Se Fagafao Faapelepele po o se Meaola Mataʻutia?

TUSIA E LE SUI O LE ALA MAI! I POLANI

NA OSOFAʻIA e se taʻifau feʻai se tagata na alu e toleni, ma e tele le palapala na alu ai i lona manuʻa ma iʻu lava ina maliu ai. Na maliu foʻi se teine ina ua osofaʻi e lana lava taʻifau telē (Rottweiler). Na osofaʻia e se afaluko lapoʻa na taʻataʻa i le auala se tamaititi e iva tausaga ma maliu ai a o vaavaai atu ona mātua. O ni nai faaaʻoaʻoga nei o nisi o faalavelave na faapogaia e ni taʻifau lauiloa i Polani.

Ina ia taofia na faalavelave, ua faataga ai e nisi o malo ia tagata e faatoʻā mafai lava ona tausia nisi o taʻifau pe afai e maua se pemita mai le malo. Na finau atu Barbara Zaleska, o se sui o le Faalapotopotoga e Vaaia ia Fagafao i Polani e faapea, e tatau ona tuuina atu le pemita i lē e ona le taʻifau na i lo o le taʻifau “auā o le tausiga a tagata e ona ia taʻifau e māfua ai ona taufeaʻai po o le avea pea o ni uō a tagata.”

I nisi o tulaga, e aʻoaʻoina patino ai nisi o taʻifau ina ia faatamaʻia isi meaola. O auala a i latou e toleniina ai na taʻifau, e sasaina, e lē fafagaina, e “aʻoaʻoina foʻi e fasimate ni meaola” e aofia ai ma le aʻoaʻoina o le taʻifau e osofaʻia ma saeia ia faatagata e faia i omomi. Ona sosoo ai lea ma le aʻoaʻoina o taʻifau e osofaʻia isi taʻifau e lē malolosi tele ma e mautinoa lava e fasimatea ai. Pe a uma le toleniga, ona nofo sauni loa lea o le taʻifau e auai i taugā taʻifau ina ia faafiafia ai i latou e auai i taaloga faitupe ma tagata e fiafia i le faamasaatoto.

Ua taʻu manino mai i le Tusi Paia le silafaga a le Atua i le sauā i meaola. Ua faapea mai le Tusi Paia: “Ua faapelepele le tagata amiotonu i lana manu; a o le alofa o ē amio leaga, o le sauāga lea.” (Faataoto 12:10) O i latou e mananaʻo e faafiafia le Atua e lē aʻoaʻoina meaola i faiga sauā. E tatou te fiafia ona i le lalolagi fou a le Atua, o le a faamutaina ai le toleniina o meaola e avea o ni manu mataʻutia, po o le faaaogāina i taaloga po o nisi lava māfuaaga.—Salamo 37:9-11.