Manu Sisiva Fulu Mūmū

TUSIA E LE TUSITALA O LE ALA MAI! I KENYA

O LE pisapisaō o leo e tele. Ua laulogo ai le vaituloto tū mamao ese i le pisa fiafia o le tele ma tele o manufelelei. E faitauafe manulele lanu piniki o loo tataa i le vai iila ma lanumeamata. I le vanimonimo, o loo faatumulia i manufelelei e aulelei i le vaai o loo felelei solo ai. E iloa atu le lanu mūmū malosi o vaega o o latou apaʻau uumi ma lauiti a o latou feleleaʻi ma fetifaaʻi solo i luga aʻe o le vai. E uiga ese le matagofie o lenei anoano o manu e aulelei o latou lanu! Atonu o le vaaiga lea e aupito i sili ona matagofie o manulele i le lalolagi—o manu e tai pei o ni tulī ua taʻua o flamingo lanu piniki o le vaipanoa o Aferika e taʻu o le Great Rift Valley.

E Aulelei Vae Uumi

Mai lava anamuā, ua mataʻina le flamingo i le manaia tele o lona tino mai. Ua vaneina i maa ia ata o lenei manu e umī lona ua, ma ua maua ni ona ata i ata anamua a Aikupito. Sa faamamaluina e tagata Aikupito lenei manu e tusa ua faatinoina mai ai lo latou atua o Ra, ona o lona uiga ese i le vaai ma le mataʻina o lona tino mai. O loo iai ni ata mai anamua o loo tusia i ana, ua faaautū i le flamingo, i lona ua umī ma loʻu, ma ona vae mimiti ma mananaia.

 I aso nei, e fā ituaiga o flamingo o loo maua i vaega o Aferika, i motu o le Karipiane, le konitineta o Asia ma Europa, ma Amerika i Saute. O le ituaiga o flamingo e pito i laʻitiiti, o le ituaiga lea ua taʻua o le lesser flamingo. E manaia lava lona lanu, o ona fulu e piniki malosi ma o ona vae e lanu mūmū malosi. E faaluaina le telē o le lesser flamingo ona maua lea o le telē o le greater flamingo, ma e 55 inisi (140 senitimita) lona maualuga. E tutusa uma lava flamingo i se vala e tasi—o lo latou gutu lea e piʻo i le ogatotonu ma loʻu agaʻi i lalo, lea e foliga manaia mai ai lea manu i le vaai.

Pe a oo ina lele, e tātā e le manu ona apaʻau ma e saosaoa le tamoʻe topetope o ona vae i luga o le vai, seʻia oo ina mafai ona lele ese atu. E tuu faasaʻo i luma lona ulu ma lona ua umī ae o ona vae o loo faamalō ma faasasaʻo i tua, ma lele mālie atu ai loa i le vanimonimo. E tusa ma le fā miliona flamingo o loo mau i le Great Rift Valley i Aferika.

Se Manu ʻAuvaivai i se Nofoaga Faigatā

O le aofaʻiga tele o flamingo o loo iai i le Rift Valley o loo ola lelei i ni vaituloto e māi ma e matuā ese lava. Ona o le tele ai o le vailaau e taʻua o le sodium carbonate i le vai, ua pei ai e suāuua ma mū ai le paʻu pe a paʻi atu i ai. E mafai ona oo atu le vevela o le vaipanoa o loo iai vaituloto i le 150 tikeri Fahrenheit (65 tikeri Celsius). E malosi tele le manogi o elemeni o le teio (sulphur) ma le māi o le suāvai lea e alu aʻe mai le vaituloto, lea e punapuna mai ai le ea e pei o ni puta, ma faatumulia ai le ea vevela i le manogi. O le tele naunaʻi o vailaau ma minerale i le vai ua potopotoi ai ma ua pei o ni masima malō o loo taatitia solo i auvai o le vai.

E lē tele ni meaola e mafai ona ola ai i lea ituaiga o vai. Ae, o loo iai ni meaola ninii o loo  mafai ona ola ai—o ni limulimu ninii lava e lanu moanameamata. Ua avea le vevela o le lā o le teropika ma mea ua māfanafana ai le vai māi, ma ua iai i se tulaga ua fetaui lelei mo le ola lelei ai o le anoano o limulimu. Ua pei e lanumeamata le vai o le vaituloto ona o le tele naʻuā o le limulimu. O lenei faasologa matagofie o vaituloto i vanu ma atumauga o loo iai i le Great Rift Valley, ua pei o ni maatāua i se ula lo latou matagofie.

O se mea e maofa ai ona o le mafai e se manu e ʻauvaivai e pei o le flamingo ona ola ai i se siʻomaga faigatā ma gaoā. Ae, e matuā ola lelei lava le flamingo i inei. E lē ila ona vae mimiti uumi i le māi o le vai, ma e lē māgotogofie foʻi i le vaivai ma le susū o le pala ona o ona alofivae mafolafola pei o se pato. Ua sili ona talafeagai mo le lesser flamingo le ola ai i lenei siʻomaga faigatā. Ua iai ni lauulu ninii i lona gutu e mafai ona mitiia ma toe faamamā ese ai meaola ninii o loo i le pito i luga o le vai, i le loloto pe tusa ma le 2 i le 3 inisi (5-7 senitimita). A oo ina ʻai le flamingo, e lolō lona gutu i lalo o le vai, e faaū i luga le pito i lalo, ma faafaasaga agaʻi i tua. E mimitiina e le flamingo vai i lona laulaufaiva ma toe  faamamā i fafo e lauulu ninii ma faapena ona taofia ai i lona gutu ia meaola ninii.

