Lata Mai—Se Lalolagi e Aunoa ma Fualaau Faasāina

Pe mafai ona e mafaufau i se lalolagi e aunoa ma fualaau faasāina?

UA TALOSAGAINA e le Failautusi Sili o Malo Aufaatasi, o Kofi Annan, ia malo uma ina ia galulue mo se lalolagi faapena. Ua ia faapea mai: “E ao ona tatou faia ni taumafaiga fou ma malolosi ia tetee atu ai i lea leaga; le mala ua maileia ai le toʻatele o a tatou fanau.”

O se matuā luʻi tele lea, e ui lava ina ua malilie taʻitaʻi e faaitiitia le faia ma le faatauina atu o fualaau faasāina i le lalolagi uma. O Hennadiy Udovenko mai Ukraine, o lē sa avea ma peresitene o se tauaofiaga faapitoa o le Fono Sili a Malo Aufaatasi, na ia faapea mai “o le fefaatauaʻiga o fualaau faasāina, o se tasi lea o pisinisi e sili ona tupe silia i pisinisi fai faananā, auā o le tupe e maua mai ai e sili atu i le 400 piliona tālā Amerika i le tausaga, . . . ma e mafai ona faaleagaina pe lē sologa lelei ai foʻi le tamaoaiga i le lalolagi aoao.” Na ia faapea mai foʻi ua “avea le faafitauli i fualaau faasāina ma tulaga moni lava i le lalolagi ma e leai se malo e mafai ona sao mai ai.”

E faigatā ona mafaufau i se lalolagi e aunoa ma ni fualaau faasāina. O le mea moni ua lē mafai e malo faaletagata ona foiʻa lenei faafitauli. Ae peitaʻi, e leai se isi e mafai ona taofia le Atua e Ona le Malosi Uma Lava mai le faataunuuina o lana fuafuaga e aumaia se lalolagi parataiso. O i inā o le a faamalieina ai manaʻoga uma tau i faalogona, faaletino, ma le faaleagaga. (Salamo 145:16; Luka 23:43; 2 Peteru 3:13) E tusa ai ma le perofeta o Isaia, o le afioga a le Atua ‘e lē foʻi atu fua iā te ia; a e peitai e faia le mea e na te finagalo i ai, e manuia foʻi le mea e na te auina atu ai.’—Isaia 55:11.

E tele ni aogā ua mafai ona maua i le taimi nei e ala i le faamoemoe i na folafolaga. O se faataʻitaʻiga, sa tagofia e Edmundo fualaau faasāina, ae o lona talitonu i le folafolaga a le Tusi Paia i se lalolagi fou amiotonu na ala ai ona toe suia lona olaga. O lana faamatalaga i le taimi nei e faapea: “Pagā loʻu valea ma le maumau o loʻu taimi na iai.” Talu ai lona faanaunauga ia mauaina pea le finagalo malie o le Atua, ua mafai ai nei ona ia lē toe tagofia fualaau faasāina. Ioe, e mafai ona uunaia i tatou i le taimi nei i le malamalama i le Atua ma ana folafolaga ina ‘ia oofu ai i le tagata fou ua faia e foliga i le Atua, i le amiotonu ma le amio lelei e faamaoni.’—Efeso 4:24.

E lē mafaitaulia le toʻatele o tagata sa faaaogāina fualaau faasāina o lea ua iai nei sa latou faiā māfana ma Lē na Foafoaina Mea. E matuā tāua iā i latou upu nei a le faisalamo: “Aua e te manatua aʻu agasala ina ou tauleʻaleʻa, ma oʻu solitulafono; a e tusa ma lou alofa ia e manatua mai aʻu, Ieova e, ona o lou agalelei. O Ieova, e agalelei ma amiotonu ia, o le mea lea na te faasinoina atu ai le ala i tagata agasala.” (Salamo 25:7, 8) E matuā faalaeiauina ai lava mātua o fanau faalogogatatā i le iloaina e mafai ona suia a latou fanau! E ala i taumafaiga filigā o le a mafai ai e mātua ona fesoasoani i a latou fanau ia tetee atu i lea mala o fualaau faasāina ma ia “fetagofi atu i le ola moni lava” lea o le a maua i le lalolagi fou a le Atua.—1 Timoteo 6:19.

[Ata i le itulau 10]

O le faamoemoe e ola i le lalolagi fou a le Atua ua uunaʻia ai le toʻatele o ē faaaogāina fualaau faasāina e suia o latou olaga