“Moomooga mo se Parataiso”

I le tausaga e 2001, na lafoina ane ai se tusi i le lālā a Molimau a Ieova i Papua Niu Kini mai se tasi e faitauina le Ala Mai! e nofo i Lae, i le itumalo o Morobe. Na ia faamatala e faapea:

“Ou te manatu na ou faia se filifiliga lelei lava i le lima tausaga ua tuanaʻi (a o oʻu iai i Port Moresby) e faitauina le mekasini o le Ala Mai! lea e lomia e la outou faalapotopotoga. Talu mai lava le 1997, ua ou faitauina uma kopi o lenā mekasini. Ua tumu loʻu fale i mekasini o le Ala Mai!

“Ua tele mea ua ou aʻoaʻoina. Ua matuā faateleina upu ua ou iloa, faapea ma loʻu iloa e tusa ai o le tele o mea, ua faaleleia laʻu kalama, ma loʻu malamalama e tusa ai o Lē na Foafoaina Mea. Ua oo ina sili atu ona ou malamalama i isi tagata, ma lagona le magafagafa mo i latou ma ou uaʻi atili atu, ma ua oo ina faateleina loʻu faatāuaina o laau ma manu. Ou te faamoemoe ia faateleina tagata e faitau i le Ala Mai! faapea ma isi a outou lomiga.”

Na faaiʻu mai faapea le tusi: “Ou te talitonu afai e avea tagata uma i lenei lalolagi ma Molimau a Ieova, o le a matuā vave ona avea o tatou moomooga mo se Parataiso ma mea moni lava. Ia faamalolosi i la outou galuega lelei.”

Ua faasino atu lomiga a Molimau a Ieova i le folafolaga a le Tusi Paia e toeitiiti ona suia lea o lenei faiga o mea i se lalolagi fou o le a aumaia e le Malo o le Atua. O loo faasino atu le tusi Le Poto e Taʻitaʻia ai i le Ola e Faavavau i lenā Malo o le tali lea i faafitauli o tagata.

E mafai ona e talosaga atu mo se kopi o lenei tusi e 192 itulau, e te suʻesuʻe lava oe i ai. Ia e faia faapea e ala i le faatumu ma lafoina mai le kuponi o loo iai i inei i le tuatusi o loo i lalo po o se tuatusi talafeagai e pei ona iai i le lisi i le itulau e 5 o lenei mekasini.

□ Auina mai iā te aʻu se kopi o le tusi Le Poto e Taʻitaʻia ai i le Ola e Faavavau.

□ Faamolemole faafesootaʻi mai aʻu mo se suʻesuʻega faale-Tusi Paia i le aiga e aunoa ma se totogi.