Faasaʻoloto Mai le Faapologaina e le Ita

FAAMATALAINA E JOSÉ GOMEZ

NA OU fanau iā Setema 8, 1964 i Rognac, o se taulaga laitiiti i le itu i saute o Falani. O oʻu mātua faapea foʻi ma mātua o oʻu mātua o ni tagata maumausolo e taʻua o Gypsies mai Andalusia i le itu i saute o Sepania, na fananau i Algeria ma Morocco i Aferika i Mātū. E tusa ai ma le tulaga masani i le aganuu a tagata Gypsy, e matou te nonofo faatasi uma lava ma o matou tauaiga.

O loʻu tamā o se tagata e sauā, ma o nisi o mea ou te manatuaina a o oʻu laitiiti, e aofia ai lona faaoolima i loʻu tinā. Sa oo ina filifili loʻu tinā e la te teteʻa—o se mea e seāseā ona tupu i Gypsies. Na ave i matou ma loʻu uso ma loʻu tuafafine i Peleseuma e loʻu tinā, lea na matou nonofo ai i se olaga filemū mo le isi valu tausaga.

Peitaʻi ane, na suia le tulaga o mea. O i matou nei o tamaiti na matou fia vāai i lo matou tamā, o lea na ave ai i matou e Tinā i Falani ma ua toe nonofo ma lo matou tamā. Na toe oo mai ai foʻi ni luʻi iā te aʻu ona o le nonofo faatasi ma Tamā. I Peleseuma, sa matou ō faatasi ma Tinā i mea uma e alu i ai. Ae i le aiga o loʻu tamā, e na o tane e faatasitasi atu i ai isi tane. O ituaiga o manatu lea e iai i latou e faapea e na o tane e iai uma aiā a o fafine e faia uma feau. Mo se faaaʻoaʻoga, i se tasi aso, ina ua ou fia fesoasoani atu i le tuafafine o loʻu tamā e tapena mea ina ua maeʻa le taumafataga, na lau ai aʻu e le uso o loʻu tamā, o se tauātane. I lo latou aiga, o le fufuluina o ipu, o le galuega lava lea e mo na o fafine. Sa oo ina ou maua ai i lea ituaiga o manatu sese.

E leʻi leva ae toe afaina foʻi loʻu tinā i uiga sauā o loʻu tamā. I taimi na ma taumafai ai ma loʻu uso e faasalavei atu, sa iʻu ina ma sosola ese e ala i se faamalama e ʻalofia ai moto a loʻu tamā. E leʻi sao mai ai foʻi loʻu tuafafine. O le iʻuga, afai e mafai, sa tele se taimi ou te lē iai i le aiga. I le 15 o oʻu tausaga, sa leai se uiga o loʻu olaga.

Mulimuli ane na iloa aʻu i loʻu uiga sauā. Sa ou fiafia e taufaafefe ma tauluʻiluʻi i isi. I nisi taimi, ou te faia lava ma le iloa le faaita o isi tama talavou, ae e toʻaitiiti lava e totoa e faasagatau mai—talu ai e masani lava ona ou feaveaʻia se naifi po o se filifili. E leʻi umi, ae amata ona ou gaoia taavale ma faatauina atu. O nisi o taavale ou te susunuina, ona ou matamata lea iai ma le fiafia a o taumafai le ʻaufuimū e tineia le afi. Sa oo ina ou talepeina faleoloa ma fale e teu ai oloa. E tele ni taimi na puʻeina faapagota ai aʻu. O ia taimi uma, ou te tatalo ai lava i le Atua mo se fesoasoani!

Ioe, na ou talitonu i le Atua. Sa ou aʻoga i se aʻoga a se lotu a o matou iai i Peleseuma. O lea na ou iloa ai e leaga le mea o loo oʻu faia. Ae e leʻi iai se aogā o loʻu talitonu i le Atua i laʻu amio. Sa ou manatu e pau lava le mea ou te faia o le ole atu i le Atua mo le faamagaloga ona faamagaloina lea o aʻu agasala.