E Mataʻina le Saʻiliga o se Soa

Ua mavae atu le pogisa pe a oso aʻe le lā i le taeao ma suluia ai le vaituloto lanu moanameamata. Ua iloa atu ai i le malamalama le anoano o flamingo o loo i le vaituloto, ua pei o se afi mumū lo latou lanu mai. E matuā putuputu faatasi lava nei manu. O manu o loo saʻili ni a latou soa, e faapotopoto i vaega ma latou fesavaliaʻi, e faasasaʻo i luga o latou ua, ma feliuaʻi solo o latou gutu.

E tofu lava le vaega ma le itulagi e faasasaga i ai, ma a o fesavaliaʻi ma fepasiaʻi nei vaega eseese o manu, e suluia o latou fulu mananaia i le lā, ma ua pei ai o se ata e mūmū ma piniki le felanulanuaʻi. E osooso i luga ma sisiva nei manu, ma faamafola o latou apaʻau e iloa atu ai le mūmū malosi o fulu o o latou apaʻau. I le faaalialia atu o o latou lanu mananaia, e tamomoʻe ai i luga o le vai ma felelei, ma toe ō ifo i lalo ma toe fai lava le taga lea e tasi. E faafaigatā i manu taʻitasi ona felelei ona o lo latou putuputu tele, ma e latou te faatalitali seʻia felelei muamua manu o loo i le faatausiʻusiʻuga o le lafu. Ua matuā faafaigatā ona lagona se isi mea ona o le pisapisaō o manu i lo latou fiafia.

Pe a oo ina pogisa, e faafuaseʻi ona felelei ese atu i le vanimonimo vaega eseese o manu. E felelei i laina pe e pei foʻi e faa-V la latou malaga, ma e faitau selau maila e felelei ai seʻia oo i le mea e malaga i ai —o se vaituloto e māi e talafeagai ona tautuufua ai ma tausia aʻe ai a latou toloaʻi. O le mea e mataʻina i lenei faigāmalaga, ona e tasi le taimi o loo tutupu faatasi ai ma flamingo o isi vaituloto o le Rift Valley.

Sa Auleaga a ua Aulelei

E fai faamoega o flamingo i vaituloto e mamao ese ma faigatā ona maua. E tāua lea tulaga mamao ese, ona o manu ia o le a tuufua e aafiagofie i ni mea e faateʻia ai. E tauau ina tuulafoaʻia e manu ia e tuufua o latou fua ma lē toe foʻi mai i ai pe a faateʻia.

E matuā pisi lava manu ia o le a tuufua. E feleleaʻi solo nei manu ma le fiafia tele a o amata ona fauina o latou faamoega. E latou te faaaogāina o latou gutu e asuina ai le pala, o otaota o manu, ma ni fulu, e fai ai se faamoega e pei a tafatolu e tusa ma le 16 inisi (40 senitimita) le umī agaʻi i luga. E faaofuofu luga o le faamoega e tuu ai le fua e tasi ina ia lē aafia i le vai. E lē umi ae amata ona fofoa le afe ma afe o tamaʻi manu. O mātua o nei manulele iti, e taufai felelei ane ma toe ō ese atu i le pisi i le galuega fitā o le fafagaina ma le tausia o nei manu o loo fia aai tele.

A oo loa ina mafai ona savavali manu laiti, ona tuua faafuaseʻi lea e o latou mātua nei manu laiti ae felelei atu i le isi vaega o le vaituloto lea o loo sili ona lelei ma tele ai le limulimu lanu moanameamata. O le a mafai ai ona aai ma toe faafouina le malosi, ona ua leai ni a latou toloaʻi e tausi. E faapotopotoina e ni nai manu matutua o loo nonofo ai pea le tele ma tele o nei manu laiti ua tuua e o latou mātua. E latou te vaavaaia lelei nei tamaʻi manu o loo pisapisaō, a o tau tulituli atu, e sopo atu i auvai o loo potopotoi ai le masima, seʻia oo ina toe faatasia ma o latou mātua. O le mea e ofo ai, ona e ui ina o loo femiomioaʻi solo manu, ae o loo iloa lava e le manu ia lana tama ma faapea ona toe faaauau ona ia tausiaina.

E faalēlelei le savavali a tamaʻi manu, ma e lē soo i o latou mātua. Talu ai e leʻi matutua, e pupuu o latou vae ma o latou ua, e sasaʻo o latou gutu, ma o o latou fulu, e lanu papaʻe. E mavae sina taimi ona faatoʻā amata lea ona tutupu o latou vae, ma faasolo ina uumi o latou ua ma loʻu, ma amata ona pipiʻo agaʻi i lalo le tupu o o latou gutu, ma maua ai le ituaiga loʻu lea e mātaulia ai le flamingo. E alu le lua i le tolu tausaga ona faatoʻā avea lea o le tamaʻi manu ma manu aulelei fulu mūmū. E saʻili sona soa ma faatasitasi atu i le taumanu tele o isi flamingo lanu piniki lea o loo atili faamatagofieina ai vaituloto e māi o le Rift Valley.

Ua avea le matagofie ma le aulelei o le flamingo ma faataʻitaʻiga ofoofogia o le foafoaga poto. E tatou te maua le fiafia i le vaai ma le faalogo pe a tatou matamata i lea manu aulelei i lona siʻomaga i le togāvao. Ae e sili atu i lo lenā, e faatupuina ai lo tatou talisapaia ma le alofa o Lē e ofoofogia na Foafoaina, o Ieova le Atua.

[Ata i le itulau 25]

Ituaiga o le greater flamingo

[Ata i le itulau 25]

Ituaiga o le lesser flamingo

[Ata i le itulau 26]

E lē soo manu laiti i o latou mātua aulelei