Se Nofoaga Lelei mo le Lomiaina o le Tusi Paia

TUSIA E LE TUSITALA O LE ALA MAI! I PELESEUMA

I le toetoe lava 500 tausaga ua mavae, o nisi o uluaʻi kopi o le Tusi Paia atoa, sa lomiaina i Antwerp i Peleseuma. O le ā na tosina atu ai tagata lomitusi o le Tusi Paia i lenā aai? O ā lamatiaga na tuuina i ai i latou ona o le lomiaina o le Tusi Paia? Ina ia iloa tali i nei fesili, e tatau ona tatou toe foʻi atu i tuā i le vaega muamua o le lona 16 senituri.

E TAATIA Antwerp i le mata o le vai o Scheldt, e 55 maila [89 kilomita] mai le Sami i Mātū. I le senituri lona 16, i le taimi o le sologalelei o mea, na oo ai Antwerp i se tulaga e lē mafaatusalia o le lelei tau tamaoaiga. O le mea moni, na vave ona tuputupu aʻe le aai ma avea ai ma taulaga e aupito telē o Europa ma o se tasi o aai i le Itu i Sisifo o Europa e silia i le 100,000 tagata e nonofo ai.

O le tuputupu aʻe o Antwerp na tosina atu ai i ai tagata faipisinisi i Europa atoa. Ona o lenei tuputupu aʻe ma le faateleina o le tamaoaiga, na mafua ai i tagata iloga o le aai ona lē aiā i mea fai a tagata, ma oo ai ina avea Antwerp ma nofoaga e faaauilumaina ai ni fuafuaga fou. O nei uiga lē aiā na iai i tagata iloga o le aai, na tosina atu i ai tagata lomitusi ona na latou manatu o se nofoaga lelei lea mo le lomiaina o lomiga ma faasalalau ai nei fuafuaga fou. E leʻi umi, ae avea Antwerp ma nofoaga o le faitau aofaʻi o le 271 o fale lomitusi, tagata lomitusi, ma tagata faatau tusi. Na faamatalaina ma le nenee e tagata faamasino lo latou aai o “se nofoaga lelei e ati aʻe ai tomai uma, le faasaienisi, o tagata o atunuu faapea ma amioga lelei.”

Tusi na Susunuina ma Monike

O nisi o manatu fou na lomia ma faasalalauina o manatu o Matini Luteru (1483-1546).  O ia o le taʻitaʻi o le Toefuataʻiina, o se gaoioiga faalotu lea na taʻitaʻi atu ai i le amataina o le faa-Porotesano. E na o le ono lava masina talu ona amataina le Toefuataʻiina, ae maua loa tusi a Luteru i faletusi i Antwerp. E lē o se mea e faateʻia ai, le lē fiafia i ai o le Lotu Katoliko. Iā Iulai 1521 na faamalosia ai e le lotu le susunuina i le lautele o tusi e 400 ia na tetee i le lotu Katoliko i Antwerp. I le lua tausaga mulimuli ane ai, na susunu ola ai i luga o laau ia monike mai Antwerp na mulimuli i talitonuga faa-Aokusotino ia na lagolagoina manatu o Luteru.

O nei osofaʻiga e leʻi taofia ai se vaega o tagata lomitusi maelega i Antwerp. O le lototetele o na tagata lomitusi na faia ai sa latou vaega tāua i le mauaina e tagata lautele o le Tusi Paia. O ai nisi o na tagata lomitusi?

Mai le Lomitusi i le Faa-Maturoina

O Adriaen van Berghen o se tagata lomitusi ma o se faatautusi foʻi. I le 1522 na faamauina ai ona vae ma lima i se laau ona o le faatauina atu o tusi a Luteru ma sosoo ai ma le faasalaina i le falepuipui. Na magalo o ia ma na vave lava ona toe foʻi atu i le faia o lana galuega. Na amata ona toe faia ana galuega lomitusi, ma o le taimi lea sa lomia ai se faaliliuga i le faa-Holani o le “Feagaiga Fou” a Luteru. Na lomiaina lea vaega o le Tusi Paia i le 1523, e na o le tasi le tausaga talu ona lomia le uluaʻi “Feagaiga Fou” a Luteru i le faa-Siamani.

