Toto Maualuga—Puipuiga ma le Togafitiga

TUSIA E LE TUSITALA O LE ALA MAI! I PASILI

SA MATUĀ fefe lava Maria! Ua teʻi lava ua pa mai le toto i lona isu. Ua ia faapea mai: “Sa ou manatu o le a ou oti.” Na taʻu atu e le fomaʻi iā Maria faapea o le toto maualuga ua māfua ai le pa mai o le toto i lona isu. “Ae o lea lava ou te malosi,” o le tali lea a Maria. “O le toʻatele lava o tagata e lē iloa e maua i le toto maualuga ona e leai ni faailoga e iloa ai,” o le tali atu lea a le fomaʻi.

O faapefea mai le malosi o le tafe o lou toto? Po o le auala o loo e soifua ai nei o le a māfua ai le toto maualuga i le lumanaʻi? O le ā e mafai ona e faia e pulea ai le malosi o le tafe o lou toto? *

O le malosi o le tafe a le toto o le malosi lea o loo tafe atu ai i puipui o alātoto. E mafai ona fuaina e ala i le faaaogāina o se paʻu e fusi i le ogalima lea e sulu atu i le masini e fuaina ai le toto. E lua faamaumauga e mafai ona mauaina ai. Mo se faaaʻoaʻoga: 120/80. O le numera muamua e taʻua o le systolic blood pressure lea e faailoa ai le malosi o le tafe o le toto i le taimi e tatā ai le fatu, ma o le numera lona lua e taʻua o le diastolic blood pressure, ona o loo faailoa ai le malosi o le tafe o le toto i le taimi e mālōlō ai le fatu. E fuaina le malosi o le tafe o le toto i milimita o le uʻamea faasuavaia siliva, ma e faavasega e fomaʻi ia tagata mamaʻi faapea e toto maualuga pe a maualuga atu le malosi o le tafe o le toto i luga aʻe o le 140/90.

O le ā e māfua ai ona oso i luga le malosi o le tafe o le toto? Seʻi manatu faapea o lea e te fuiina lou togālaau. E ala i le tatalaina o le paipa po o le faaitiitia o le pu i le gutu o le faagaʻau, ua e faateleina ai le malosi o le saosaoa o le vai. E faapena foʻi i le malosi o le tafe o le toto: O le tele e tafe ai po o le vaiti o alātoto e māfua ai le oso maualuga o le tafe a le toto. E faapefea ona maua le toto maualuga? E tele vala o loo aofia ai.

Vala e Lē Mafai Ona E Puleaina

Ua iloa e tagata suʻesuʻe faapea afai e maua ni tauaiga o le tagata i le toto maualuga, e telē foʻi la sona avanoa e maua ai i le toto maualuga. Ua iloa i numera faamaumauina faapea e taatele le maua o masaga e tutusa lelei foliga i le toto maualuga i lo masaga e eseese. O loo faasino atu se tasi o suʻesuʻega i le “malamalama i le māfuaaga ua maua ai i le toto maualuga,” lea ua faamaonia ai le iai o se elemeni e tuufaasolo mai lea e māfua ai le toto maualuga. O lamatiaga o le maua i le toto maualuga ua matuā maualuga tele, ua iloa faapea e faateleina pe a oo ina matutua ma e taatele foʻi i tane uli.

Vala e Mafai Ona E Puleaina

Faaeteete i au meataumafa! O le masima e mafai ona oso ai i luga le malosi o le tafe o le toto i nisi tagata, aemaise lava i tagata e maʻi suka, i latou e mataʻutia le tulaga o lo latou toto maualuga, tagata matutua, ma nisi o tagata uli. O le tele o le gaʻo i le toto e mafai ona faaputu ai gaʻo i puipui i totonu o alātoto (atherosclerosis), ma vaiti ai alātoto ma faateleina ai le malosi o le tafe o le toto. O tagata e silia i le 30 pasene e mamafa ai na i lo lo latou mamafa e  tatau ona iai, e faigofie ona aafia i le toto maualuga. Ua fautuaina e suʻesuʻega e faapea o le tele atu o le potassium ma le calcium e taumafaina e ono faaitiitia ai le toto maualuga.

O loo fesootaʻi atu le taumafa tapaa i le lamatiaga o le poloka o alātoto, maʻi suka, fatu pē, ma le pē o le itu o le tino. Ona o lenā tulaga, o le ulaula ma le toto maualuga o ni mea se lua e mataʻutia pe a tuufaatasi e mafai ona oo atu ai i le faamaʻi o le fatu ma alātoto. E ui ina eseese faamaoniga ua maua, o le caffeine—o loo maua i le kofe, lautī, ma meainu e iai le cola—ma mafatiaga i faalogona ma le tino e mafai foʻi ona faateleina ai le toto maualuga. E lē gata i lea, ua iloa e saienitisi faapea o le inu tele po o le faaauau ona inuina o le ʻava malosi ae lē gaoioi le tino e mafai ona oso ai i luga le toto.

Tausia o le Soifua Mālōlōina

O se mea sesē le faatalitali seʻi iloga ua maua i le toto maualuga ona faatoʻā faia lea o se gaoioiga. O le tausia o le soifua mālōlōina e tatau ona manatu mamafa i ai mai lava a o laiti. O le faaeteete i le taimi nei o le a mauaina ai se soifuaga e sili atu ona lelei i le lumanaʻi.

Na faamatalaina i le Iʻugāfono Lona Tolu a Pasili i le Toto Maualuga le faia o se suiga i le auala e ola ai, ina ia faaitiitia ai le malosi o le tafe o le toto. O ni fesoasoani aogā na i tagata e maua i le toto maualuga po o le lelei foʻi o latou toto.

