Le Manatu o le Tusi Paia

E Ao Faapefea Ona Tatou Faaaogā le Saʻolotoga e Filifili Ai?

NA TUUINA mai e le Atua i uluaʻi tagata, o Atamu ma Eva, le saʻolotoga e faia ai a laʻua lava filifiliga. Na ia tuu atu iā Atamu e pulea le faatoʻaga i Etena. Na aofia ai i galuega a Atamu lona filifilia o ni igoa mo meaola. (Kenese 2:15, 19) Ae e sili atu ona tāua, o le mafai lea e Atamu ma Eva ona filifili pe la te usiusitai i le Atua pe leai.—Kenese 2:17, 18.

Talu mai lenā taimi ua faitau piliona le mau filifiliga ua faia e tagata—o nisi e lelei, o nisi e faalēlelei, a o isi ua matuā leaga lava. O ni isi o filifiliga leaga ua faia e tagata, ua iʻu ai i ni taunuuga e sili ona mafatia ai. Ae e lē o faalavelave mai lava le Atua i lo tatou saʻolotoga e filifili ai. Ua fesoasoani mai le Atua e ala i le Tusi Paia, ina ia tatou faia filifiliga lelei ona o ia o se Tamā alofa. Ua ia lapataʻia foʻi i tatou e tusa ai ma iʻuga o filifiliga sesē. Ua fai mai le Tusi Paia o le a tatou seleseleina mea ua tatou lūlūina.—Kalatia 6:7.

Filifiliga i Mataupu Totino

Ua faailoa mai ma le manino e le Atua lona finagalo e tusa ai ma nisi mataupu, e ala lea i le aumaia o taʻiala faapitoa. Ae i le tele o mataupu, e lē o faataatitia maia i le Tusi Paia ni tulafono e pulea ai a tatou mataupu totino uma. Na i lo lenā, ua aumaia faalautele taʻiala ina  ia fai ai le mea e fiafia ma naunau i ai le tagata. O se faataʻitaʻiga, seʻi mātau le mea o loo aumai ai e faatatau i mālōlōga ma faafiafiaga.

Ua taʻua i le Tusi Paia Ieova o le “Atua manuia.” (1 Timoteo 1:11) O loo faamatala mai i lana Afioga ia “ona pō e ʻataʻata ai” ma “ona pō e sasaa ai.” (Failauga 3:1, 4) Ua taʻua foʻi i le Tusi Paia e faapea na tāina e Tavita ni musika ina ia faafiafia ai isi. (1 Samuelu 16:16-18, 23) Na iai se faigaʻai o se faaipoipoga na auai atu i ai Iesu ma na faia ai sana vaega e faamanaia atili le faaipoipoga e ala i lona liliuina o le vai e avea ma uaina.—Ioane 2:1-10.

Peitaʻi ane, ua talafeagai le lapataʻi mai o le Tusi Paia e faapea: “O lē latou te feoaʻi ma tagata popoto, e poto lava ia; a o le uō a ē valelea, e leaga ai lava ia.” (Faataoto 13:20) E lē fiafia le Atua i le “faaulaula” ma amioga lē mamā ma e mafai ona faaleagaina ai la tatou faiā ma ia. (Efeso 5:3-5) Pe a lē pulea le faaaogāina o mea inu malosi i faatasitasiga, e ono tutupu mai ai ni faafitauli matuiā. (Faataoto 23:29-35; Isaia 5:11, 12) E inosia foʻi e Ieova faiga sauā.—Salamo 11:5; Faataoto 3:31.

Ua fesoasoani ia mau mai le Tusi Paia ina ia tatou maua le silafaga a le Atua e tusa ai o mālōlōga ma faafiafiaga. E manatua e Kerisiano le Tusi Paia pe a faia ni a latou filifiliga. O le mea moni, e tatou te inu lava i le lelei po o le lē lelei foʻi o a tatou lava filifiliga.—Kalatia 6:7-10.

I se tulaga faapena, ua faalaeiauina ai Kerisiano ia faia ni filifiliga poto e ōgatusa ma mataupu o le Tusi Paia e tusa o lavalava e laʻeiina, i ē faaipoipo atu i ai, i le avea ai ma mātua, ma mataupu tau pisinisi. E aofia ai i lenei tulaga mataupu e lē o patino mai i le Tusi Paia, ae ua iai ni mataupu silisili e fesoasoani i le faia o filifiliga e tusa ai ma le loto fuatiaifo. (Roma 2:14, 15) O filifiliga totino uma e faia e Kerisiano, e ao ona ōgatusa ma lenei faatonuga: “O lenei, pe tou te aai, pe tou te inu, po o se tasi mea tou te faia, ia outou faia mea uma lava ia viia ai le Atua.”—1 Korinito 10:31.

