Palolo—“Le Taumafa Tāua a le Pasefika”

TUSIA E LE TUSITALA O LE ALA MAI! I FITI

E TE fiafia i taumafa mai le sami? Afai o lea, sau la tatou ō i se nuu o loo i se tasi o motu maotua o le atu Fiti, lea o le a tatou olioli ai i se taumafataga e matuā uigaese lava. A o tatou faalogologo atu i le fafati lemū mai o galu ma taia ai ama o paopao, ua tatou iloa atu se ogaumu e eli i lalo i le palapala e taʻua o le lovo, e latalata i le matafaga. Ua amata ona faamumū le afi e faaʻaʻasa ai maa ua filifilia faapitoa mo le kukaina o le taumafa autū.

Ae o ai la o le a na aumaia iā i tatou le taumafa autū lenei? E leai se isi! Ae o le a tatou faatali e oo mai lava iā i tatou. Afai e te tau masalosalo e iai se mea e lē masani ai e faatatau i lenei taumafa, e saʻo lelei oe. O la tatou taumafa autū lea o le a aloalo atu nei iai, o le ipu o anufe e matuā ese le manaia o lo latou tofo o loo gaʻio solo! O nei anufe o le sami mumu-eena (anufe tane) ma le lanu moana-meamata (anufe fafine) ua faaigoaina o le taumafa tāua a le Pasefika. I inei i le atu Fiti, o lenei taumafa e matuā ese lona manaia e seāseā ona maua, ua faaigoaina o le balolo. *

 E faatasi pe faalua i le tausaga ona aʻe tetele le palolo, mo le tasi i le tolu pō mai le fitu aso talu ona mavae le masina atoa. * E lē o matuā manino lelei le taimi tonu e fofoa ai lenei anufe, ae e iai le talitonuga a Saienitisi e faapea, atonu e fesootaʻi atu i le siisii i luga o le suāsami ona o le fesuisuiaʻi o le tau, o foliga vaaia o le masina, o le tai, po o le uumi foʻi o aso. O mea o loo faaaogāina e iloa ai, e aofia ai le mātauina o le tau, o vaitaimi tonu o se fuata, ma fesuisuiaʻiga eseese o le tulaga o le tai. I se taimi e leʻi mamao atu na taʻua ai e tagata suʻesuʻe i meaola o le sami e faapea, e latou te talitonu o le taimi e aʻe ai le palolo e māfua mai i le fesuisuiaʻiga o vaaiga o le masina ma le Metonic cycle. *

O lea ua tatou latalata atu i le matafaga, ma ua taofia faafuaseʻi leo o pesega o loo tāina i kitara ma ukulele ina ua sau le valaau ua amata ona aʻe le palolo. Seʻi o tatou faatasi atu la i tamāloloa, fafine ma tamaiti ia o loo savavali agaʻi atu i le aau. O nisi ua latou laʻeiina ni isulu sesega (ie lavalava e laʻei e fafine ma tamāloloa) ma a latou salusalu matagofie (ula e suʻi i fugālaau) ua sasala atoa le manogi. O se vaaiga uigaese le mātauina o nei tagata i o latou laʻei matagofie, ae o lea e agaʻi atu i le sami.

O isi tagata o loo tā i o latou paopao, ae ua tatou filifili e auai atu i le vaega lea e savavali. E leʻi umi lava ae tatou oo loa i le loloto o le sami māfanafana e gata i sulugātiti ma ua faafuaseʻi ona tatou vaaia le afe ma afe o anufe i luga o le fogātai ua siʻomia ai i tatou!

