Seleseleina o le Atinaʻe e Fai Apaʻau

TUSIA E LE TUSITALA O LE ALA MAI! I COSTA RICA

O LENEI atinaʻe e fai apaʻau! Ioe, e saʻo lau faitau, o le seleselega a lē ana le atinaʻe e fai apaʻau. O le mea moni, o le faifaatoʻaga lelei e na te iloa o lana galuega e taulaʻi atu i le mauaina o ni fua lelei o lana atinaʻe. O le tulaga foʻi lea e faatatau i le tagata e iai le atinaʻe e fai apaʻau, e mataala i le puipuiaina mai manu e faatamaʻia ai e pei o iniseti, apogaleveleve, ma manufelelei. E tele atu ana galuega e fai i le taimi o le seleselega, a o ia taumafai e putiputi ana fua neʻi maumau atu lea na ia galue mamafa e tausia i lenā taimi atoa. Afai e manuia, o lana atinaʻe o apaʻau ia e sili ona matagofie i le lalolagi, o le a mauaina i le faitau afe maila (kilomita) mai le mea na fofoaina ai. O le ā lenei atinaʻe mataʻina? Ioe, e saʻo lelei lau mate—o pepe.

O le faafaileleina o pepe o se galuega e matuā tāua tele. E saunia ai ma le tomai tele se auala e sili ona lelei e fesoasoani e faasaoina ai ituaiga eseese o pepe. O lea, po ua lē tele la ni fesili ua oo mai i lou mafaufau? Mo se faaaʻoaʻoga, o le ā tonu lava le mea e taʻua o le atinaʻe pepe? E faapefea ona galueaʻiina? Ma o le ā lona fuafuaga? A o leʻi taliina nei fesili, seʻi o tatou iloiloina pe na faapefea ona amata mai le faafaileleina o nei meaola faaeteetegatā.

Na Amata i Saina

Sa avea ma mea e masani ai tagata Saina mo le faitau senituri le faafanafanau o lelefua lea e faapitoa lava mo le gaosiga o le silika. Peitaʻi, e leʻi leva talu ai nei ona tulaʻi mai le manaʻoga mo le faia o ni atinaʻe pepe. I tausaga mai le 1970, na faia ai se faaaliga o pepe ola i le motu o Guernsey, i le isi itu o le talafatai o Egelani.

O le fuafuaga e sili ona lelei o taumafaiga na faia i Guernsey o le toe faaleleia lea o se vaomatua o le teropika ma ia faatumulia atoa i pepe, o le felanulanuaʻi o o latou lanu ma mamanu, e matuā faamatagofieina ai lava le vaomatua. E tatau ai la, ona aveina atu pepe mai le nofoaga o le teropika lea e masani ona ola aʻe ai. Ae e faapefea ona mauaina ni pepe o le teropika (o nisi ituaiga e na o le lua i le tolu vaiaso e ola ai) e auina ola atu e aunoa ma le mamate, i nofoaga e faitau maila le mamao mai le atunuu na ola aʻe ai? O i inā na mapuna aʻe ai le manaʻoga mo le faafaileleina o pepe mo fefaatauaʻiga.

Le Auala e Faagaoioia ai Lenei Atinaʻe

O le mauaina o se avanoa e te vaaitino ai i le faagaoioia o lea ituaiga o atinaʻe e matuā mataʻina lava. O le vaai latalata atu i le felanulanuaʻi o  apaʻau o pepe o se vaaiga e matuā maofa ai lava. Na asiasi atu le sui o le Ala Mai! i le Atinaʻe Pepe aupito telē i Costa Rica i Amerika Tutotonu, lea e auina atu i fafo lea ituaiga o atinaʻe. O lenei atinaʻe e lē gata na te faatauina atu i fafo ia piupa (pupae) lea e taʻua e isi o le mulipuni ae o loo iai foʻi se polokalame tau aʻoaʻoga mo i latou o loo mananaʻo e fia iloa atili e faatatau i le faataamilosaga o olaga o pepe ma suʻesuʻega e faatatau i o latou olaga.

A o e ulu atu i le mea o loo iai se atinaʻe pepe o loo siʻomia faataamilomilo, o le a e maofa i le vaaia o le faitau selau o pepe o loo felelei solo i ou autafa, e mananaia o latou lanu eseese, o nisi o loo felelei solo agaʻi i lalo, ae o isi o loo faapepepepe solo. O nei meaola felanulanuaʻi e lē amanaʻia lou iai i inā a o faaauau ona faia a latou gaoioiga masani o le aai, feusuaʻi, ma le tuufua. O le a faapefea la ona e lē maofa? O le vaaia ma le manogi o laau o loo tuufua ai pepe pei o fugalaau o le vao, ma ituaiga o faʻi, o le a oo ai ina e iloa faapea o na mea o ni meaʻai ma o ni faamoega o pepe.

O lenei atinaʻe ua puipuimaluina lelei, ua tausia ai ma le saogalemu fua ninii o pepe mai le ʻaina e manu. I togāvao e ola ai pepe, e masani lava ona sao mai na o le 2 pasene o fua uma na tuuina mai le taimi e tuufua ai seʻia oo ina matutua, ae i nofoaga e saogalemu ai pei o Atinaʻe Pepe, e oo atu le faatelega o fua e faasaoina i le 90 pasene.