Mo ē ua puputa tele, ua fautuaina e tagata suʻesuʻe taumafa paleni e itiiti ai le gaʻo, ʻalofia le taumafa e “vave” ai ona paʻū pauna, a o tausia se polokalame o faamalositino talafeagai. Ua latou fautua mai ia lē silia ma le tasi le sipunitī masina i le aso. * O le faia faapea, o lona uiga o le faaitiitia lea o le faaaogāina o le masima i meataumafa, le faaaogāina o meaʻai tuu ʻapa, meaʻai e pei o sosisi, fasi povi masima ma isi mea, ma meaʻai faaasu. E mafai foʻi ona faaitiitia le masima e ala i le ʻalofia o le toe faaopoopo o masima i le taimi o le taumafataga faapea ai ma le vaai lelei o le pepa o loo i tua o meataumafa e iloa ai le tele o masima o loo iai.

Ua fautuaina foʻi e le Iʻugāfono a Pasili le faateleina o le faaaogāina o le potassium ona e ono iai sona aafiaga i le “taofia o le toto maualuga.” Ona o le tulaga lenā, o meataumafa e tausia ai le soifua mālōlōina lelei e tatau ona aofia ai “meaʻai e itiiti  ai le masima ae tele le potassium o loo iai,” e pei o pī, fualaau faisua lanumeamata, faʻi, meleni, karoti, beetroot, tamato, ma moli. E tāua foʻi le tausia o le inuina o le ʻava malosi i sona tulaga talafeagai. Ua faaalia e nisi o tagata suʻesuʻe e faapea o tane e toto maualuga e lē tatau ona silia ma le tasi le aunese o le alcohol e faaaogāina i le aso; ma o fafine ma i latou e maulalo ifo le mamafa i le tulaga e tatau ona iai, ia faaaogāina ia lē silia ma le ʻafa o le aunese. *

Ua faaiʻu mai le Iʻugāfono a Pasili e faapea o le faamalositino e lē aunoa e faaitiitia ai le malosi o le tafe o le toto ma faaitiitia ai le lamatiaga o le maua i le toto maualuga. O faamalositino māmā, e pei o le savali, vili o le uila, ma le aau, mo le 30 i le 45 minute, e faatolu pe faalima i le vaiaso e aogā tele. * O isi vala e fesootaʻi atu i le tausia o le soifua mālōlōina e aofia ai le taofia o le taumafa tapaa, faaeteete i le iai o gaʻo i le toto (cholesterol ma triglycerides) ma le togafitia o le maʻi suka, ma ia lava le calcium ma le magnesium e taumafaina, ma pulea mafatiaga i le tino ma faalogona. E mafai ona oso i luga le toto i le faaaogāina o nisi o vailaau, e pei o vailaau e faaaogā i le isu e faafaigofie ai ona mānava, fualaau e tele ai le masima e faateʻa ai le manava tigā, fualaau e taofi ai le fiaʻai, ma fualaau o loo iai le caffeine e faateʻa ai le tigā o le ulu.

E mautinoa, afai e te maua i le toto maualuga, e sili atu ona lelei lau lava fomaʻi i le avatuina o fautuaga iā te oe i au meataumafa paleni ma masaniga, e tusa ai ma mea o loo e manaʻomia. Peitaʻi, po o le ā lava lou tulaga o loo iai, o le tausia o le soifua mālōlōina lelei mai lava a o laʻitiiti e aogā pea i taimi uma, e lē gata i tagata e toto maualuga ae mo tagata uma lava o le aiga. O Maria e pei ona taʻua i le amataga o lenei mataupu, sa tatau ona faia ni suiga i lona soifuaga. O loo ia inuina ni fualaau i le taimi nei ma soifua i se soifuaga e masani ai e ui lava i ona faafitauli tau i le soifua mālōlōina. Ae faapefea oe? A o faatalitali atu i le taimi o le a soifua mālōlōina uma ai tagata ma “le fai mai foi se tasi ua mau ai, Ou te maʻi,” ia puleaina pea le malosi o le tafe o lou toto!—Isaia 33:24.

[Faaopoopoga i lalo]

[Pusa i le itulau 24]

TOGAFITIA O LE TOTO MAUALUGA

1. Auala e Mafai Ona Fesoasoani e Pulea ai le Toto Maualuga

• Faapaʻū pauna

• Faaitiitia le faaaogāina o le masima

• Ia tele le taumafa i meataumafa e tele ai le potassium

• Faaitiitia le taumafaina o le ʻava malosi

• Faamalositino e lē aunoa

2. Isi Auala Atonu e Fesoasoani i le Puleaina o le Tafe o le Toto

• Ia faaaogā isi mea o loo iai i le calcium ma le magnesium

• O taumafa e leai ni aano o manu o iai ae tele ai alavalava

• Auala e faaitiitia ai popolega

3. Isi Auala e Fesootaʻi Atu i Ai

• Taofi le taumafa tapaa

• Faaitiitia gaʻo i le toto

• Togafitia le maʻi suka

• ʻAlofia fualaau e atili maualuga ai le toto

[Ē Ana le Ata]

Siiina mai i le Third Brazilian Consensus on Arterial Hypertension—Revista Brasileira de Clínica & Terapêutica.

[Ata i le itulau 25]

O le faamalositino e lē aunoa ma taumafa paleni e fesoasoani e puipuia ma puleaina ai le toto maualuga