Le Manatu o le Tusi Paia

Pe e Manaʻomia Ona Ola Matitiva Kerisiano?

NA TAʻU atu e Iesu i se alii talavou mauʻoa, ma o se pule foʻi e faapea, e ao ona faatau atu ana mea uma ma avatu i ē matitiva. Ua taʻua e le mau e faapea, na lē fiafia lea alii i le fetalaiga a Iesu ma alu ese atu ai ma le faanoanoa, “auā ua tele ana oloa.” Ona faapea atu lea o Iesu i ona soo: “E matuā faigata ona sao atu o ē mauʻoa i le malo o le Atua.” Na toe faaopoopo mai Iesu e faapea: “E faigofie ona ui atu o se kamela i le pu o le au, a e faigata ona sao o le mauʻoa i le malo o le Atua.”—Mareko 10:21-23; Mataio 19:24.

O le ā le uiga o le fetalaiga a Iesu? Po o lona uiga e lē talafeagai ona mauʻoa se tasi e i le tapuaʻiga moni? Pe e tatau ona iai ni faalogona nofosala o Kerisiano pe afai e tele ni a latou tupe? Po o manaʻomia mai i latou e le Atua ia latou ola i ni olaga e leai ni mea faitino?

E Talia e le Atua “Tagata Uma Lava”

I aso anamua, e leʻi tapā e le Atua ia Isaraelu ia ola i ni olaga matitiva. Seʻi uaʻi mai foʻi i le manatu lenei: Ina ua latou nofoia nuu na tofia i latou i ai, sa faia faatoʻaga ma pisinisi a tagata auā le tausia o i latou ma ē pele iā i latou. Sa mafai ona aafia le taulau o a latou taumafaiga e mea e pei o tulaga tau tamaoaiga, o le tau, le soifua mālōlōina, ma le poto e faipisinisi. Sa faatonuina e le Tulafono a Mose Isaraelu ina ia agaalofa atu i ē ua iai se faalētonu i le itu tau tupe ma oo  ina lē tagolima. (Levitiko 25:35-40) Ae i le isi itu, e iai ē na mauʻoa. O loo taʻua Poasa, o se tagata faatuatua ma faamaoni, lea na avea mulimuli ane ma tupuaga o Iesu Keriso, “o le tagata mauʻoa tele.”—Ruta 2:1.

O le tulaga lava foʻi lena i le taimi o Iesu. I lana tali atu i le alii mauʻoa lea na taʻua i le amataga, e leʻi fuafuaina e Iesu le faaauilumaina o le ola e aunoa ma ni mea faitino ma ni mea e fiafia ai. Na i lo lena, na ia aʻoaʻoina se lesona tāua. I le vaaiga faaletagata, atonu e foliga mai e lē mafai e tagata mauʻoa ona faaalia le lotomaulalo ma talia le ala o le faaolataga a le Atua. Ae, na fetalai Iesu: “E lē mafaia e tagata lenei mea, a e mafaia mea uma e le Atua.”—Mataio 19:26.

Sa talia e Kerisiano i le uluaʻi senituri ia “tagata uma lava.” (1 Timoteo 2:4) Na aofia ai iā i latou na ē e mauʻoa, o nisi o loo sologa lelei i le itu faaletino, ma le tele o tagata matitiva. Atonu, o nisi na maua a latou ʻoa a o leʻi avea ma Kerisiano. I nisi tagata, atonu o le lelei o ni tulaga ma ni filifiliga poto tau pisinisi na oo ai ina mauoloa.

Ua faapena foʻi ona eseese tulaga tau tamaoaiga i le ʻauuso Kerisiano i aso nei. Ua latou taumafai uma e mulimuli i taʻiala a le Tusi Paia i mataupu tau tupe, ona e mafai ona aafia tagata uma i le matapeʻapeʻa. O le lesona lea na aʻoaʻoina ai e Iesu le pule talavou mauʻoa, e ao ona mataala i ai Kerisiano uma, e faatatau i le malosi o le ʻoa ma meafaitino, e puleaina se tagata.—Mareko 4:19.

Se Lapataʻiga i Ē Mauʻoa

E lē o faapea mai le Tusi Paia e leaga le tele o ʻoa, ae o loo taʻusalaina le naunau i ʻoa. Ua faapea mai Paulo, o se tusitala o le Tusi Paia: “Auā o le manaʻo i tupe, o le pogai lea o mea leaga uma lava.” Na ia taʻua e faapea o le lē amanaiaina e nisi o o latou manaʻoga faaleagaga ona o le fia mauʻoa, ua ‘sesē ai lava i latou i le faatuatua, ua tuʻia ai ua ati i latou e i latou i puapuaga e tele.’—1 Timoteo 6:10.

O se mea e ao ona mātauina ona na aumai e Paulo ni fautuaga e faapitoa mo ē mauʻoa. Na ia faapea mai: “Ia e matuā fai atu i ē mauʻoa i lenei olaga, aua neʻi faamaualuluga i latou, aua foʻi le faamoemoe i le oloa e faalētumau, a o le Atua soifua, o loo foaʻi tele mai iā te i tatou mea uma lava e faafiafia ai.” (1 Timoteo 6:17) E foliga mai e mafai ona manatu ē mauʻoa e latou te maualuluga ma sili atu i isi. E lē gata i lea, e ono tofotofoina i latou e manatu faapea e mafai ona maua le saogalemu moni mai ʻoa—o le mea lea e na o le Atua e mafai ona saunia atoatoa mai.

E mafai e Kerisiano e tele a latou meafaitino ona puipui mai i ia lamatiaga e ala lea i le “tamaoaiga i galuega lelei.” E aofia ai i nei galuega le “mataalofa, ia latou avatu fua a latou mea,” i le fesoasoani atu ma le aao mafola i ē o manaʻomia. (1 Timoteo 6:18) O Kerisiano uma—pe e mauʻoa pe e mativa—e mafai ona faaaogā a latou alāmanuia e faasalalau atu ai le tala lelei o le Malo o le Atua, o se avega tauave autū lea a Kerisiano moni i aso nei. O le iai o se agaga limafoʻai faapea, e faaalia ai se vaaiga saʻo e tusa ai o meafaitino ma e alofagia ai le tagata e Ieova le Atua ma Iesu Keriso, o ē e alolofa i ē e foaʻi ma le lotomalie.—Mataio 24:14; Luka 16:9; 2 Korinito 9:7.

O Mea e Tāua Atu

E manino mai la, e lē o manaʻomia ona ola matitiva Kerisiano. E lē tatau foʻi ona latou ‘mananaʻo i le fia mauʻoa.’ (1 Timoteo 6:9) Ae e latou te galulue ma le filigā ina ia maua se mea e ola ai. O le a eseese foʻi le taulau o a latou taumafaiga e tusa ai o vala eseese ma le tulaga tau tamaoaiga o loo latou ola ai.—Failauga 11:6.

Po o le ā lava lo latou tulaga faaletino, e taumafai Kerisiano “ina ia latou faamautinoa i mea e sili ona tāua.” (Filipi 1:10, NW ) E ala i le faamuamua o mea faaleagaga, ua ‘latou teua ai oloa mo i latou lava, o le faavae lelei mo aso atali, ina ia latou fetagofi atu i le ola moni lava.’—1 Timoteo 6:19.