I le 1984, na ou falepuipui ai mo le 11 masina ona o le gaoi. Na auina atu aʻu i le falepuipui i Baumettes i Marseilles. Sa tatā peʻa i vaega eseese o loʻu tino a o oʻu iai i inā. O se tasi o ia peʻa e faapea, “ita ma taui ma sui.” Na i lo le suia ai o oʻu uiga leaga,  na atili ai ona faateteleina loʻu ita mo pulega faapea ma tagata a o oʻu iai i le falepuipui. E oo ane i le taimi na ou magalo ai, i le na o le tolu o masina na ou tulia i le falepuipui, ua matuā faatumulia aʻu i le ita. Ae tupu loa se faalavelave lea na suia ai loʻu olaga.

Ua Avea le Taui ma Sui ma Oʻu Sini

Sa iai se feeseeseaʻiga i lo matou aiga ma se isi aiga Gypsy. Na fai la matou tonu ma uso o loʻu tamā e fai se feiloaʻiga ma i latou ma foʻia ai le mataupu. E taufai tofu le aiga ma auupega. I le misa na tupu mai, na tafanaina ma feoti ai ia Pierre, le uso o loʻu tamā, ma se isi e ma te tauusoga. Na ou tū i le aualatele, ma uu le fana, ma ʻeʻē ai ona o loʻu ita tele. Na iʻu ina mafai ona aveesea faamalosi e se tasi o uso o loʻu tamā le fana mai iā te aʻu.

Na ou matuā lagona le ootia i le faanoanoa i le maliu o Pierre le uso o loʻu tamā, o lē sa ou manatu i ai o se tamā. Sa ou faia tū faaleaganuu a Gypsy e tusa ai o le vaitaimi o le faavauvau. Mo le tele o aso, e lē seleina laʻu ava pe ʻai i se aano o se manu. Sa ou lē fia matamata i se televise pe faalogologo foʻi i se musika. Sa ou folafola ou te toe taui ma sui i le oti o le uso o loʻu tamā, ae na taofia aʻu e loʻu aiga mai le mauaina o se fana.

Iā Aokuso 1984, na ou auai atu i le vaegaau. I le 20 o oʻu tausaga, na ou ulu atu ai i le vaegaau e tausia le filemu a Malo Aufaatasi i Lepanona. Na ou taliaina le tulaga faigatā e mafai ona tupu mai, a ou lē fasiotia le fili, o le a latou fasiotia la aʻu. O le vaitaimi lenā o le taugā tetele o loʻu ulaina o le mariuana. E lē gata ina ou maua ai se faalogona o le malosi, ae na ou maua ai foʻi le lagona e leai se mea ou te ila ai.

Sa faigofie ona maua auupega i Lepanona, o lea na ou manatu ai e auina atu auupega i vaa i Falani, e faataunuu ai laʻu fuafuaga e taui le oti o le uso o loʻu tamā. E lua ni fana na ou faatauina, faatasi ma ni pulufana, mai tagata o le nuu. Na ou talaia fana ma nanāina i ni leitiō se lua, ma auina atu loa i loʻu aiga.

E toe lua vaiaso o totoe o loʻu taimi i le vaegaau, ae matou ō ma aʻu uō e toʻatolu e mālōlō e aunoa ma se faanoi. Ina ua matou toe taliu mai, na lokaina i matou. A o oʻu iai i le falepuipui, na ou osofaʻia se leoleo ona ua pasae aʻe loʻu ita. Sa ou manatu e lē o se mea tatau le faalumaina o aʻu e se payo—o se tagata e lē o se Gypsy. I le aso na sosoo ai, na ma toe fetaui ai foʻi ma se alii ofisa. Na auina atu aʻu i le falepuipui i Montluc, i Lyons, e faauma ai loʻu taimi o loo totoe i le vaegaau.