O lea la ua tatou molimauina nei ma le fiafia “se tasi o mea e aupito sili ona mataʻina i le talafaasolopito o le Pasefika.” So o se ituaiga mea ua faaaogāina e mafai ona tāina ai nei meaola feminoiaʻi solo, a o aʻe mai i luga o le fogātai—o pakete, o mea tā palolo, o taʻinamu ma ato fuʻe umu, ae o isi ua faaaogā o latou lima. Sa mātauina e se tasi o tagata asiasi se tamāloa Fiti, lauulu migimigi fefete, o tofu i lalo, ea aʻe i luga ma lūlū i totonu o le paopao ia palolo o loo pipii i lona ulu! O nisi o tagata tā palolo mataaai na tofo lava i le taimi lenā le palolo, ma e vaaia lava i latou o aai ma tā.

E foliga mai e pei lava o le vave o le aʻe mai o le palolo e faapena foʻi ona vave ona toe mou atu, seʻia oo i le isi tausaga. O lea ua tatou filifili e aua le ai mata ina le anufe, ae seʻi aai faatasi ma a tatou uō mo le uluaʻi taimi o le a tatou tofo ai i lenei “taumafa tāua a le Pasefika,” pe a faavelaina mai i le umu. O le palolo e tele vaitamini ma minerale e maua ai, e mafai ona saka, tao, pe falai foʻi. A vela le palolo e mafai ona lelei pea mo se vaiaso pe sili atu foʻi. E tatou te ioe uma o lona tofo lalaʻoa, e lē fiafia i ai tagata uma.

O lea ua oo mai le taimi e tatou te faamavae ma faafetai atu ai i le nuu na talia i tatou ona o lo latou agaga talimālō. A o tatou toe mafaufau i le aʻe mai o le palolo, o le lē iloaina tonu o le taimi e aʻe mai ai, ma le ola felagolagomaʻi o meaola o le sami i le aau, e tatou te maofa ai i Lē na Foafoaina mea, mo le faataamilosaga o le ola o nei meaola.—Faaaliga 4:11.

Afai o e fuafua e te asiasi atu i Motu o Fiti, atonu la o le a e manaʻo e faataʻitaʻia nei taumafa o anufe e manaia lo latou tofo. Ae a leai, e mafai lava ona sauni sau lava taumafataga mo le aoauli! Po o le a lava lau filifiliga, ae ia e mautinoa, pe a oo i le taimi o le palolo, e faatalitali uma tagata o le nuu i le aʻe mai o lenei “taumafa tāua a le Pasefika.”

[Faaopoopoga i lalo]

[Pusa/Ata i le itulau 11]

Po o Latou Taumafaina Moni Lava ni Anufe?

Atonu e faateʻia oe ma toe maua foʻi le toʻa i le iloaina faapea o lenei faiva e seāseā ona fai, e lē o le mea lea na manatu iai. Seʻi iloiloina pe aiseā.

O le siʻusiʻu o le palolo e vave lava ona suia ma avea ma totoga fanau lea e taʻua o le epitoke. O nei vaega o loo iai sela fafine ma sela tane. O le vaega lea e avea o le siʻusiʻu e iai ona mata ma ona ʻapaʻapa, e alu ese mai le anufe ma alu aʻe i luga o le fogātai. Pe a lē taina e tagata mataaai pe ʻaina foʻi e meaola o le sami, e iʻu ina pa le siʻusiʻu ma taape atu ai sela fanau tane ma fafine ma toe maua ai le avanoa e toe fanafanau ai. O le faateleina o le faitau aofaʻi e mautinoa lelei le lava mo le toe fofoaina o isi anufe, e ui i le tele o loo maua e tagata ma meaola o le sami. O palolo e sao mai ai e faatafetafea e suʻe ni ʻamu e fetaui lelei mo le toe amataina o le faataamilosaga o lo latou olaga.

O lea la pe a tatou ʻaina le palolo, o loo tatou ʻaina na o siʻusiʻu o anufe ia o loo nonofo pea i lalo o ʻamu.

[Ata i le itulau 10]

I le pito i luga: Sekove Bigitibau; itu taumatau, ogatotonu ma le itulau e 11: Paul Geraghty