Le “Auala E Sili Ona Malifa”?

▪O le ā se mea mataʻina e faatatau i le auala o Baldwin, i Dunedin, i Niu Sila? Ua loa ona faapea mai tagata o Dunedin o le auala lea e aupito sili ona malifa i le lalolagi. E ui ua luʻia lea manatu e isi, ae e mautinoa le mea lenei: e matuā malifa lava le auala o Baldwin.

Ua avea lenei auala lauiloa ma mataaga e fiafia i ai turisi mai i vaega eseese o le lalolagi. Ae e lē seʻiloga o oe o se tagata e aʻe mauga ona mafai lea ona e aʻea le tumutumu o lea auala. E mafai ona e aʻea lea auala ma o lona umi e 1,180 futu [359 mita], ae e lē fautuaina le alu ai i se taavale.

Ō Mai Tatou Feʻaʻei Faatasi

O se aso e mūgālā a o matou vaavaai atu, faatasi ma aʻu uō e toʻalua, i le maualuga o le auala lea o loo i o matou luma. O le taimi lava na amata ai la matou savaliga, ae amata ai foʻi ona matou mānavanava tetele a o matou ō punonou agaʻi i luma i le tau faapaleniina o o matou tino. “Oka, e pei lava o lea e tatou te feʻaʻei i se pa simā,” o le faamatalaga lenā a se tasi, e tau mole lava ma fai. Na fetaui lava ma lo matou oo atu i se nofoa ma matou mālōlō ai loa.

Na faaauau la matou savaliga ma e leʻi umi ae matou taunuu loa i le tumutumu o le auala ma matamata mai i le vaaiga i lalo, a o tau tō o matou sela. O lalo ifo o le auala o loo iai ni fale ma ni togālaau e mananaia lo latou teuina. A vaai mamao atu agaʻi i le tafatafaʻilagi, e te iloa atu ai laau lanulauʻava o le atunuu, ma o loo sosoo ma fanua o loo tutupu lauolaola ai le vao—o tua atu o na mea o loo iloa atu ai le lagi lanumoana.

E leʻi faatūina se matatiʻa fou i le vave o la matou savaliga. Ina ua matou toe foʻi i lalo, ona puʻe lea o se ata e faailoga ai lo matou mafaia ona aʻea lea aʻega, ma na maua ai foʻi ma ni o matou Tusipasi mai le aai, e faailoa ai na matou aʻea le “Auala e Sili Ona Malifa i le Lalolagi.”—Ua Tusia Mai e se Tasi.