Peitaʻi, i le 1542 ina ua mauaina se aofaʻiga tele o tusi e faasāina i lona fale i Delft i Holani, na toe puʻea ai loa Van Berghen. Muamua lava, na tuuina atu iā te ia se faasalaga māmā, e lua itula e tulaʻi ai i luga o le pulelaa ma “ʻulaina nisi o tusi faasāina.” Ae mulimuli ane, na suia le faasalaga o Van Berghen i le faasalaga oti, ma vavaeeseina ai i le pelu le ao o lenei tagata lomitusi lototele.

Na Maliu Ona o se Faamatalaga i Autafa o le Lomiga

I na aso o le tagata lomitusi sa tele Tusi Paia na ia lomiaina i le gagana Holani, o Jacob van Liesvelt. Na ia lomia lomiga e 18 o le Tusi Paia i le faa-Holani. I le 1526 na ia lomia ai le Tusi Paia atoa i le gagana Holani. Na maua lenā Tusi Paia i le fā tausaga a o leʻi maua le uluaʻi Tusi Paia atoa na lomia i le gagana Falani a o le iva lenā o tausaga a o leʻi lomia le uluaʻi Tusi Paia atoa i le gagana faa-Peretania! O le Tusi Paia a Van Liesvelt sa faavae autū lava i le Tusi Paia e leʻi uma a Luteru i le gagana Siamani i lenā taimi.

O le lomiga mulimuli i le faa-Holani a Van Liesvelt, o le lomiga o le 1542, o loo iai ata na lomia mai laau na vaneina ma faamatalaga i autafa. Mo se faaaʻoaʻoga, e sosoo ma le Mataio 4:3, ia le ata o le Tiapolo faapea o se monike e fai sana ʻava, e iai sana rosalio ma vae e pei o se ʻoti lea na lomia mai laau na vaneina. Peitaʻi, na faapitoa lava le feita tele o le Lotu Katoliko i faamatalaga na i autafa o le lomiga. O se tasi o faamatalaga—lea na faitauina “E na o Iesu Keriso lava e aumai ai le Faaolataga”—na faaaogā e fai ma faavae o le taʻusalaina o Van Liesvelt i le oti. E ui lava ina finau mai Van Liesvelt faapea na lomia lana Tusi Paia i lalo o le faatagaga faalelotu, ae na vavaeeseina lona ao i Antwerp i le 1545.

 Taliaina Muamua, Ona Toe Faasā Lea

O le taimi lenā i Falani o loo pisi ai se tagata Katoliko e suʻesuʻe i olaga o tagata o lona suafa o Jacques Lefèvre d’Étaples i le faaliliuina o le Tusi Paia mai le gagana Latina i le gagana Falani, e ui na ia iloiloina foʻi tusitusiga i le uluaʻi gagana Eleni. Na manaʻo D’Étaples ia mauaina e tagata lautele le Tusi Paia. Na ia tusi e faapea: “E sau se taimi o le a talaʻi ai Keriso i se auala e mamā atoatoa ae o le a lē palua faatasia ma aganuu a tagata, lea e lē o le tulaga lenā o loo iai.” I le 1523 na ia lomia ai se faaliliuga faa-Falani o le “Feagaiga Fou” i Pale. Na lē faamaonia e tagata atamamai i mataupu faalelotu i le Iunivesite taʻutaʻua i Sorbonne lana faaliliuga, ona sa tusia i le gagana taatele a tagata o le atunuu. O le feagai ai ma a latou osofaʻiga, na sola ese ai D’Étaples mai Pale ae alu atu i Strasbourg i le itu i mātū i sasaʻe o Falani.

O le iʻuga o lenei osofaʻiga, e leʻi toe ano ai tagata lomitusi i Falani e lomia le Tusi Paia i le gagana Falani. O fea la e mafai ai e D’Étaples ona lomia lana Tusi Paia? Ua na o Antwerp e talafeagai ona lomia ai. O le Tusi Paia o le 1530 a D’Étaples, sa lolomiina i Antwerp e Merten de Keyser, o le uluaʻi faaliliuga lea o le Tusi Paia i le faa-Falani i se tusi se tasi. O le mea e mataʻina ai ona na lomia e De Keyser lenei faaliliuga i lalo o le maliega a le Iunivesite o Louvain, o le iunivesite aupito i leva i Peleseuma, faatasi ai ma se faamaoniga a le Emeperoa o Roma lava latou o Charles V! E ui i lea, i le 1546 na faaopoopo atu ai faaliliuga a D’Étaples i le lisi o tusi e faasā ona faitau i ai tagata Katoliko.

