Faasao E Lona Manava!

E LĒ vave lana gaoioi. E lē aulelei foʻi i le vaaiga a le toʻatele. Ae, e matuā uiga ese lona manava! O le ā o loo faatatau i ai a tatou tala? O le iʻa e taʻu o le sue. Ua taʻua faapea e le mekasini faa-Peretania o le Talafaasolopito o le Natura, “e matuā uiga ese le suiga o le iʻa lenei” pe a oo ina lamatia e se fili. E oo atu i le 20 inisi [50 senitimita] le umī o lana tupu, ma ua fai mai atili lea mekasini e na te faafefete lona tino “seʻia oo ina faatoluina lona telē na i lo le mea e masani ai ma ua lapotopoto ma lilo atoa i tala—e ui e lē lelei ai lana aau i lea faiga ae e aogā e tutuli ese ai ni meaola e osofaʻi ane.”

E faafefete e le iʻa lona tino e ala i le pamuina o vai i lona manava, lea e faaselau taimi e lapoʻa atu ai lona manava na i lo le telē masani! Ua mafai ona faia faapea e le sue ona o se mea uiga ese e i lona tino, o numi po o piliti o loo i lona manava.

Ua faamatala mai e le Talafaasolopito o le Natura e faapea, e tusa e iai piliti i totonu o isi piliti i le manava o le sue. Ua fai mai lea mekasini, o piliti e sili ona lapopoʻa e tusa ma le tasi vae valu o le inisi [3 milimita] le tetelē ae “i totonu o na piliti e iai isi piliti e laiti ifo, ma faasolo ai lava faapena seʻia tau i piliti ninii lava e faatoʻā iloa pe a faaaogā se fāʻata e faatetelē ai mea.”

O lea, e tatau foʻi la ona memeʻi i fafo le paʻu o le sue ina ia fetaui ma lona manava lapoʻa. E sautualua le paʻu o le sue ma ua mafai ai ona lua ni auala e memeʻi ai lona paʻu. O le paʻu e pito i totonu, e tai pei o le manava, ona e iai ona piliti, ae o le paʻu i fafo, e memeʻi. O le memeʻi o le paʻu pito i fafo o le sue e aogā e taofi ai le paʻu mai le maanuminumi ma afāina ai le gaoioi saosaoa o le iʻa, a o toe memeʻi i totonu lona manava.

Ae e lē na o le faafefeteina o lona tino e faaaogāina e le sue e tuliesea ai ona fili. A oo ina fefete lona tino, e vave foʻi ona tutū faasasaʻo ona tala. O lea la, afai e te vaaia se sue a o e faaopeopea ma matamata i ʻamu ma iʻa i sau mata, aua e te paʻi i ai! Ia faaeteete foʻi i lona gutu, e ū lava oe ina e tigāina!

Ina ua fesiligia Iopu e le Atua e tusa o ana galuega faalefoafoaga, na tali mai Iopu: “Ua ou iloa e te mafaia mea uma, e lē mafai foʻi ona vaoia se mea e te finagalo i ai.” (Iopu 42:2) Ioe, atonu e lē saosaoa tele ma e lē aulelei foʻi lea iʻa talatala e taʻu o le sue, ae ua aumaia ai se faamaoniga tele o le mana faalefoafoaga o le Atua faapea ma lona atamai.—Roma 1:20.

[Ata Credit Lines i le itulau 21]

I luga: Ata na puʻe e John E. Randall; lalo: © Jeff Rotman