Le Auala e Fesoasoani ai le Tusi Paia i Ē Maʻi Suka

E MATUĀ tāua lava le pulea totino ma se vaaiga mautinoa i le soifua mālōlōina ma le sologa lelei o tagata maʻi suka. Ae ina ia atiina aʻe ia uiga, e manaʻomia ai e i latou se lagolagosua faifai pea. O lea la, e lē tatau i tagata o le aiga ma uō ona faaosoosoina le tagata maʻi suka i meaʻai e lē lelei mo i latou e ala i le fai atu: ‘Ailoga e afāina pe a e tofo tasi i ai.’ Ua faapea mai Harry, o lē e maʻi fatu ma e maua foʻi i le maʻi suka Ituaiga 2: “E lelei tele le lagolagosua mai a laʻu avā. E na te lē teuina ni meaʻai e lē tatau ona ou ʻai ai. Ae e iai nisi e lē malamalama, ma e latou te lē iloa le faigatā tele o lea tulaga iā te aʻu.”

Pe afai e masani ona tou faatasitasi ma se tagata maʻi suka, e lua ni manatu matagofie mai le Tusi Paia e ao ona manatua: “Aua le saʻili se tasi i lona lava lelei, a ia taitasi ma saʻili i le lelei o le isi,” ma “e lē saʻilia e [le alofa] ana lava mea.”—1 Korinito 10:24; 13:4, 5.

O i latou uma o loo manatunatu mo lo latou soifua lelei, pe e maʻi suka pe leai foʻi, e ao ona pulea e tusa ai o meaʻai. Ua fesoasoani mai le Tusi Paia i lea tulaga, auā o loo taʻu mai ai le manaʻomia e i tatou uma ona atiina aʻe le pulea totino po o le lē gaoiā. Po ua e filifili e faatatau lea uiga i lou olaga? (Kalatia 5:22, 23, LT) E mafai ona maua atili se fesoasoani mai i faataʻitaʻiga o loo i le Tusi Paia, e pei o le aposetolo Kerisiano o Paulo. Ua faapea mai se tasi tagata maʻi suka: “Na iā te ia se mea matuitui i le tino, ae na ia auauna pea ma le faamaoni ma le atoatoa i le Atua. Ou te mafaia foʻi ona fai faapena!”

Ioe, sa talia e Paulo mea na ia lē mafai ona suia ma sa ia matuā taulau i le avea ai o se misionare. (2 Korinito 12:7-9) O Dustin o se talavou e 18 tausaga na fanau mai o tauaso ma na maua o ia i le maʻi suka talu mai le 12 o ona tausaga. Ua ia tusi mai e faapea: “Ou te iloa e leai se isi i lenei lalolagi o atoatoa lona olaga. Ou te faatali ma le fiafia i le lalolagi fou a le Atua lea o le a ou lē toe maua ai i le maʻi suka. Iā te aʻu lava ia, e toeitiiti ona mavae atu lea. Atonu e fai si umi o le maʻi suka na i lo le isu mamafa po o le fulū, ae e oo lava ina lē toe iai.”

Ina ua faia e Dustin lenā faamatalaga, o loo ia mafaufau i le faamoemoe o le ola soifua mālōlōina atoatoa i le parataiso i le lalolagi i le taimi o le pulega a le Malo o le Atua. (Faaaliga 21:3, 4) Ua folafola mai e le Atua e faapea i lalo o lenā pulega tauatua, e “lē fai mai foʻi se tasi ua mau ai, Ou te maʻi.” (Isaia 33:24; Mataio 6:9, 10) Pe e te fia malamalama atili e uiga i lenei faamoemoe o loo faavaeina mai le Tusi Paia? Ia faafesootaʻi Molimau a Ieova i lou vaipanoa, pe tusi atu foʻi i ē lomia lenei mekasini i se tuatusi talafeagai o loo i le itulau e 5.

[Ata i le itulau 12]

E tāua tele le pulea totino ma se vaaiga mautinoa