“Sa i le Epikopō Tusi . . . Sa iā Tiniteli Tupe”

O le vaitaimi lava foʻi lenā i Egelani, na manaʻo ai le faifeʻau faauuina o Viliamu Tiniteli e faaliliu le Tusi Paia i le gagana faa-Peretania. Peitaʻi, na teena o ia e le epikopō o Lonetona, o Cuthbert Tunstall. Ina ua iloa e Tiniteli faapea e lē mafai ona ia faaliliuina le Tusi Paia i Egelani, ona ia sola atu lea i Siamani. Mulimuli ane iā Fepuari 1526, na ia taulau manuia ai i le lomiaina o lana uluaʻi faaliliuga atoa o le “Feagaiga Fou” i le gagana Peretania. A o leʻi uma le masina, ae ua oo atu kopi o lenei faaliliuga i Egelani.

Peitaʻi, sa maumauaʻi lava le epikopō o Tunstall e taofia tagata mai le faitauina o le Tusi Paia. O lea na ia susunuina ai Tusi Paia uma o le faaliliuga a Tiniteli e na te mauaina. Peitaʻi, sa faaauau pea ona salalau atu. Ona fuafuaina lea e le epikopō e ala i se tagata faipisinisi e suafa iā Packington, le faatauina o Tusi Paia uma a Tiniteli a o leʻi auina ese atu ma le konitineta ma oo atu ai i Egelani. Na talia e Tiniteli le ofo ma faaaogā tupe na maua mai ai, e faaleleia atili ai lana faaliliuga ma toe lomia ai se lomiga toe teuteuina. Na faapea mai se faamatalaga a se tasi tagata: “O nei feutagaʻiga na iai sona iʻuga lelei. Sa i le epikopō tusi, na maua e Packington le faamālō, ae sa iā Tiniteli tupe.” O lea, e leʻi iloa e le epikopō o Lonetona o lea ua ia  faatupeina le galuega a Tiniteli o le faaliliuina o le Tusi Paia!

Le Sootaga a Tiniteli i Antwerp

E ui lava ina faatauina ma susunuina uma nei kopi o le Tusi Paia, ae sa faaauau pea ona mauaina i Egelani se aofaʻiga tele o kopi o faaliliuga a Tiniteli o le “Feagaiga Fou.” Na mafaia faapefea lenā mea? E toʻalua ni tagata lomitusi lototetele na iai i Antwerp, o Hans ma Christopher van Ruremond, sa la lomiaina faalilolilo ni lomiga o le “Feagaiga Fou” a Tiniteli. E ui lava ina tele ni mea sesē sa iai i le lolomiina, ae na matuā naunau tagata Egelani e faatauina.

Peitaʻi, i le 1528, na faafalepuipuiina ai Hans i Lonetona mo le lolomiina o kopi e 1,500 o le “Feagaiga Fou” a Tiniteli ma le aumaia i Egelani o kopi e 500. Atonu na maliu o ia i se falepuipui i Egelani. I le 1531, na faafalepuipuiina ai foʻi le uso o Hans o Christopher i Egelani mo le faatauina atu o le “Feagaiga Fou.” E foliga mai na maliu foʻi Christopher i totonu o se falepuipui.

“Se Mea na Iloga ai Tiniteli”—Na Lomia i Antwerp

Mai le 1529 seʻia oo i le 1535, na tele se taimi o Tiniteli na faaalu i Antwerp, ona sa lelei tele lea nofoaga mo le faia ai o lana galuega. O inā, i le 1530, na lomia ai e Merten de Keyser le faaliliuga a Tiniteli o le Penetatuka, lea na muaʻi aliali mai ai le suafa o Ieova i le faaliliuga faa-Peretania.