A o talanoa i lenei mataupu, e ao foʻi ona tatou manatunatu i le mataupu silisili e tusa i le “faia a outou lava feʻau.” (1 Tesalonia 4:11) E masani lava ona tele ni filifiliga i se mataupu e tasi e mafai ona faia e se Kerisiano, ma o nei filifiliga e lē o feteenaʻi ma le finagalo o le Atua. O lea la, atonu o le a ese le mea e filifilia e se tasi Kerisiano mai i isi Kerisiano. Ae o le a lē fiafia le Atua pe afai e fefaamasinoaʻi ana auauna e tusa o a latou filifiliga. (Iakopo 4:11, 12) Ua fautua mai ma le poto le Tusi Paia: “Aua foʻi neʻi . . . asiasi fua i mea a isi tagata.”—1 Peteru 4:15.

Le Filifiliga e Auauna i le Atua

Ua faatāua i le Tusi Paia aogā o le usitai i le Atua. Ae ui i lea, e lē o faamalosia e le Atua tagata e tapuaʻi atu iā te ia. Na i lo lenā, ua ia valaaulia ona tagata e tapuaʻi atu iā te ia. O se faataʻitaʻiga, ua faapea mai le Tusi Paia: “Ō mai ia, ia tatou ifo, ma ia tatou punonou; ia tatou tootuli i luma o Ieova o lē na faia i tatou.”—Salamo 95:6.

Na tuuina atu i le nuu anamua o Isaraelu se valaaulia faapena. E silia ma le 3,500 tausaga ua mavae na laulaututū ai le nuu o Isaraelu i luma o le mauga o Sinai ma na faailoa atu e le Atua iā te i latou le tapuaʻiga moni e ala i le Tulafono na tuuina iā Mose. Ua ao nei la ona faia se filifiliga: Po o le a latou auauna i le Atua pe leai? O le ā la latou tali mai? Na latou autasi i le faapea mai: “O mea atoa uma ua fetalai mai ai Ieova matou te faia lava, ma faalogo i ai.” (Esoto 24:7) O i latou lava na faia le filifiliga e tapuaʻi i le Atua.

I le uluaʻi senituri, na amataina ai e Iesu le talaʻiina o le tala lelei o le Malo o le Atua. (Mataio 4:17; 24:14) E na te leʻi taitai ona faamalosia se tasi e faia lea galuega. Na i lo lenā, na ia valaaulia ma le agalelei isi e ala i le faapea atu: “Mulimuli mai ia iā te aʻu.” (Mareko 2:14; 10:21) E toʻatele na talia lana valaau ma talaʻi faatasi ma ia. (Luka 10:1-9) Ina ua mavae sina taimi, e iai nisi na filifili e tuua Iesu. Na filifili foʻi Iuta e faalata iā te ia. (Ioane 6:66; Galuega 1:25) Mulimuli ane, e ala i le taʻitaʻiga a aposetolo, e toʻatele nisi tagata na avea ma soo i lo latou lava lotomalilie, ae e lē ona ua faamataʻuina i se pelu. O i latou o ni tagata na “saunia i le ola faavavau” ma na avea ma ē “talitonu mai.” (Galuega 13:48; 17:34) I nei foʻi aso, o Kerisiano moni ua latou lotomalilie e usitai i le Afioga a le Atua ma mulimuli i aʻoaʻoga a Iesu.

Ua manino mai la, e finagalo le Atua ia tatou faaaogā lo tatou saʻolotoga e faia ai filifiliga. Ua ia aumaia foʻi taʻiala i le Tusi Paia e fesoasoani iā i tatou i le faia o filifiliga poto. (Salamo 25:12) Pe a oo ina faia ni filifiliga totino, e ao i Kerisiano taʻitasi ona manatunatu i mataupu silisili mai le Atua. Ua pau lenā o le ala e tatou te avatuina ai i le Atua le auaunaga paia ‘⁠o le mea lea e tatau ona tatou faia.’—Roma 12:1.