Seʻi Fai sa Tatou Luau Faa-Hawaii

TUSIA E LE TUSITALA O LE ALA MAI! I HAWAII

O ʻULA fugalaau, o le hula, ma niu o loo feluelueaʻi solo i le savili. E taʻu loa Hawaii, o mea na e oo ane i lou mafaufau. O le faitau miliona o tagata asiasi mai vaega eseese o le lalolagi, e ō mai i Hawaii e matamata i nei mea ma aufaatasi i la matou luau ua lauiloa i le lalolagi, po o le ʻaiga faa-Hawaii. *

I se afiafi māfanafana toʻafimālie, a o agi mālie atu le savili mālū mai le sami, ae ua goto mālie atu nei le lā o Hawaii i le Vasa Pasefika. Faamolemole maliu mai e avea outou ma a matou mālō i se tasi o faletalimālō lea e masani ona faia ai le ʻaiga po o le luau faa-Hawaii. Ua ou vaai atu i lo outou sagisagi mai, ona o lea ua laʻeiina e alii ia ofutino aloha faapea ma muumuu mananaia o loo laʻeiina e tamaʻitaʻi. O lea ua tatou vave laʻitiiti, o le a seʻi o tatou ō la e maimoaina le auala o loo sauniunia ai a tatou meaʻai.

A o tatou ulu atu i le nofoaga o loo sauniunia ai le luau, ae faafeiloaʻia loa i tatou e se tamaʻitaʻi talavou o loo laʻeiina sona sakete e gaosia i lau o le tī. Ona ia tauaaoina mai lea iā i tatou taʻitoʻatasi se ʻula fugalaau ma se meainu faaatumotu e faamālū ai o tatou faaʻī ua galala i le fia feinu—ua talafeagai lelei lea ona o le umi o le aso na tatou maimoa solo ai po o le faalalā foʻi i matafaga lauoneone. Ua laulauina nei i o tatou luma i laulau ia meaʻai faapitoa pei o poi, umala, se ituaiga o oka iʻa e fai i le samani e taʻua o le lomilomi, ma isi meaʻai masani faaatumotu.

Ua taulaʻi atu la tatou vaai i se asuasu o loo alu aʻe i se faupuʻega palapala e tuese mai le vaega lea e aai ai. Ua tatou vaaia ni tamāloloa tutuʻa o loo suluina ni ie lavalava, o loo aveesea ma le faaeteete ia palapala ma lau o laau ma faaputu i le isi itu. E leʻi umi ae tatou vaaia loa se puaa tao ua aveesea mai le eleele. O le meaʻai autū lenei o la tatou luau. Atonu o loo e taumanatu, ‘Po o le tatou mea lea o le a ʻai? E manaia tele le manogi, ae e lē foliga faaoso fiaʻai pe mamā.’ Peitaʻi, a o e leʻi mafaufau e tulaʻi ese, seʻia oʻu faamatalaina le auala o loo sauniunia ai, ona e iloa ai lea faapea e leai se mea e lē mamā e faatatau i ai. Ou te iloa o le a e faataʻitaʻia le tofo o lenei taumafa faa-Hawaii faaanamua pe a e malamalama i le ituaiga o auala o loo kukaina ai nei taumafa.

O le ā le Imu?

O le imu po o le umu i le faa-Samoa sa faaaogāina e tagata Hawaii e faavelaina ai ituaiga meaʻai eseese. E faigofie lava ona malamalama i ai, o se ogaumu lea e fai i lalo o le palapala. E lē gata ina latou faavelaina ai puaa, ae faavela ai foʻi  ma iʻa, moa, ma tamaʻi manulele faapea ai ma umala, talo, ulu, ma ituaiga o meaʻai suamalie i le imu. E oo lava i lau o umala ma talo e faaaogā foʻi e fai ai le kuka.

Atonu e afīfī meaʻai laiti i lau o tī ma tao i le ausa. O le faiga lenei e taʻua o le laulau. O gaoioiga o le kukaina o meaʻai lea e faaaogā ai le imu e taʻua o le “kalua,” o lona uiga moni lava o “le pu.” O lea la, o la tatou meaʻai autū lava o le puaa kalua. O lenei auala mo le kukaina o meaʻai, o se tuufaatasiga o le taoina ma le faavelaina i le ausa, e pei ona o le a tatou vaai nei i ai.