Iā Me i le 1535, na puʻea ai Tiniteli i Antwerp. A o puapuagatia o ia i le falepuipui, na faaumaina e se tasi o ana tagata aʻoga e igoa iā Miles Coverdale, lana faaliliuga o Tusitusiga Eperu. Iā Oketopa 6, 1536 i Vilvoorde i Peleseuma, na saisaia ai Tiniteli i se laau, titinaina, ma susunuina ai. O ana toe upu: “Le Alii e, ia tatalaina le loto o le tupu o Egelani!”

Se Mea na Tuuina Mai e Tiniteli

E leʻi umi talu le faasalaga oti o Tiniteli ae faamaonia e le tupu o Enele VIII o Egelani le faaliliuga o le Tusi Paia e faitauina i lotu. Sa lomia lenei faaliliuga e Matthias Crom o se isi o tagata lomitusi o Antwerp. O lenei Tusi Paia, sa lauiloa o le Tusi Paia a Matthew (maua le igoa mai iā Thomas Matthew), ma o loo tele ina faavae mai i faaliliuga a Tiniteli. * Pagā le tuufaafeagai o le tulaga ua iai ona o lea ua faaaogāina nei e epikopō le faaliliuga na latou susunuina i nai tausaga na muamua atu—le faaliliuga lea sa māfua ai le fasiotia o Tiniteli!

O le tele lava o faaliliuga a Tiniteli o loo faasaoina lelei i le King James Version. O lea la, o le tele o faaupuga mai le King James Version, o loo telē sana aafiaga i le gagana faa-Peretania o faaupuga na fafau aʻe lava e Tiniteli ma sa uluaʻi lomia i Antwerp. O faaupuga e masani ai pei o le “the signs of the times” ma le “the powers that be” faapea ai ma le “Am I my brothers keeper?” sa siiina saʻo mai i faaliliuga a Tiniteli e tagata faaliliu o le King James Version. (Kenese 4:9; Mataio 16:3; Roma 13:1) E tusa ai ma le Polofesa o Latré, na ia faapea mai, o le taaʻiga a Tiniteli i le gagana faa-Peretania e sili atu ona telē na i lo taaʻiga a Shakespeare!

I le ʻafa mulimuli o le senituri lona 16, na suia ai le tulaga o mea, ma mou atu ai le tulaga o le lē aiāina o lotu i Antwerp, ma le avea o se nofoaga lelei mo le lomia ai o Tusi Paia. O le māfuaaga autū o lenei suiga ona o sauaga na aumaia e le Vaega Tetee i le Toefuataʻiina o le Lotu Katoliko. E ui i lea, o le lototetele ma uiga faataulaga o i latou na uluaʻi lomia le Tusi Paia i Antwerp, na telē so latou sao i le mauaina o le Afioga a le Atua mo i latou o loo faitauina i le lalolagi atoa i aso nei.

[Faaopoopoga i lalo]

[Ata i le itulau 21]

I luga: Faatulagaina o mataʻitusi o upu; o loo faaliliuina e Matini Luteru le Tusi Paia; faafanua o le aai anamua o Antwerp

[Ata i le itulau 22]

Fatatusi a Jacob van Liesvelt

[Ata i le itulau 23]

Jacques Lefèvre d’Étaples ma le itulau muamua o lana lomiga o le Tusi Paia o le 1530, na lomia i Antwerp

[Ata i le itulau 23]

Susunuina i le lautele o Tusi Paia faa-Peretania i Lonetona

[Ata i le itulau 24]

Viliamu Tiniteli, se itulau mai lana Tusi Paia, ma Miles Coverdale

[Ata Credit Lines i le itulau 22]

Itulau 21: Tagata e faatulagaina mataʻitusi o upu: Printer’s Ornaments/by Carol Belanger Grafton/Dover Publications, Inc.; Luteru: Mai le tusi Bildersaal deutscher Geschichte; faafanua: Ona o le faatagaga a le Museum Plantin-Moretus/Stedelijk Prentenkabinet Antwerpen; itulau 23: Ata: Mai le tusi Histoire de la Bible en France; Itulau o le Tusi Paia: © Cliché Bibliothèque nationale de France, Pale; susunuina o Tusi Paia: Mai le tusi The Parallel Bible, The Holy Bible, 1885; itulau 24: Tiniteli: Mai le tusi The Evolution of the English Bible; Coverdale: Mai le tusi Our English Bible: Its Translations and Translators