Po ua Mou Atu le Faamoemoe mo le Filemu?

“Ua tatou lagonaina i aso nei e pei o loo tatou ola . . . i se taimi o se afā tele, ma o se mala e lē mafaatusalia.”—Le nusipepa o le “La Repubblica,” Roma i Italia.

INA ua mavae le osofaʻiga a le ʻaufaatupu faalavelave i le aai o Niu Ioka ma Washington, D.C., i le tausaga e 2001 na oo ina lē mautonu ai le toʻatele o tagata e faatatau i le lumanaʻi o le a oo i ai. O ata na faasalalauina i televise ia na faaalia ai le solofa ifo o Fale Tetele e Lua (Twin Towers) i le sasao o le afi, ma le matuā popole o i latou na sao mai ai, e lē mafaitaulia taimi na faasalalauina ai. Na oo ai lagona tigā i tagata na maimoaina na ata i le lalolagi atoa. Ma o na lagona tigā na manatu ai tagata faapea ua oo le lalolagi i se suiga iloga. Pe e lē o le tulaga ea lenā ua iai?

Na tutupu taua ina ua faatoʻā mavae lava le faalavelave na tupu iā Setema 11, 2001. E leʻi umi, ae soofaatasi malo na feteenaʻi muamua ma taumafai e taofia faiga faatupu faalavelave. O le iloiloina o mea uma, na faaalia ai le matuā toʻatele o tagata na maliliu ma le tele o mea na faaleagaina ai. Ae atonu o le suiga matilatila i le tele o tagata i le lalolagi aoao o le mou atu lea o lagona saogalemu, ma le faatupulaʻia o faalogona o le leai o se saogalemu o tagata i so o se mea.

Ua feagai nei taʻitaʻi o le lalolagi ma le tele o faafitauli. Ua taumānatu le ʻautusitala ma le ʻaufaasalalau po o le a mafai faapefea ona taofia le faatuputeleina o faiga faatupu faalavelave, ona e foliga mai o loo faatupulaʻia ona o le mativa ma le sogasogā valea, lea e foliga mai e leai se tasi e iloa se vaifofō e foʻia ai. Ua faateteleina le lē faamasinotonu i le lalolagi, lea ua oo atu ai mea uma i se tulaga e ono tulaʻi mai ai se faalavelave mataʻutia. Ua tomānatu ituaiga eseese o tagata po o le a iai se taimi e tafiesea ai tulaga pagatia o loo iai. Po o le a faamutaina ea taua, o puapuaga uma, le oti ma tulaga ogaoga o loo aumaia ai?

E faitau miliona tagata ua liliu atu i lotu mo le mauaina o tali i nei fesili. Ae peitaʻi, o isi ua faalētonu o latou manatu. Ae faapefea oe? Pe e te manatu e mafai e taʻitaʻi lotu ona tali fesili nei? Pe e latou te mafai moni ona fesoasoani i le aumaia o le filemu e ala i a latou tatalo?