O tagata Hawaii anamua e latou te eliina se pu e lava lona telē e ofi uma ai meaʻai mo le ʻaiga. E masani lava ona amata galuega i le taeaopō ina ia lava le taimi e saunia ai meaʻai mo le ʻaiga i le afiafi. E muamua tuu fafie i le pito i lalo o le pu, e tali tutusa ma le auala e sauniunia ai fafie mo se afi telē e tafu i fafo i le pō. Ona sauni lea o ni alala laiti e matamata ai, ona faaopoopo atu lea i ai ma ogāfafie e lava lo latou lapopoʻa e mumū ai mo le tolu i le fā itula.

E faatulaga faataamilo fafie i se laau o loo faatū saʻo. Mulimuli ane ona aveese lea o le laau, ona faatoʻulu atu loa lea o malala ola i lalo i le pu ina ia amata ai ona mumū le afi. E faia le afi e ala i le oloina o laau e lua. E tuuina maa uli i luga o fafie ma e faaaogā ituaiga o maa e lē pāpā pe a aasa. E eseese lava le lapopoʻa o maa e faaaogā, o nisi maa e pei o le lapoʻa o se moto ae o isi e pei o se polo e faaaogā i taaloga faataavale polo. E manaʻomia ni maa se tele, ona o maa ma malala e faalagolago atoa i ai le vela o le imu. E faavevela maa seʻia matuā mūmū i le aasa. Ona aveesea loa lea o ni fafie e leʻi uma ona mū.

Pe a uma ona tafitafi ese lefulefu mai maa, ona tuuina lea o nisi o maa i le manava ma le faaʻī o le puaa ua uma ona faamasima ina ia faamautinoa ai le vela lelei. O maa laiti atonu e tuuina foʻi i totonu o moa. Ona fola faagatasi loa lea o maa ma malala o totoe i le pito i lalo ma autafa o le pu ma ufi i vaovao ma lau o tī po o faʻi. E mafai foʻi ona tipitipi le pāfaʻi ma tauʻai i luga o maa. O lenā faiga e puipuia ai le aasavale o le umu lea e mū ai meaʻai ma mauaina ai le ausa lea o le a lē gata ina taoina ae faasūsū ai foʻi meaʻai.

Pe a lava laulaau e ufiufi ai maa o le umu, ona tuu atu lea i ai o le puaa i luga o laulaau, faatasi ai ma mea uma e faavela i le umu mo le taumafataga. Ona toe taufi uma lea i nisi tau. E fofola atu se siapo po o ni fala i luga o tau ina ia leai ai se avanoa e oo atu ai se palapala i meaʻai. Ona toe asu loa lea i ai o palapala e faamafiafia, ina ia aua nei alu ese le ausa mai le imu. I nisi taimi e sausau atu i ai ni vai i luga o le imu ina ia faasūsū ai pea. E iai taimi, e sulu atu ai i le imu se fasi ofe e pu totonu pe afai e manaʻomia ona toe faaopoopo atu i ai ni vai.

O le taimi e tao ai e faalagolago i vala eseese, e pei o le tele ma ituaiga o meaʻai o loo tao i le imu  ma le tele o maa sa faaaogā. Atonu e tele ni itula e manaʻomia ina ia vela lelei ai se puaa, e faalagolago i lona telē. Pe a iloa ua tatau ona vela le imu, ona aveese loa lea o palapala, sosoo ai ma fala ma lau, ina ia iloa atu taumafa ua vela. Ona tuu loa lea o meaʻai i mea e tatau ona tuu i ai ma faamaalili, ona laulau loa lea. O aano o manu e leʻi vela lelei e tipi ese ma faavelaina i se isi taimi po o se isi auala, pei o le tunu po o le saka.

Ona sa leai ni mea e tai pei o ulo e faavela ai meaʻai i aso anamua, o meaʻai la sa manaʻomia ona saka, na tuuina i se tanoa laau e iai ni vai, ona tuu lea i totonu o ni maa vevela. O aano mata o manu e mafai foʻi ona faamasima, ina ia umi ai pea ona lelei mo le faaaogāina i le isi taimi. Ona o le kukaina o meaʻai e tele gaoioiga e fai ai ma e mamafa, o lea o tamāloloa e faia lenā tiute. E manino la māfuaaga na faaaogāina ai pea lava pea le imu. E masani ona faia i se nofoaga e malu lelei, ina ia fai ma umukuka tumau mo le faaaogāina i taimi e leaga ai le tau.

