O Sē na Filifili e Usitai i le Atua

I LE vaitaimi pogisa o le tausaga 1937, a o malosi fevesiaʻiga faapolotiki i le tele o atunuu i Europa, sa fesagaʻi ai Kerisiano moni ma ni filifiliga faigatā. O ai e ao ona latou usitai i ai, o le Atua po o tagata? (Galuega 5:29) Na iloa lelei e tama talavou ua ausia le matutua e valaaulia ai i le vaegāʻau e faapea, o lo latou usitai i le Atua e ono mafai ona oo ai le oti iā i latou.

E 19 tausaga o le talavou mai Sepania e igoa iā Antonio Gargallo na oo i lenā tulaga. Pe ā ma se tausaga talu ona fetauaʻi vaega eseese o le atunuu i Sepania ae valaauina loa o ia i le vaegāʻau e le vaega a le taʻitaʻiʻau o Franco. I le tausaga na teʻa atu, na papatisoina ai Antonio e avea o se Molimau a Ieova, ma na ia iloa le fautuaga o loo i le Tusi Paia ina ia solitū auauna a le Atua mai faigā taua ma ia lē aʻoaʻo foʻi i taua. (Isaia 2:4; Ioane 17:16) Na taumafai Antonio e sola i Falani ona o lona lē fia avea ma fitafita e fasiotia ona uso a tagata. Ae na puʻeina o ia ma avatu i se nofoaga o le vaegāʻau i Jaca, i Huesca, e lata i le tuaoi ma Falani.

Na tuuina atu e se komiti faafaamasinoga o le vaegāʻau se filifiliga faigatā: O le alu e tau po o le faasalaina i le oti. Na filifili Antonio e usitai i le Atua. A o tulata lona faasalaga oti, na ia tusia se tusi i lona tinā ma lona tuafafine e lē o ni Molimau a Ieova e faapea:

“Ua lokaina aʻu e aunoa ma se faamasinoga ua faia, ma ua faasalaina aʻu i le oti. O nanei e uma ai loʻu ola. Aua lua te faanoanoa pe fetagisi . . . , auā ua ou usitai i le Atua. E ui i lea, e lē tele saʻu e maumau, auā pe a tusa ai ma le finagalo o le Atua, o le a ou maua se olaga fou e sili atu . . . . Ou te lagona lava le toʻafilemu a o lalata mai loʻu toe itula. O si aʻu toe opo atu lea iā oulua, o lau tama ma lou tuagane o loo alofa tele atu lava mo oulua.” *

Na taʻua e se lipoti a ni fitafita se toʻatolu le usuina e Antonio o pese o viiga iā Ieova a o ia agaʻi atu i lona faasalaga oti. O taulaga faapena, e silafia lelei e le Atua ma lona Alo. E tatou te mautinoa o Kerisiano faamaoni e pei o Antonio, o le a maua lo latou taui e ala i le toetū.—Ioane 5:28, 29.

[Faaopoopoga i lalo]