Ua Ou Maua le Saʻolotoga—I le Falepuipui

Sa faafeiloaʻi mai ma le māfana se alii talavou iā te aʻu i loʻu aso muamua lava i le falepuipui i Montluc. Na ou iloa mulimuli ane, o ia o se tasi o Molimau a Ieova na faafalepuipuiina ma isi e latou te talitonu faatasi, ona o lo latou lē tagofia o auupega. Sa ou lē malamalama, ma na ou manaʻo e fia iloa atili.

Na ou iloa ane, o Molimau a Ieova e alolofa moni i le Atua, ma na avea o se mea e mataʻina iā te aʻu a latou faatulagaga maualuluga tauamio. Peitaʻi, sa tele pea ni mea na ou fia malamalama i ai. Aemaise lava, na ou fia iloa pe e mafai e ē ua oti ona fesootaʻi ma ē ola e ala i miti—o se mea lea na talitonu i ai le tele o Gypsies. Na ofo mai se Molimau e igoa i a Jean-Paul e ma te suʻesuʻeina le Tusi Paia e ala i le faaaogāina o le tusi e taʻua E Mafai Ona E Ola e Faavavau i Parataiso i Le Lalolagi. *

E tasi le pō na ou faitauina ai le tusi, ma na pāʻia loʻu loto i mea na ou faitauina. O i nei i le falepuipui, ua ou maua ai le saʻolotoga moni! Ina ua ou magalo mai le falepuipui, na ou malaga atu i le nofoaafi i lo matou aiga, ma laʻu ato e tumu i lomiga faale-Tusi Paia.

Sa ou alu atu i le Maota o le Malo i Martigues ina ia mafai ona maua ni Molimau mai i loʻu vaipanoa. Na faaauau ona ou suʻesuʻeina le Tusi Paia, ae ua faia i le taimi lea ma se uso talavou e talaʻi faataimi atoa e igoa iā Eliki. E leʻi leva lava ae ou lē toe ulaula, ma ua ou lē toe asia foʻi aʻu uō e masani ona matou faia faatasi le solia o tulafono. Sa ou maumauaʻi e faia e tusa ai ma le Faataoto 27:11, lea o loo faapea mai: “Loʻu atalii e, ia poto oe, ma e faafiafia loʻu loto; ona ou mau tali ai lea i lē faifai mai.” Ua ou maua iā Ieova se Tamā alofa o lē ou te manaʻo e faafiafia.

 Le Luʻi o le Suia

Sa lē faigofie iā te aʻu le faatinoina o mataupu silisili faa-Kerisiano. E mo se faataʻitaʻiga, na ou toe faaaogāina foʻi fualaau faasāina mo ni nai vaiaso. Ae o le luʻi na sili ona faigatā iā te aʻu o le aveesea lea o le faanaunauga e taui ma sui. E lē iloa e Eliki, ae sa ou feaveaʻia pea se fana ma fuafua pea e taui atu iā i latou na māfua ai le oti o le uso o loʻu tamā. E alu ni pō atoa o oʻu saʻilia i latou.

Ina ua ou taʻuina atu lea mea iā Eliki, na ia faamatalaina ma le manino mai iā te aʻu e faapea e lē mafai ona iai se ma faiā lelei ma le Atua a o iai saʻu fana ma ou saʻili e taui ma sui atu. E tatau ona faia saʻu filifiliga. Sa ou manatunatu loloto i apoapoaʻiga a Paulo i le Roma 12:19 e faapea: “Le au pele e, aua le taui atu ma sui, a ia outou tuu atu i le toʻasa.” O le faia faapea faatasi ai ma le tatalo faatauanau, na fesoasoani lea iā te aʻu e pulea oʻu faalogona. (Salamo 55:22) O lea, na ou tiaʻia ai aʻu auupega. Iā Tesema 26, 1986, ina ua atoa le tausaga o oʻu suʻesuʻeina le Tusi Paia, na faailogaina ai loʻu tuuina atu iā Ieova le Atua e ala i le papatisoina i le vai.

