Faaalia o le Alofa i Taimi o Faalavelave

TUSIA E LE TUSITALA O LE ALA MAI! I NIGERIA

I LAGOS, i Nigeria, na taʻua ai le aso 27 o Ianuari, 2002, o le Aso Sa Pogisa. Na faafuaseʻi ona pāpā auupega i le nofoaga na teu ai i lalo o le laueleele, ma lūlūina ai le aai atoa ma ua pei ai ua ao le pō i le malamalama mai le faalavelave. Na fai sina umi o pāpā pea auupega ma toe toʻulu ifo pomu ia na felelei atu i lugā faapea ma toēga o auupega, i le vaipanoa e tusa ma le lua maila [3 kilomita] mai le mea na tupu ai le faalavelave, ma na matuā matataʻu ai tagata o le aai.

Na faateteleina le matataʻu o tagata ona o tala sesē ua feaveaʻi. Na lolofi ane tagata i auala tele ona o lo latou fefefe naʻuā, talu ai e latou te lē iloa po o le ā o loo tupu. E faitau selau tagata, e aofia ai ma tamaiti ua faatumulia i le fefe, na sē la latou solaaga i se auvai loloto ma palapalā ma malelemo ai ona ua faigatā ona iloa se mea i le pogisa o le pō. Na matuā faaleagaina le tele o fale, o faleaʻoga, faapea ma fale faigaluega ma pisinisi, ma e toʻatele i latou na leai ni mea e nonofo ai ma leai foʻi ma ni a latou galuega ona o lea tulaga. O se fua faatatau o le aofaʻiga atoa o ē na maliliu e tusa ma le 1,000 tagata, ae na iloa mulimuli ane e faapea e sili atu na i lo lenā.

E tusa ma le 1,350 pomu e leʻi pāpā, faapea ma ni auupega e pei o ni roketi ma fanaiʻa na aoina mai vaipanoa e tū lalata i le nofoaga o le vaegāʻau lea na tupu ai le faalavelave. Na maua e se tasi tamāloa se uʻamea i lona potu mālōlō, ma na ia tuuina i le keli o lana taavale ma momoli atu i le vaegāʻau, e aunoa ma lona iloaina o se pomu.

Ina ua logotala le ofisa o le lālā o Molimau a Ieova i Nigeria i le faalavelave, na latou faafesootaʻia loa se toeaina i Lagos ma faatonuina ovasia femalagaaʻi e 16 o loo iai i lea vaipanoa e vaai po o faapeī mai le tulaga o Molimau e 36,000 o loo iai i Lagos. Na lafoina  atu e le lālā le tasi miliona naira (e tusa ma le 10,000 tālā Amerika) ma fai atu i le ʻauuso ia faatū se komiti e vaavaaia le tuuina atu o le fesoasoani.

E tusa ai ma le tulaga o Molimau, e toʻatasi se tamāloa na lavea leaga lava i se pomu; e toʻalua ni teine talavou na maliliu ai, ma e lua Maota o le Malo na faaleagaina, ma e toʻa 45 aiga na faaleagaina o latou fale.

E ono aso talu ona mavae lenā faalavelave, ae tulaʻi mai se fetauaʻiga i le va o tagata e eseese ituaiga i se isi vaega o le aai iā Fepuari 2, 2002. E tusa ai ma faamatalaga a le Koluse Mūmū, e 100 tagata na maliliu, e 430 na lavevea ai, ma e 3,000 i latou na tuua o latou aiga, faapea ma fale e 50 na mū ai. O le komiti fesoasoani lea na vaavaaia le ʻauuso na afāina i le faalavelave o le “Aso Sa Pogisa,” sa latou vave ane foʻi e saʻilia o latou uso Kerisiano i lea vaipanoa.

E leai ma se Molimau na maliu ai i lea faalavelave ona o le toʻatele o i latou, sa auai i se fonotaga matagaluega i le taimi na tupu ai le fetauaʻiga. Peitaʻi, o le toʻatele o uso mai faapotopotoga e lima i lenā vaipanoa, e toe foʻi ane ua leai ni o latou fale. Na fiafia o latou uso Kerisiano e latou te nonofo faatasi. E 27 tagata na nonofo i le fale o se fomaʻi Molimau ma lana avā.

O Molimau a Ieova i Lagos e leʻi aafia i ia faalavelave uma e lua, na matuā faamafola o latou aao i le foaʻi ane o meaʻai, lavalava, ma mea e aogā mo fale. Na taʻua faapea e le ovasia o le aai: “Ua sili atu mea o loo foaʻi e le ʻauuso i Lagos na i lo mea o loo manaʻomia e i latou o loo afāina i faalavelave.” Na oo ina tusi atu le ofisa o le lālā i faapotopotoga ina ia taofi le toe tauofoina ane o ni isi mea. E tolu ni uta na laʻuina atu e ni loli o mea na totoe e teu i le lālā.

E toʻatele i latou na afāina faapea ma aiga o i latou ua maliliu na asia e toeaina o faapotopotoga. Sa latou avatu ni faamāfanafanaga mai le Tusi Paia. Sa fai faatatauga a le komiti fesoasoani ina ia toe faaleleia fale na faaleagaina. Na latou avatu mo i latou na afāina i faalavelave ni mea e aogā mo o latou aiga, atoa ma lavalava ma meaʻai, ma fesoasoani foʻi i ē ua leai ni fale ia maua ni mea e nonofo ai. E 90 aiga ma tagata na ave i ai le fesoasoani a le komiti.

Na matuā ootia loto o i latou na maua le fesoasoani. Na faapea atu se tasi Molimau i le komiti fesoasoani: “O le a avea pea Ieova ma oʻu ‘malu ma malosi’ a o oʻu ola!”—Salamo 46:1, 2.

Na mātauina e i latou e lē o ni Molimau le auala na fetausiaʻi ai Molimau a Ieova i ia faalavelave. Na faapea atu le tuagane o le tinā o sē tuafafine Molimau ua maliu i toeaina o le faapotopotoga a lea tuafafine: “Ou te toe foʻi mai e matuā avatu se faafetai iā te outou ma ou te fia malamalama atili e faatatau iā te outou.” Na ia faamatala atu i lona aiga: “E matuā uiga ese mea na ou vaaia i Lagos. E oo lava i tauaiga o ē na afāina e lē mafai ona latou faia mea na fai e ia tagata.”

[Ata i le itulau 29]

O se loli ua faatumulia i fesoasoani

[Ata i le itulau 29]

O nisi na avatu i ai le fesoasoani

[Ata i le itulau 30]

E 27 tagata na nonofo ma lenei ulugaliʻi

[Ata i le itulau 30]

O Molimau o loo fai se galuega i se fale ua faaleagaina

[Ē Ana le Ata i le itulau 29]

I luga: Sam Olusegun - The Guardian