moni, e mafai e Ieova le Atua ona filifili e fesoasoani tuusaʻo mai i so o se tasi o ana auauna. Ma afai e talitonu se tasi e faapea na faasaoina o ia mai se mea e āfaina ai ona o le puipuiga tauatua, e lē tatau ona faitioina lenā tagata. Ae afai ua filifili Ieova e lē fesoasoani mai, e lē tatau ona manatu i ai e faapea, o se faailoga lea o lona lē fiafia mai.

Seʻi o tatou matuā mautinoa e faapea, e tusa lava po o ā faigatā ma tulaga e tatou te fesagaʻi, o le a saunia e Ieova le puipuiga tauatua mo ana auauna faamaoni, a lē o le aveesea o lea tulaga, o le aumaia o le malosi iā i tatou e tumau ai, ma pe afai foʻi tatou te feoti ai, o le a toe faatutūina mai i tatou i le ola e faavavau i lana lalolagi fou.—Salamo 37:10, 11, 29; Ioane 5:28, 29.