E manaʻomia ni laau e talafeagai ina ia lelei ai ona fanafanau ma tutupu aʻe ai pepe. O lea, o loo tele laau o loo iai mo pepe fafine e tuufua ai ma aai ai foʻi ma katepila. E aai pepe ua matutua i sua suamalie o fuga o laau. E tasi lava le ituaiga o pepe e tuufua i se ituaiga o laau e tasi, ma o le laau foʻi lenā e ʻai ai le katepila. O lea, e matuā tāua le tele o ituaiga o laau eseese i le faatoʻaga i nofoaga faapenei mo le tuufua ai o pepe.

O le a tuuina e le pepe fafine fua e 100 po o le sili atu foʻi i le taimi e tasi. O o latou fua e pei o ni matāua ninii pei o le laʻitiiti o le periota i le faaiʻuga o lenei fuaiupu. E lē gata ina tuuina uma ona fua i le laau o loo tautuufua ai, ae o ituaiga taʻitasi o pepe e tuuina ona fua i se vaega faapitoa lava o le laau o loo tautuufua ai. O lea, e mafai ai e le tagata e ana le atinaʻe ona vave mauaina fua, aveesea, ma teuina. O aso uma lava e siakiina ai laau po o iai ni fua o pepe, ma o aso uma foʻi e siakiina ai fua po o ua fofoa. Pe a ō ese katepila mai fua, e latou te toe ʻaia ia atigi o fuāpepe. I le Atinaʻe Pepe, e tuuina atu ai loa ia katepila i laau o loo i totonu o ni tamaʻi pusa lea e faalagolago atu i ai mo le mauaina o meaʻai. E matuā tāua tele le faamamāina o pusa a o faagasolo le olaga atoa o le katepila, a lē mamā e mafai ona tutupu ai faamaʻi ma mamate ai.

Pe a uma le suiga lona tolu, ua alu ese mai ma le atigi, e na o le pau lava le mea e fai e le katepila o le ʻai. E faapea le faamatalaga, afai e pei le faatupulaʻia o le mamafa o le tamaitiiti pepe e ono pauna e pei o le vave e tupu aʻe ai le mamafa o le katepila, o le a oo atu le mamafa o le tamaitiiti pepe i le valu tone i le iʻuga o le lua vaiaso!

O lona lima ma o le suiga mulimuli foʻi lea, e masani lava ona pipii atu le katepila i se lālā po o le tumutumu o le pusa, ma taumafai ai ma le tomai e aveesea o latou paʻu malō i lalo ifo, ma o lea la ua oo i le tulaga e taʻua o le piupa. O le taimi la lea e manaʻomia ai le mataala o lē ana le atinaʻe ina ia mauaina iʻuga lelei.

 E manaʻomia ona aoina piupa i aso uma, auā e na o le pau lenā o le auala e iloaina ai lo latou matutua. O piupa, i le va o le 40 ma le 100, e teuina ma le faaeteete i pusa pepa i le va o vavae. O tagata o loo faia atinaʻe pepe, ma i latou o loo faatauina atu i fafo e ao ona faia loa ni gaoioiga i totonu o aso e sefulu, lea e aofia ai le auina atu i vaa ma le tufatufaina i tagata e faataua. Afai e lē māeʻa felaʻuaʻiga i totonu o le taimi faatulagaina, o le a ō mai loa i fafo pepe ae leʻi taunuu ma mamate ai. Afai e manuia le feaveaʻiina, o le a ō ese pepe mai le tulaga piupa i le faitau afe maila le mamao mai lo latou nofoaga na iai ma le lē iloaina ua suia nei lo latou nofoaga. E auina atu e Atinaʻe Pepe le tusa ma le 4,000 i le 6,000 piupa i le masina i pisinisi i le lalolagi atoa.

Ua faateleina atinaʻe pepe i le lalolagi aoao. Ua iai i El Salvador, Iunaite Setete, Filipaina, Madagascar, Meleisia, Taialani, Taiwan, Costa Rica, ma Kenya. Ua faaauau ona faateleina le aofaʻi o fale e tausia ai pepe i tausaga taʻitasi, ua mafai ai ona maimoaina e le tele o tagata nei meaola mataʻina i le tele o vaega o le lalolagi.

E lē taumatea, o le faafaileleina ma le seleseleina o le atinaʻe e fai apaʻau o le a faaauau ona iai sana vaega tāua i sootaga o meaola ma o latou siʻosiʻomaga ma mafai ai ona faasaoina ituaiga o pepe e mauagatā. O lea ituaiga pisinisi e ono faatupuina ai le amanaʻiaina e le lautele o le tāua o le faapaleniina lelei o punaʻoa o le lalolagi.

[Ata i le itulau 16]

E faaaogā e ē faia atinaʻe ia ie valavala e puipuia ai fuāpepe ma katepila (1). O piupa, e pei ona faaalia i inei (2), e teuina i pusa ma auina atu i le lalolagi atoa (3)

[Ē Ana le Ata]

Pito i luga i le ituagavale o le tupu o pepe ma le piupa: Fale mo Pepe, i Mittagong, Ausetalia; pepe i le ogatotonu mai le agavale ma pepe i luga o laulaau: Courtesy of Buckfast Butterfly Farm

[Ē Ana le Ata i le itulau 14]

K. Schafer/Audiovise