Le Imu i Aso Nei

O le a e mātauina i la tatou luau i le aso lenei e leʻi telē lava se suiga o le faiga o le imu. Atonu e faaaogā se uaea valavala e tuu ai le puaa a o aveese mai i le pu, ona o le ituaiga o auala lea e taoina ai meaʻai e vela lelei ma faigofie ai lava ona malepe le puaa. Ua suia e taga ia fala ma siapo. E ui i na suiga laiti, ae o loo tumau pea ona tausia le faiga o le imu e ui i le tele o isi suiga i le aganuu faa-Hawaii.

Pe a uma ona aveese aano mai ponaivi, e mafai ona toe faaopoopo atu i ai ni masima e tusa ma le tofo a le tagata lava ia. O lea la, ua saunia lelei le puaa mo le taumafataga. Ia seʻi amata loa le luau! E pule lava oe pe e te fia nofo i inei i le fala ma e tausami ai po o le nofo i se laulau faa-Palagi e iai ni nofoa. Po o le ā lava le tulaga e te filifilia e fai, ae e matou te iloa o le a e fiafia ona sa e nofo mo la tatou taumafataga.

[Faaopoopoga i lalo]

[Pusa i le itulau 31]

E te Lē Tau Eliina se Pu

Afai e te manaʻo e faataʻitaʻi lenei taumafa manaia faa-Hawaii, o le a foliga mai la e te ono sau i Hawaii mo le luau. Ae afai e te manaʻo e fai sau lava luau tai pei o le auala o loo faia ai, e mafai lava ona e kukaina lau puaa i le faiga faa-Hawaii i lau ogaumu.

E oo lava foʻi i inei i Hawaii, e lē o i matou uma e maua le taimi e fai ai se imu pe a matou mananaʻo e taumafa se puaa i le faiga faa-Hawaii. O lea, ua matou faia ai ni fesuiaʻiga ina ia faasaoina ai le taimi ma gaoioiga. Na i lo le faaaogāina o se puaa atoa, e mafai ona faaaogā se alaga puaa. A manaʻo i aano o manu e tau leai ni mea lololo, e te ono faaaogā la le moa po o le pīpī. Po o le ā lava le aano o le manu e te faaaogā, ia faaaogā le suāvai faaasu e tasi le sipuni tele e olo ai pe tusa e tasi le pauna [0.5 kilokalama] o le aano o le manu. O lenei mea faamanogi meaʻai o le a mauaina ai e le aano o manu le manogi ma le tofo faaasu.

Afai e mafai ona e mauaina ni lau o le tī, ia afīfī ai le aano o le manu. Ia tuu i totonu o se ulo alu i le eletise ma ki i se vevela maulalo ina ia tali tutusa ma le vevela o le imu. Afai e leai sau ulo eletise e alualu lemū mo le kukaina o meaʻai, e mafai lava foʻi ona faaaogā lau ogaumu o loo iai. Ufiufi lau meaʻai i ni pepa foil pe a uma ona afīfī i lautī ina ia taofia ai le sua. Ia faalaʻitiiti le vevela o le ogaumu i le 325 tikerī Fahrenheit, [160°C] ma kuka seʻia oo ina vela lelei. E tatau ona faigofie ona paʻūʻū ese le aano mai le ponaivi. Tipitipi le aano o le manu, ma saasaa i ai le sua, e faasūsū ai. O lea la ua vela lau puaa kalua sa fai i lau ogaumu mo lau luau.

Pe a uma ona faataʻitaʻi lenei auala faa-Hawaii mo le faia o le kuka, atonu o le a uunaʻia ai oe e te sau i inei ma e olioli ai i le mea moni lava.

 [Ata i le itulau 29]

Aute mūmū

[Ata i le itulau 29]

O le hula

[Ata i le itulau 29]

Meaʻai masani faaatumotu e aofia ai le poi, umala, ma le oka iʻa e fai i le samani

[Ata i le itulau 29]

Se faafeiloaʻiga faaleaganuu i ʻula fugalaau

[Ē Ana le Ata]

Ron Dahlquist/SuperStock

[Ata i le itulau 30]

Aveesea o le puaa tao mai le “imu”