Tali Lelei Mai Loʻu Aiga

Na faalaeiauina oʻu mātua e suʻesuʻeina le Tusi Paia ona o suiga i laʻu amio. Na toe faaipoipoina i laʻua ma na papatisoina loʻu tinā iā Iulai 1989. Mulimuli ane, na talia lelei foʻi e nisi o loʻu aiga le feau o le Tusi Paia ma avea ma Molimau a Ieova.

Iā Aokuso 1988, na ou filifili ai e avea o sē tasi o faifeau e galue faataimi atoa. Na faatumulia aʻu i le alofa i se tuafafine talavou i laʻu faapotopotoga e igoa iā Katia, ma na ma faaipoipo i le aso 10 o Iuni, i le 1989. Sa leʻi faigofie le tausaga muamua o le ma ulugalii ona sa tatau pea ona faia ni fesuiaʻiga i oʻu uiga agaʻi i le itupā vaivai. Sa faigata iā te aʻu ona faatinoina upu o loo i le 1 Peteru 3:7, lea o loo faalaeiau mai ai i tane, ia āva i a latou avā. Sa faifaipea ona ou tatalo mo le malosi e taofia ai loʻu manatu faamaualuga ae suia le ala o loo oʻu mafaufau ai. Na faasolosolo ina lelei lea tulaga.

Ou te lagonaina pea le tigā ona o le maliu o le uso o loʻu tamā, ma i nisi taimi, e lē mafai ona taofia le maligi ifo o oʻu loimata pe a ou mafaufau atu iā te ia. Ou te tauivi pea ma faalogona ootia ona o loʻu manatuaina o lona oti. Mo le tele o tausaga, ina ua mavae loʻu papatisoga, na iā te aʻu le popole ina neʻi o matou feiloaʻi faafuaseʻi ma nisi o le aiga lea na matou feeseeseaʻi. Faamata o le ā laʻu mea e fai pe a latou osofaʻia aʻu? O le a faapefea ona ou tali atu? Pe faamata o le a toe oso ifo oʻu uiga tuai?

O se tasi aso na ou faia ai le lauga i le lautele i se faapotopotoga e lata ane. Na ou vaai ai i inā ia Pepa, o se tauaiga o se tasi o tamaloloa ia na fasiotia le uso o loʻu tamā. Ou te taʻutino atu, na matuā tofotofoina oʻu uiga Kerisiano i loʻu vaai atu iā te ia. Ae na ou lē amanaʻiaina oʻu faalogona. Mulimuli ane, i le aso na papatiso ai Pepa, na ou opoina o ia ma faamālō i lana filifiliga e auauna iā Ieova. Na ou taliaina o ia o soʻu tuafafine faaleagaga e ui lava i mea ua uma ona tutupu.

I aso taʻitasi ou te faafetaia Ieova ona o lana fesoasoani mai ina ia ou saʻoloto mai le faapologaina e le ita. Pe faamata o fea o oʻu iai nei pe ana lē seanoa le alofa faifua o Ieova? Ua ou maua se olaga fiafia i le aiga ona o ia. Ua iā te aʻu foʻi se faamoemoe mo le lumanaʻi—o se lalolagi fou e lē toe iai le ita ma le sauā. Ioe, ou te matuā mautinoa o le a faataunuuina le folafolaga a le Atua: “A e taʻitasi ma nofo i lalo o lona vine, ma lalo o lona mati; e leai foʻi sē na te faamataʻu mai; auā ua faapea ona tulei mai ai le siufofoga o Ieova o ʻau.”—Mika 4:4.

[Faaopoopoga i lalo]

[Ata i le itulau 13]

Faatasi ai ma vaegaau e tausia le filemu a Malo Aufaatasi i Lepanona, i le 1985

[Ata i le itulau 14]

Faatasi ai ma Katia ma oʻu atalii, o Timeo ma Pierre